Read Tunisian Arabic New Testament كُورِنْثُوسْ الأَوِلْ 9 Bible Online

كُورِنْثُوسْ الأَوِلْ 9 - Tunisian Arabic New Testament bible

كُورِنْثُوسْ الأَوِلْ 9

¹يَاخِي آنَا مُوشْ حُرْ؟ يَاخِي آنَا مُوشْ رَسُولْ؟ يَاخِي مُوشْ شُفْتْ رَبّْنَا يَسُوعْ المَسِيحْ؟ يَاخِي مُوشْ انْتُومَا خِدْمْتِي فِي الرَّبْ؟

²إِذَا مَا كُنْتِشْ رَسُولْ عِنْدْ نَاسْ أُخْرِينْ، رَانِي رَسُولْ عِنْدْكُمْ عْلَى خَاطِرْكُمْ انْتُمْ الطَّابَعْ الِّي يْوَرِّي الِّي آنَا رَسُولْ.

³وْهَاذَا هُوَ الشَّيْء الِّي نْجَاوِبْ بِيهْ النَّاسْ الِّي ضِدِّي:

⁴يَاخِي مَا عِنْدْنَاشْ الحَقْ بَاشْ نَاكْلُوا وْنُشْرْبُوا؟

⁵يَاخِي مَا عِنْدْنَاشْ الحَقْ بَاشْ نَاخْذُوا نْساء كِيفْ مَا عَمْلُوا الرُّسُلْ الأُخْرِينْ وِالإِخْوَة مْتَاعْ الرَّبْ وْبُطْرُسْ؟

⁶وِلاَّ آنَا وْبَرْنَابَا بَرْكْ مَا عِنْدْنَاشْ الحَقْ بَاشْ مَا نِخْدْمُوشْ؟

⁷شْكُونُو الجُنْدِي الِّي يِمْشِي يْحَارِبْ وْيُصْرُفْ عْلَى رُوحُو؟ شْكُونْ الِّي يَزْرَعْ سَانْيَة مْتَاعْ عْنِبْ وْمَا يَاكُلْشْ مِالغَلَّة مْتَاعْهَا؟ وِلاَّ شْكُونُو الرَّاعِي الِّي يَرْعَى غْنَمْ وْمَا يُشْرُبْشْ مِنْ حْلِيبْهَا؟

⁸يَاخِي الكْلاَمْ الِّي نْقُولْ فِيهْ هُوَ كْلاَمْ بَشَرْ؟ يَاخِي مُوشْ الشَّرِيعَة بِيدْهَا تْقُولْ الشَّيْء هَاذَا؟

⁹وْمَكْتُوبْ فِي شَرِيعِةْ مُوسَى: «مَا تْحُطُّشْ كْمَامَة عْلَى فُمْ الثُّورْ وَقْتِلِّي يِدْرِسْ.» زَعْمَة رَبِّي يْهِمُّو فِي الثِّيرَانْ؟

¹⁰يَاخِي مُوشْ يَحْكِي عْلِينَا أَحْنَا بِالذَّاتْ؟ رَاهُو عْلَى خَاطِرْنَا أَحْنَا تِكْتِبْ. الِّي يَحْرِثْ وِلِّي يِدْرِسْ لاَزِمْ يْكُونْ عِنْدْهُمْ أَمَلْ الِّي هُومَا بَاشْ يَاخْذُوا بَايْهُمْ مِالصَّابَة.

¹¹إِذَا زْرَعْنَا فِي وُسْطْكُمْ الحَاجَاتْ الرُّوحِيَّة، يَاخِي خْسَارَة فِينَا بَاشْ نَحْصْدُوا مِالحَاجَاتْ مْتَاعْ الدِّنْيَا الِّي عِنْدْكُمْ؟

¹²وْإِذَا كَانْ نَاسْ أُخْرِينْ عِنْدْهُمْ حَقْ فِي الحَاجَاتْ هَاذِي زَعْمَة مُوشْ أَحْنَا أَوْلَى بِيهَا؟ آمَا أَحْنَا مَا خْذِينَاشْ الحَقْ هَاذَا، وْبِالعَكْسْ تْحَمِّلْنَا كُلْ شَيْء بَاشْ مَا نْحُطُّوشْ حَتَّى حَاجَة تْعَطِّلْ إِنْجِيلْ المَسِيحْ.

¹³يَاخِي مَا تَعْرْفُوشْ إِنُّو الِّي يِخْدْمُوا فِي الهَيْكِلْ يَاكْلُوا مِالقَرَابِينْ مْتَاعْ الهَيْكِلْ، وْإِنُّو الِّي يْقَدّْمُوا الذْبَايِحْ عْلَى المَذْبِحْ يَاخْذُوا بَايْهُمْ مِنْهَا.

¹⁴هَكَّا زَادَا أْمَرْ الرَّبْ: إِنُّو الِّي يْبَشّْرُوا بِالإِنْجِيلْ، يْعِيشُوا مِالإِنْجِيلْ.

¹⁵آمَا آنَا رَانِي مَا خْذِيتِشْ حَتَّى حَقْ مِالحْقُوقْ هَاذِي، وْمَا كْتِبْتِشْ الشَّيْء هَاذَا بَاشْ تِتْعْطَالِي. آنَا نْخَيِّرْ نْمُوتْ عْلَى إِنُّو وَاحِدْ يِحْرِمْنِي مِالفُخْرَة هَاذِي.

¹⁶آنَا مَا نِتْفُوخِرْشْ وَقْتِلِّي نْبَشِّرْ، عْلَى خَاطِرْ التَّبْشِيرْ وَاجِبْ عْلِيَّ، وْيَا وِيلِي إِذَا كَانْ مَا نْبَشِّرْشْ.

¹⁷إِذَا كَانْ اخْتَرْتْ بَاشْ نَعْمِلْ الشَّيْء هَاذَا رَاهُو عِنْدِي أَجْرْ، آمَا إِذَا كَانْ تِجْبَرْتْ رَانِي تِمِّنْتْ عْلَى وْصِيَّة تْفُرْضِتْ عْلِيَّ،

¹⁸شْنُوَّة هُوَ أَجْرِي؟ أَجْرِي هُوَ انِّي نْبَشِّرْ مِنْ غِيرْ مَا نَاخُذْ حَتَّى شَيْء وْمَا نُطْلُبْشْ حَقِّي فِي التَّبْشِيرْ بِالإِنْجِيلْ.

¹⁹آنَا حُرْ مِنْ النَّاسْ الكُلْ، آمَا رَدِّيتْ رُوحِي عَبْدْ لِلنَّاسْ الكُلْ بَاشْ نِرْبِحْ أَكْثِرْ مَا يُمْكِنْ مِنْهُمْ.

²⁰وَلِّيتْ يْهُودِي لِليْهُودْ بَاشْ نِرْبَحْهُمْ، وْوَلِّيتْ مِنْ أَهْلْ الشَّرِيعَة لأَهْلْ الشَّرِيعَة - رَغْمِلِّي آنَا مَا نِيشْ تَحْتْ الشَّرِيعَة - بَاشْ نِرْبِحْ النَّاسْ الِّي تَحْتْ الشَّرِيعَة،

²¹وْوَلِّيتْ مَا عِنْدِيشْ شَرِيعَةْ لِلنَّاسْ الِّي مَا عِنْدْهُمْشْ شَرِيعَةْ - وْهَاذَا مَا يِعْنِيشْ الِّي آنَا مَا نْطِيعِشْ شَرِيعِةْ اللهْ عْلَى خَاطِرْنِي تَحْتْ شَرِيعِةْ المَسِيحْ - بَاشْ نِرْبِحْ الِّي مَا عِنْدْهُمْشْ شَرِيعَةْ،

²²وَلِّيتْ ضْعِيفْ لِلضْعَافْ بَاشْ نِرْبَحْهُمْ، وَلِّيتْ كُلْ شَيْء لِلنَّاسْ الكُلْ بَاشْ نْمَنَّعْ شْوَيَّة مِنْهُمْ بِالطُّرُقْ الكُلْ.

²³نَعْمِلْ الشَّيْء هَاذَا الكُلُّو عْلَى خَاطِرْ البْشَارَة بِالإِنْجِيلْ بَاشْ نْشَارِكْ فِي الخِيرَاتْ مْتَاعُو.

²⁴يَاخِي مَا تَعْرْفُوشْ إِنُّو الِّي يِتْسَابْقُوا فِي المَلْعَبْ الكُلْهُمْ يِجْرِيوْ، آمَا وَاحِدْ بَرْكْ يَاخُذْ الجَايْزَة؟ إِنْتُومَا زَادَا إِجْرِيوْ كِيفُو بَاشْ تِرْبْحُوا.

²⁵المِتْسَابْقِينْ الكُلْهُمْ يْدَرّْبُوا رْوَاحْهُمْ تَدْرِيبْ صْعِيبْ بَاشْ يَاخْذُوا تَاجْ يِفْنَى، آمَا أَحْنَا رَانَا نِجْرِيوْ بَاشْ نِرْبْحُوا تَاجْ مَا يَفْنَاشْ بِالكُلْ.

²⁶هَاذَاكَا عْلاَشْ آنَا نِجْرِي وْعِنْدِي هَدَفْ. نَضْرِبْ وْعَارِفْ شْنُوَّة الحَاجَة الِّي قَاعِدْ نَضْرِبْ فِيهَا،

²⁷آمَا نِتْحَكِّمْ فِي بَدْنِي وِنْرُدُّو كِيفْ العَبْدْ بَاشْ مَا نَطْلِعْشْ خَاسِرْ بَعْدْ مَا بَشِّرْتْ غِيرِي.