Read Tunisian Arabic New Testament كُورِنْثُوسْ الأَوِلْ 6 Bible Online

كُورِنْثُوسْ الأَوِلْ 6 - Tunisian Arabic New Testament bible

كُورِنْثُوسْ الأَوِلْ 6

¹وَقْتِلِّي وَاحِدْ عَنْدُو مُشْكْلَة مْعَ وَاحِدْ مِنْ خْوَاتُو المُؤْمْنِينْ، كِيفَاشْ يِمْشِي يِشْكِي بِيهْ لِلقُضَاةْ الِّي مَا هُمْشْ مُؤْمْنِينْ، وْمَا يِشْكِيشْ بِيهْ لِلإِخْوَة المُؤْمْنِينْ؟

²يَاخِي مَا تَعْرْفُوشْ الِّي المُؤْمْنِينْ بَاشْ يُحْكْمُوا عْلَى العَالَمْ؟ إِذَا كَانْ إِنْتُومَا بَاشْ تُحْكْمُوا عْلَى العَالَمْ، يَاخِي مَا كُمْشْ بَاشْ تْنَجّْمُوا تُحْكْمُوا فِي القَضَايَا الصْغِيرَة؟

³يَاخِي مَا تَعْرْفُوشْ الِّي أَحْنَا بَاشْ نُحْكْمُوا عْلَى المْلاَيْكَة؟ فَمَبَالِكْ الحَاجَاتْ مْتَاعْ الدِّنْيَا هَاذِي.

⁴وْإِذَا كَانْ وُقْعِتْ مَشَاكِلْ بِينَاتْكُمْ فِي الحَاجَاتْ هَاذِي، حُطُّوا نَاسْ مَا عِنْدْهُمْشْ قِيمَة فِي الكَنِيسَة بَاشْ يُحْكْمُوا.

⁵وِنْقُولْ الحَاجَة هَاذِي بَاشْ نْحَشِّمْكُمْ. يَاخِي مَا فِيكُمْشْ حَتَّى وَاحِدْ حَكِيمْ يْنَجِّمْ يُحْكُمْ بِينْ خْوَاتُو،

⁶آمَا رَاهُو الخُو يِشْكِي بْخُوهْ، لْنَاسْ مَا هُمْشْ مُؤْمْنِينْ!

⁷إِنْتُومَا تِشْكُوا بِبْعَضْكُمْ، وْهَاذَا عِيبْ! مُوشْ خِيرِلْكُمْ كانْ تِتْحْمْلُوا الظُّلْمْ؟ مُوشْ خِيرِلْكُمْ كِتِقْبْلُوا إِنّْهُمْ يِسْلْبُوكُمْ؟

⁸وْبِالعَكْسْ إِنْتُومَا هُومَا الِّي تُظْلْمُوا وْتِسْلْبُوا حَتَّى فِي خْوَاتْكُمْ!

⁹يَاخِي مَا تَعْرْفُوشْ الِّي الظَّالْمِينْ مَا يُورْثُوشْ مَمْلِكْةْ اللهْ؟ مَا تُغْلْطُوشْ، لاَ فِسَّادْ وْلاَ الِّي يِعْبْدُوا فِي الصْنَبْ وْلاَ الِّي يَزْنُوا وْلاَ الرْجَالْ الِّي يْقَلّْدُوا فِي النْسَاء وْلاَ الرْجَالْ الِّي يُرْقْدُوا مْعَ الرْجَالْ،

¹⁰وْلاَ سُرَّاقْ وْلاَ طَمَّاعِينْ وْلاَ الِّي يِسْكْرُوا وْلاَ الِّي يْسِبُّوا وْلاَ الِّي يَخْطْفُوا يُورْثُوا مَمْلِكْةْ اللهْ.

¹¹ثَمَّة شْكُونْ مِنْكُمْ كَانُوا فِي الحَالَة هَاذِيكَا، آمَا رَاكُمْ تِغْسِلْتُوا، وِتْقَدِّسْتُوا، وْوَلِّيتُوا أَبْرَارْ بْإِسْمْ الرَّبْ يَسُوعْ المَسِيحْ وِبْرُوحْ إِلاَهْنَا.

¹²«كُلْ شَيْء يْحِلْ لِيَّا»، آمَا مُوشْ كُلْ شَيْء يِنْفَعْ. «كُلْ شَيْء يْحِلْ لِيَّا»، آمَا مَا نِيشْ بَاشْ نْخَلِّي حَتَّى حَاجَة تِتْحَكِّمْ فِيَّ

¹³المَاكْلَة لِلكِرْشْ، وِالكِرْشْ مَجْعُولَة لِلمَاكْلَة، وِالله بَاشْ يِقْضِي عْلِيهُمْ الإِثْنِينْ. آمَا الْجَسَدْ رَاهُو مُوشْ لِلزْنَى، رَاهُو لِلرَّبْ وِالرَّبْ للْجَسَدْ.

¹⁴وِالله الِّي قَيِّمْ الرَّبْ مِنْ بِينْ المُوتَى بَاشْ يْقَيِّمْنَا أَحْنَا زَادَا بْقُدْرْتُو.

¹⁵مَا تَعْرْفُوشْ الِّي بْدُونَاتْكُمْ هِيَ أَعْضَاءْ المَسِيحْ؟ يَاخِي نَاخُذْ الأَعْضَاءْ مْتَاعْ المَسِيحْ وِنْرُدّْهَا أَعْضَاءْ مْتَاعْ مْرَا زَانْيَة؟ حَاشَا!

¹⁶وِلاَّ مَا تَعْرْفُوشْ إِنُّو الِّي يِتْرْبَطْ بِمْرَا زَانْيَة يْوَلِّي هُوَ وْيَاهَا بْدَنْ وَاحِدْ؟ عْلَى خَاطِرْ الكْتَابْ المُقَدَّسْ يْقُولْ: «الإِثْنِينْ يْوَلِّيوْ بْدَنْ وَاحِدْ.»

¹⁷وْآمَا الِّي يِتْرْبَطْ بِالرَّبْ رَاهُو يْوَلِّي هُوَ وْيَاهْ رُوحْ وَاحِدْ.

¹⁸أُهْرْبُوا مِالزْنَا، كُلْ ذَنْبْ يَعْمْلُو الإِنْسَانْ مَا يْأَثِّرْشْ عْلَى بَدْنُو. آمَا الزَّانِي رَاهُو يْضُرْ بَدْنُو.

¹⁹يَاخِي مَا تَعْرْفُوشْ الِّي بْدُونَاتْكُمْ هِيَ هَيْكِلْ الرُّوحْ القُدُسْ الِّي فِيكُمْ وِلِّي خْذِيتُوهْ مِنْ عِنْدْ اللهْ؟ إِنْتُومَا مَا كُمْشْ مِلْكْ لِرْوَاحْكُمْ، آمَا رَاكُمْ مِلْكْ للهْ.

²⁰وْإِنْتُومَا تِشْرِيتُوا وْتِدْفَعْ فِيكُمْ سُومْ. إِمَّالاَ مَجّْدُوا اللهْ فِي بْدُونَاتْكُمْ.