Read Tunisian Arabic New Testament كُورِنْثُوسْ الثَّانِيْ 1 Bible Online

كُورِنْثُوسْ الثَّانِيْ 1 - Tunisian Arabic New Testament bible

كُورِنْثُوسْ الثَّانِيْ 1

¹مِنْ بُولُسْ رَسُولْ المَسِيحْ يَسُوعْ بْإِرَادِةْ اللهْ، وْمِنْ الأَخْ تِيمُوثَاوُسْ، لْكَنِيسِةْ اللهْ فِي كُورِنْثُوسْ، وِالمُؤْمْنِينْ الكُلْ الِّي فِي أَخَائِيَة.

²السَّلاَمْ وِالنِّعْمَة لِيكُمْ مِنْ عِنْدْ اللهْ بُونَا وْمِنْ عِنْدْ الرَّبْ يَسُوعْ المَسِيحْ.

³مُبَارَكْ اللهْ بُو رَبّْنَا يَسُوعْ المَسِيحْ، البُو الرَّحِيمْ وِالإِلاَهْ مْتَاعْ كُلْ تَعْزْيَة،

⁴هُوَ الِّي يْعَزِّينَا فِي وْقَاتْنَا الصْعِيبَة الكُلْهَا بَاشْ انَّجّْمُوا نْعَزِّيوْ غِيرْنَا فِي وْقَاتْهُمْ الصْعِيبَة الكُلْهَا بِالتَّعْزْيَة الِّي نَاخْذُوهَا مِنْ عِنْدْ اللهْ.

⁵بْقَدْرْ مَا نِتْعَذّْبُوا أَكْثِرْ عْلَى خَاطِرْ المَسِيحْ، بْقَدْرْ مَا نِتْعَزَّاوْ أَكْثِرْ بِالمَسِيحْ زَادَا.

⁶إِذَا كَانْ أَحْنَا فِي وَقْتْ صْعِيبْ رَاهُو بَاشْ إِنْتُومَا تِتْعَزَّاوْ وْتُخْلْصُوا، وْإِذَا كَانْ أَحْنَا تْعَزِّينَا رَاهُو بَاشْ إِنْتُومَا تِتْعَزَّاوْ بَاشْ تْنَجّْمُوا تِتْحَمّْلُوا العْذَابْ الِّي أَحْنَا قَاعْدِينْ نِتْحَمّْلُوا فِيهْ تَوَّا.

⁷وْعَنْدْنَا رَجَاءْ فِيكُمْ عْلَى خَاطِرْنَا نَعْرْفُوا الِّي إِنْتُومَا شَارِكْتُونَا فِي العْذَابْ وْزَادَا بَاشْ تِتْعَزَّاوْ مْعَانَا.

⁸يَا إِخْوَة، نْحِبُّوكُمْ تَعْرْفُوا الِّي الأَوْقَاتْ الصْعِيبَة الِّي تْعَدَّاتْ عْلِينَا فِي أَسِيَّة، كَانِتْ قْوِيَّة بَرْشَة وْأَكْثِرْ مِنْ طَاقِتْنَا حَتَّى لِينْ يْإِسْنَا مِالحَيَاةْ،

⁹آمَا حَسِّينَا الِّي أَحْنَا مَحْكُومْ عْلِينَا بِالمُوتْ، بَاشْ مَا نْعَمّْلُوشْ عْلَى رْوَاحْنَا، آمَا نْعَمّْلُوا عْلَى اللهْ الِّي يْقَيِّمْ المُوتَى.

¹⁰هُوَ الِّي مَنَّعْنَا مِالمُوتْ هَاذَا وْبِشْ يْمَنَّعْنَا مِنُّو فِي المُسْتَقْبِلْ. إِي نْعَمْ، عِنْدْنَا رجَاءْ فِيهْ الِّي هُوَ بَاشْ يْمَنَّعْنَا مَرَّة أُخْرَى.

¹¹وْإِنْتُومَا بَاشْ تْعَاوْنُونَا بْصَلَوَاتْكُمْ، وْإِذَا اللهْ بَارِكْنَا عْلَى خَاطِرْ صَلَوَاتْ بَرْشَة نَاسْ، رَاهُو بَرْشَة نَاسْ بَاشْ يِحْمْدُوا رَبِّي عْلَى خَاطِرْنَا.

¹²وِالشَّيْء الِّي نِتْفُوخْرُوا بِيهْ هُوَ شْهَادِةْ ضَمِيرْنَا. يِشْهْدِلْنَا الِّي سِيرِتْنَا فِي العَالَمْ هَاذَا، وْبِالأَخَصْ بِينَاتْكُمْ، مَعْرُوفَة بِالصِّدْقْ وِالصَّرَاحَة مُوشْ بْحِكْمِةْ البَشَرْ، آمَا بْنِعْمِةْ اللهْ.

¹³وْإِحْنَا مَا نِكْتْبُولْكُمْ كَانْ الشَّيْء الِّي تَقْرَاوْهْ وِلِّي تِفْهْمُوهْ، وْنِتْمَنَّى الِّي إِنْتُومَا تْكَمّْلُوا تِفْهْمُوا الشَّيْء

¹⁴الِّي إِنْتُومَا مَا كُمْشْ فَاهْمِينُو الكُلْ، الِّي أَحْنَا بَاشْ نِتْفُوخْرُوا بِيكُمْ وْإِنْتُومَا بَاشْ تِتْفُوخْرُوا بِينَا فِي يُومْ رَبّْنَا يَسُوعْ المَسِيحْ.

¹⁵وْكُنْتْ وَاثِقْ مِالشَّيْء هَاذَا هَاذَاكَا عْلاَشْ قَرِرْتْ بَاشْ نْجِيكُمْ بَاشْ تِتْبَارْكُوا مَرّْتِينْ،

¹⁶وْنِتْعَدَّى عْلِيكُمْ وْآنَا فِي طْرِيقِي لْمَقْدُونِيَّة، وِمْبَاعِدْ نَرْجْعِلْكُمْ مِنْ مَقْدُونِيَّة بَاشْ تْعَاوْنُونِي عْلَى السْفَرْ لِليَهُودِيَّة.

¹⁷يَاخِي آنَا خْذِيتْ القَرَارْ هَاذَا مِنْ غِيرْ مَا نْخَمِّمْ وِلاَّ قَاعِدْ نِتْصَرِّفْ كِالنَّاسْ العَادِيِّينْ، وِنْقُولْ إِيهْ وْلاَ فِي نَفْسْ الوَقْتْ؟

¹⁸وِالله صَادِقْ وْيِشْهِدْ الِّي كْلاَمْنَا لِيكُمْ مَا كَانِشْ إِيهْ وْلاَ

¹⁹عْلَى خَاطِرْ يَسُوعْ المَسِيحْ إِبْنْ اللهْ الِّي بَشِّرْنَاكُمْ بِيهْ، آنَا وْسِلْوَانُسْ وْتِيمُوثَاوُسْ، مَا كَانِشْ إِيهْ وْلاَ، آمَا دِيمَا إِيهْ.

²⁰هُوَ «الإِيهْ» لْوُعُودْ اللهْ الكُلْهَا. هَاذَاكَا عْلاَشْ نْقُولُوا آمِينْ بِالمَسِيحْ عْلَى خَاطِرْ مَجْدْ اللهْ.

²¹آمَا اللهْ هُوَ الِّي ثَبِّتْنَا مْعَاكُمْ فِي المَسِيحْ، وْهُوَ الِّي مْسَحْنَا

²²وْهُوَ زَادَا طْبَعْنَا بِالخَاتَمْ مْتَاعُو وِعْطَانَا الرُّوحْ مْتَاعُو كِيفْ الْعُربُونْ فِي قْلُوبْنَا.

²³وْيِشْهِدْ عْلِيَّ رَبِّي الِّي بَطِّلْتْ الجَّيَّانْ لْكُورِنْثُوسْ بَاشْ مَا نْعَذِّبْكُمْشْ،

²⁴وْإِحْنَا مَا نْحِبُّوشْ نْسَيْطْرُوا عْلَى إِيمَانْكُمْ، آمَا نِخْدْمُوا مْعَاكُمْ بَاشْ نْفرّْحُوكُمْ، عْلَى خَاطِرْكُمْ قْوِيِّينْ فِي الإِيمَانْ.