Read Tunisian Arabic New Testament كُورِنْثُوسْ الأَوِلْ 8 Bible Online

كُورِنْثُوسْ الأَوِلْ 8 - Tunisian Arabic New Testament bible

كُورِنْثُوسْ الأَوِلْ 8

¹آمَا فِي مَا يْخُصْ الذْبَايِحْ مْتَاعْ الصْنَبْ، رَانَا نَعْرْفُوا الِّي الكُلْنَا عِنْدْنَا عِلْمْ بِيهَا آمَا رَاهِي المَعْرْفَة تْخَلِّي مُولاَهَا يِتْكَبِّرْ، وِالمْحَبَّة هِيَ الِّي تِبْنِي.

²إِذَا كَانْ وَاحِدْ مَاشِي فِي بَالُو الِّي هُوَ يَعْرِفْ حَاجَة، رَاهُو مَازَالْ مَا يَعْرِفْشْ كِيفَاشْ يِلْزْمُو يَعْرِفْ.

³آمَا إِذَا كَانْ وَاحِدْ يْحِبْ اللهْ، رَاهُو اللهْ بَاشْ يَعْرْفُو.

⁴وْآمَا فِيمَا يْخُصْ مَاكِلْةْ الذْبَايِحْ مْتَاعْ الصْنَبْ، رَانَا نَعْرْفُوا الِّي الصْنَبْ مَا هِيشْ مُوجُودَة بِالحَقْ فِي العَالَمْ، وْإِنُّو لاَ إِلاَهْ إِلاَّ اللهْ وَحْدُو.

⁵حَتَّى كَانْ ثَمَّة آلْهَة فِي السْمَاءْ وِلاَّ فِي الأَرْضْ الِّي النَّاسْ يِتْصَوّْرُوا الِّي هُومَا مُوجُودِينْ وْرَغْمِلِّي ثَمَّة بَرْشَة آلْهَة وْأَرْبَابْ،

⁶آمَا أَحْنَا عِنْدْنَا إِلاَهْ وَاحِدْ الآبْ الِّي جَا مِنُّو كُلْ شَيْء وْإِحْنَا نَرْجْعُولُو، وْرَبْ وَاحِدْ يَسُوعْ المَسِيحْ بِيهْ تُوجِدْ كُلْ شَيْء وْإِحْنَا نِتْوِجْدُوا بِيهْ.

⁷آمَا مُوشْ النَّاسْ الكُلْ يَعْرْفُوا الحْقِيقَة هَاذِي، ثَمَّة شْكُونْ مِنْهُمْ تْعَوّْدُوا عْلَى الصْنَبْ، لِليُومْ مَازَالُوا يْفَكّْرُوا الِّي الذْبَايِحْ الِّي يَاكْلُوا فِيهَا مَذْبُوحَة لِلصْنَبْ، وِيْحِسُّوا الِّي ضَمَايِرْهُمْ الضْعِيفَة تْنَجّْسِتْ،

⁸آمَا رَاهِي المَاكْلَة مَا تْقَرِّبْنَاشْ للهْ، كَانْ نَاكْلُوا مَا نِرْبْحُوا حَتَّى شَيْء وْكَانْ مَا نَاكْلُوشْ مَا نِخْسْرُوا حَتَّى شَيْء.

⁹آمَا رُدُّوا بَالْكُمْ بَاشْ الحُرِّيَّة مْتَاعْكُمْ فِي المَاكْلَة هَاذِي مَا تْوَلِّيشْ سْبَبْ عَثْرَة لِلضْعَافْ.

¹⁰إِذَا كَانْ يْشُوفِكْ وَاحِدْ، يَلِّي حَاسِبْ رُوحِكْ تَعْرِفْ، تَاكُلْ فِي هَيْكِلْ مْتَاعْ صَنْبَة، يَاخِي مُوشْ يِتْشَجَّعْ وْيَاكُلْ مِالذْبَايِحْ مْتَاعْ الصْنَبْ؟

¹¹وِالعِلْمْ مْتَاعِكْ يْكُونْ سْبَبْ فِي هْلاَكْ خُوكْ الضْعِيفْ الِّي المَسِيحْ مَاتْ عْلَى خَاطْرُو.

¹²وْهَكَّا تُغْلْطُوا فِي حَقْ المَسِيحْ وَقْتِلِّي تُغْلْطُوا فِي حَقْ خْوَاتْكُمْ وْتَجْرْحُوا ضَمِيرْهُمْ الضْعِيفْ.

¹³إِذَا كَانِتْ ثَمَّة مَاكْلَة تْخَلِّي خُويَا يِتْعَثِّرْ، إِمَّالاَ مَا نِيشْ بَاشْ نَاكُلْ اللْحَمْ بِالكُلْ بَاشْ مَا نْخَلِّيشْ خُويَا يِتْعَثِّرْ.