Read Tunisian Arabic New Testament كُورِنْثُوسْ الأَوِلْ 7 Bible Online

كُورِنْثُوسْ الأَوِلْ 7 - Tunisian Arabic New Testament bible

كُورِنْثُوسْ الأَوِلْ 7

¹وْآمَا فِي مَا يْخُصْ الشَّيْء الِّي كْتِبْتُولِي عْلِيهْ: رَاهُو خِيرْ لِلرَّاجِلْ كِمَا يْعَرِّسْشْ.

²آمَا، بِسْبَبْ الزْنَى، خَلِّي كُلْ رَاجِلْ تْكُونْ عَنْدُو مَرْتُو وْكُلْ مْرَا يْكُونْ عِنْدْهَا رَاجِلْهَا،

³وِالرَّاجِلْ يِلْزْمُو يَعْطِي المْرَا حَقّْهَا، وِالمْرَا زَادَا يِلْزِمْهَا تَعْطِي لِلرَّاجِلْ حَقُّو.

⁴المْرَا مَا عِنْدْهَاشْ سُلْطَة عْلَى بْدَنْهَا، آمَا رَاهُو لْرَاجِلْهَا. وِالرَّاجِلْ زَادَا مَا عِنْدُوشْ سُلْطَة عْلَى بَدْنُو، آمَا رَاهُو لْمَرْتُو.

⁵حَتَّى وَاحِدْ مِنْكُمْ مَا يْشِدْ رُوحُو عْلَى الآخَرْ إِلاَّ إِذَا كَانْ كُنْتُوا مِتَّفْقِينْ وِلْمُدَّةْ قْصِيرَة، بَاشْ تَعْمْلُوا وَقْتْ لِلصْلاَة. وِمْبَاعِدْ أَرْجْعُوا عِيشُوا كِيفْ العَادَة بَاشْ تَبْقَاوْ تِتْحَكّْمُوا فِي رْوَاحْكُمْ، وِالشِّيطَانْ مَا يْجَرَّبْكُمْشْ.

⁶آمَا رَانِي الشَّيْء هَاذَا نِسْمْحِلْكُمْ بِيهْ، مَا نِيشْ نُأْمِرْ فِيكُمْ،

⁷وِنْحِبْ النَّاسْ الكُلْ يْكُونُوا كِيفِي. آمَا كُلْ وَاحِدْ عَنْدُو مَوْهِبْتُو الِّي عْطَاهَالُو اللهْ، وَاحِدْ عْطَاهْ الحَاجَة هَاذِي وِالآخَرْ عْطَاهْ حَاجَة أُخْرَى.

⁸وِنْقُولْ لِلِّي مَا هُمْشْ مْعَرّْسِينْ وِلِّي رْجَالْهُمْ مَاتُوا بَاهِيلْهُمْ إِذَا كَانْ يَبْقَاوْ كِيفِي.

⁹آمَا إِذَا كَانْهُمْ مَا يْنَجّْمُوشْ يِتْحَكّْمُوا فِي رْوَاحْهُمْ، إِمَّالاَ خَلِّيهُمْ يْعَرّْسُوا. رَاهُو الِّي يْعَرِّسْ خِيرْ مِلِّي يِتْحْرَقْ مِالشَّهْوَة.

¹⁰وْآمَا المْعَرّْسِينْ نْوَصِّيهُمْ، وْرَاهِي وْصِيِّةْ الرَّبْ مُوشْ وْصِيتِي آنَا، بَاشْ المْرَا مَا تْفَارِقْشْ رَاجِلْهَا،

¹¹وْإِذَا فَارْقِتُّو، يِلْزِمْهَا تَبْقَى مَا هِيشْ مْعَرّْسَة وِلاَّ تِتْصَالِحْ مْعَ رَاجِلْهَا، وِالرَّاجِلْ مَا يِلْزْمُوشْ يْطَلِّقْ مَرْتُو.

¹²وِالبْقِيَّة، (نْقُلْهُمْ آنَا مُوشْ الرَّبْ) إِذَا كَانْ وَاحِدْ مِالإِخْوَة عَنْدُو مْرَا مَا هِيشْ مُؤْمْنَة، وْهِيَ تْحِبْ تْعِيشْ مْعَاهْ، مَا يِلْزْمُوشْ يْطَلِّقْهَا.

¹³وْإِذَا كَانْ مْرَا مُؤْمْنَة عِنْدْهَا رَاجِلْ مُوشْ مُؤْمِنْ يْحِبْ يْعِيشْ مْعَاهَا، مَا يِلْزِمْهَاشْ اطَّلْقُوا.

¹⁴رَاهُو الرَّاجِلْ الِّي مُوشْ مُؤْمِنْ مُقَدَّسْ فِي مَرْتُو المُؤْمْنَة، وِالمْرَا الِّي مَا هِيشْ مُؤْمْنَة فِي رَاجِلْهَا المُؤْمِنْ. مَا كَانِشْ وْلاَدْكُمْ بَاشْ يْكُونُوا مَنْزُوسِينْ آمَا رَاهُمْ تَوَّا مُقَدّْسِينْ.

¹⁵وْإِذَا كَانْ الِّي مُوشْ مُؤْمِنْ وِلاَّ الِّي مَا هِيشْ مُؤْمْنَة حَبّوا يْفَارِقُوا خَلِّيهمْ يْفَارِقُوا، فِي الحَالَة هَاذِي الخُو المُؤْمِنْ وِلاَّ الأُخْتْ المُؤْمْنَة مَا هُمْشْ مَرْبُوطِينْ بِالزْوَاجْ، عْلَى خَاطِرْ اللهْ عَيّْطِلْكُمْ بَاشْ تْعِيشُوا فِي سَلاَمْ.

¹⁶كِيفَاشْ تَعْرْفِي يَا مْرَا انِّكْ بَاشْ تْخَلّْصِي رَاجْلِكْ؟ وْكِيفَاشْ تَعْرِفْ يَا رَاجِلْ الِّي إِنْتِ بَاشْ تْخَلِّصْ مَرْتِكْ؟

¹⁷خَلِّي كُلْ وَاحِدْ يْعِيشْ كِيفْ مَا عْطَاهْ رَبِّي وْكِيفْ مَا كَانِتْ حَالْتُو وَقْتِلِّي دْعَاهْ اللهْ، وْهَاذَا هُوَ القَانُونْ الِّي نُفْرْضُو عْلَى الكَنَايِسْ الكُلْ.

¹⁸الِّي يْنَادِيهْ رَبِّي وْهُوَ مْطَهِّرْ، مَا يْحَاوِلْشْ بَاشْ يْخَبِّي الطْهُورْ مْتَاعُو، وِلِّي يْنَادِيهْ رَبِّي وْهُوَ مُوشْ مْطَهِّرْ، مُوشْ لاَزِمْ يِطَّهِّرْ.

¹⁹المْطَهِّرْ مَا عِنْدُوشْ حَتَّى فَايْدَة وِالمُوشْ مْطَهِّرْ كِيفْ كِيفْ، المُهِمْ هُوَ إِنَّا نْحَافْظُوا عْلَى وْصَايَا اللهْ.

²⁰خَلِّي كُلْ وَاحِدْ يَبْقَى فِي الحَالَة الِّي كَانْ عْلِيهَا وَقْتِلِّي نَادَاهْ رَبِّي.

²¹مُوشْ مُهِمْ إِذَا إِنْتِ كُنْتْ عَبْدْ وَقْتِلِّي نَادَاكْ رَبِّي. آمَا إِذَا كَانْ تْنَجِّمْ تْوَلِّي حُرْ اسْتْغَلْ الفُرْصَة.

²²الِّي يْنَادِيهْ الرَّبْ وْهُوَ عَبْدْ يْوَلِّي حُرْ فِي الرَّبْ، وِلِّي يْنَادِيهْ الرَّبْ وْهُوَ حُرْ يْوَلِّي عَبْدْ لِلمَسِيحْ.

²³رَاكُمْ تِشْرِيتُوا بْسُومْ غَالِي، إِمَّالاَ تَوَّا مَا تْكُونُوشْ عَبِيدْ لِلنَّاسْ.

²⁴يَا إِخْوَة، خَلِّي كُلْ وَاحِدْ، يَبْقَى قُدَّامْ اللهْ فِي الحَالَة الِّي نَادَالُو فِيهَا.

²⁵وْآمَا العُزَّابْ رَانِي مَا عِنْدِيشْ لِيهُمْ وْصِيَّة مِنْ عِنْدْ رَبِّي، آمَا رَانِي نَعْطِي رَايِي كِيفْ رَاجِلْ بْرَحْمِةْ اللهْ وَلَّى أَمِينْ،

²⁶آنَا يُظْهُرْلِي الِّي هَاذَا بَاهِي، بِسْبَبْ الظُّرُوفْ الصْعِيبَة الِّي مُوجُودَة تَوَّا، الإِنْسَانْ يَبْقَى فِي الحَالَة الِّي هُوَ فِيهَا خِيرْ.

²⁷إِذَا كَانْ إِنْتِ مْعَرِّسْ بِمْرَا. إِمَّالاَ، مَا تْحَاوِلْشْ بَاشْ تْفَارِقْهَا. إِذَا كَانْ إِنْتِ مَاكِشْ مْعَرِّسْ بِمْرَا؟ إِمَّالاَ، مَا تْحَاوِلْشْ بَاشْ تْعَرِّسْ بِمْرَا،

²⁸آمَا حَتَّى إِذَا كَانْ عَرِّسْتْ رَاكْ مَا عْمَلْتِشْ ذَنْبْ، وْإِذَا كَانْ صْبِيَّة عَرّْسِتْ رَاهِي مَا عَمْلِتْشْ ذَنْبْ. آمَا النَّاسْ الِّي يْعَرّْسُوا يِتْعْبُوا بَرْشَة فِي حْيَاتْهُمْ، وْآنَا نْحِبْ نْمَنَّعْكُمْ مِالحَاجَاتْ هَاذِي.

²⁹آنَا نْقُلْكُمْ، يَا إِخْوَة، رَاهُو الزْمَانْ قْصِيرْ. خَلِّي الِّي عِنْدْهُمْ نْسَاء كَإِنّْهُمْ مَا عِنْدْهُمْشْ نْسَاء،

³⁰الِّي يِبْكِيوْ كَإِنّْهُمْ مَا هُمْشْ يِبْكِيوْ، وِلِّي يَفْرْحُوا كَإِنّْهُمْ مَا هُمْشْ فَرْحَانِينْ، وِلِّي يِشْرِيوْ كَإِنّْهُمْ مَا يِمْلْكُوشْ،

³¹وِلِّي يِسْتَعْمْلُوا فِي العَالَمْ هَاذَا كَإِنّْهُمْ مَا هُمْشْ يِسْتَعْمْلُوا فِيهْ. عْلَى خَاطِرْ العَالَمْ هَاذَا مُوشْ بَاشْ يْدُومْ.

³²آنَا نْحِبّْكُمْ مَا تْكُونِشْ عِنْدْكُمْ هْمُومْ. الِّي مُوشْ مْعَرِّسْ يِتْلْهَى بِالحَاجَاتْ مْتَاعْ الرَّبْ وْكِيفَاشْ يْرَضِّي الرَّبْ،

³³وْآمَا المْعَرِّسْ يِتْلْهَى بِالحَاجَاتْ مْتَاعْ العَالَمْ وْكِيفَاشْ يْرَضِّي مَرْتُو.

³⁴وْهَكَّا تْكُونْ حْيَاتُو مَقْسُومَة. وْزَادَا الصْبِيَّة وِالمْرَا الِّي مَا عِنْدْهَاشْ رَاجِلْ تِتْلْهَى بِالحَاجَاتْ مْتَاعْ الرَّبْ بَاشْ تْكُونْ مُقَدّْسَة فِي بْدَنْهَا وْفِي رُوحْهَا. آمَا المْعَرّْسَة تِتْلْهَى بِالحَاجَاتْ مْتَاعْ العَالَمْ كِيفَاشْ تْرَضِّي رَاجِلْهَا.

³⁵نْقُولِلْكُمْ الشَّيْء هَاذَا لْمَصْلْحِتْكُمْ، مُوشْ بَاشْ نُرْبُطْكُمْ، آمَا بَاشْ تَعْمْلُوا الشَّيْء الِّي لاَزِمْ يْكُونْ وْتِخْدْمُوا الرَّبْ مِنْ غِيرْ مَا تْخَمَمُوا فِي حَتَّى شَيْء.

³⁶إِذَا كَانْ وَاحِدْ يْفَكِّرْ الِّي هُوَ مُوشْ يِتْصَرِّفْ بِالبَاهِي مْعَ خَطِيبْتُو وِالوَقْتْ تْعَدَّى وْكَانْ لاَزِمْ يْعَرّْسُوا خَلِّيهُمْ يْعَرّْسُوا كِيفْ مَا هُو حَبْ. رَاهُو مَا عِنْدُوشْ ذَنْبْ فِي الشَّيْء الِّي بَاشْ يَعْمْلُوا.

³⁷آمَا الِّي يِقْتَنِعْ فِي قَلْبُو مِنْ غِيرْ مَا يْشِكْ، وْمَا كَانِشْ مَلْزُوزْ، آمَا مِتْحَكِّمْ فِي رُوحُو، وْقَرِرْ فِي قَلْبُو بَاشْ يْحَافِظْ عْلَى خَطِيبْتُو رَاهُو أَحْسِنْ مَا يَعْمِلْ.

³⁸إِمَّالاَ الِّي يْعَرِّسْ بْخَطِيبْتُو رَاهُو عْمَلْ حَاجَة بَاهْيَة، وِلِّي مَا يْعَرِّسْشْ خِيرْ.

³⁹المْرَا تُقْعُدْ مَرْبُوطَة بْرَاجِلْهَا مَا دَامُو حَيْ، آمَا إِذَا رَاجِلْهَا مَاتْ عِنْدْهَا الحَقْ تْعَرِّسْ بْأَيْ وَاحِدْ حَبْ يَاخُذْهَا فِي الرَّبْ.

⁴⁰آمَا حَسْبْ رَايِي هِيَ بَاشْ تْكُونْ فَرْحَانَة أَكْثِرْ إِذَا بْقَاتْ فِي الحَالَة الِّي هِيَ فِيهَا، وْيُظْهُرْلِي آنَا زَادَا عِنْدِي رُوحْ اللهْ.