Read Tunisian Arabic New Testament كُورِنْثُوسْ الثَّانِيْ 10 Bible Online

كُورِنْثُوسْ الثَّانِيْ 10 - Tunisian Arabic New Testament bible

كُورِنْثُوسْ الثَّانِيْ 10

¹آنَا بُولُسْ نُطْلُبْ مِنْكُمْ بِالتَّوَاضُعْ مْتَاعْ المَسِيحْ وْلُطْفُو، آنَا الِّي مِتْوَاضَعْ كِنِبْدَا مْعَاكُمْ وْجَرِيءْ كِنِبْدَا بْعِيدْ عْلِيكُمْ،

²نِتْمَنَّى إِنّْكُمْ مَا تْلِزُّونِيشْ بَاشْ نْكُونْ صْعِيبْ وَقْتِلِّي نِبْدَا مْعَاكُمْ وْمَاذَا بِيَّ نْكُونْ مْعَ النَّاسْ الِّي يْخَمَمُوا الِّي أَحْنَا نْوَرِّيوْ فِي رْوَاحْنَا قُدَّامْ النَّاسْ.

³صْحِيحْ، أَحْنَا نْعِيشُوا فِي البْدَنْ، آمَا مَا نْجَاهْدُوشْ الجِهَادْ مْتَاعْ النَّاسْ الِّي فِي الدِّنْيَا هَاذِي.

⁴السْلاَحْ الِّي نْجَاهْدُوا بِيهْ مُوشْ مِالدِّنْيَا هَاذِي آمَا رَاهُو مِنْ عِنْدْ اللهْ وْقَادِرْ بَاشْ يْهَدِّمْ أَسْوَارْ

⁵وْكُلْ حَاجَة مِتْكَبّْرَة تْجِي ضِدْ مَعْرِفْةْ اللهْ، وْنَرْبْطُوا كُلْ فِكْرْ وِنْخَلِّيوْهْ يْطِيعْ المَسِيحْ.

⁶وْإِحْنَا مُسْتْعَدِّينْ بَاشْ نْنْتَقْمُو مِنْ كُلْ مَعْصْيَة وَقْتْ الطَّاعَة مْتَاعْكُمْ تْوَلِّي كَامْلَة.

⁷أُخْزْرُوا لِلحَاجَاتْ كِيفْ مَا هِيَ. إِذَا كَانْ وَاحِدْ مْشَى فِي بَالُو الِّي هُوَ تَابِعْ لِلمَسِيحْ، خَلِّيهْ يِتْذَكِّرْ الِّي أَحْنَا زَادَا تَابْعِينْ لِلمَسِيحْ كِيفُو.

⁸وْآنَا مَا نِحْشِمْشْ حَتَّى إِذَا كَانْ كَثِّرْتْ مِالفُخْرَة بِالسُّلْطَة الِّي عِنْدْنَا فِي المَسِيحْ وِلِّي نِسْتَعْمْلُوا فِيهَا بَاشْ نِبْنِيوْكُمْ مُوشْ بَاشْ نْطَيّْحُوكُمْ.

⁹مَا نْحِبِّشْ نُظْهُرْ الِّي آنَا نْحَاوِلْ نْخَوِّفْكُمْ بِجْوَابَاتِي.

¹⁰وْثَمَّة شْكُونْ مِنْكُمْ يْقُولْ: «جْوَابَاتْ بُولُسْ قْوِيَّة وِتْخَوِّفْ، آمَا وَقْتِلِّي يْجِي بِيدُو رَاهُو ضْعِيفْ وِكْلاَمُو فَارِغْ.»

¹¹خَلِّيهْ يَعْرِفْ الِّي يْقُولْ فِي الكْلاَمْ هَاذَا الِّي الشَّيْء الِّي نِكْتْبُوهْ فِي جْوَابَاتْنَا وْإِحْنَا غَايْبِينْ هُوَ بِيدُو الِّي نَعْمْلُوهْ وَقْتِلِّي الِّي نْكُونُوا حَاضْرِينْ.

¹²أَحْنَا مَا انَّجّْمُوشْ نْشَبّْهُوا رْوَاحْنَا بِلِّي يُشْكْرُوا فِي رْوَاحْهُمْ وِلاَّ نْحُطُّوا رْوَاحْنَا كِيفْهُمْ، قَدَّاشْهُمْ مَا عِنْدْهُمْشْ عْقَلْ! يْقِيسُوا فِي رْوَاحْهُمْ بِرْوَاحْهُمْ وْيُحْكْمُوا عْلَى رْوَاحْهُمْ بِيدِيهُمْ.

¹³آمَا أَحْنَا، رَانَا مَا نِتْفُوخْرُوشْ بْحَاجَاتْ مَا عْمَلْنَاهَاشْ، آمَا رَانَا نَاقْفُوا فِي الحَدْ الِّي حَطّْهُولْنَا اللهْ بَاشْ نُوصْلُولْكُمْ بِيهْ.

¹⁴وْإِحْنَا مَا نِدَّعِيوْشْ حَاجَاتْ مَا هِيشْ مْتَاعْنَا، كَإِنَّا مَا وْصُلْنَاشْ لِيكُمْ، عْلَى خَاطِرْنَا أَحْنَا بِالحَقْ وْصُلْنَالْكُمْ وِمْعَانَا إِنْجِيلْ المَسِيحْ.

¹⁵وْمَا نْفُوتُوشْ الحَدْ هَاذَاكَا وْنِتْفُوخْرُوا بِالخِدْمَة مْتَاعْ غِيرْنَا، آمَا عِنْدْنَا رَجَاءْ إِنُّو إِيمَانْكُمْ يِكْبِرْ وْخِدْمِتْنَا فِي وُسْطْكُمْ تْزِيدْ فِي الحَدْ الِّي حَطْهُولْنَا اللهْ،

¹⁶بَاشْ نْبَشّْرُوا بِالإِنْجِيلْ فِي بْلاَدْ أَبْعِدْ مِنْ بْلاَدْكُمْ، بَاشْ مَا نِتْفُوخْرُوشْ بِالشَّيْء الِّي عَمْلُو غِيرْنَا فِي خِدْمْتُو.

¹⁷وِالكْتَابْ المُقَدَّسْ يْقُولْ: «الِّي يِتْفُوخِرْ، خَلِّيهْ يِتْفُوخِرْ بِالرَّبْ»

¹⁸عْلَى خَاطِرْ الِّي يُشْكْرُو الرَّبْ هُوَ المَقْبُولْ، مُوشْ الِّي يُشْكُرْ رُوحُو.