Read Tunisian Arabic New Testament كُورِنْثُوسْ الثَّانِيْ 11 Bible Online

كُورِنْثُوسْ الثَّانِيْ 11 - Tunisian Arabic New Testament bible

كُورِنْثُوسْ الثَّانِيْ 11

¹يَا لِيتْكُمْ تِتْحَمّْلُونِي، حَتَّى إِذَا نِتْصَرِّفْ مِنْ غِيرْ عْقَلْ. إِي نْعَمْ، اتْحَمّْلُونِي!

²آنَا نْغِيرْ عْلِيكُمْ وِالغِيرَة هَاذِي مِنْ عِنْدْ اللهْ عْلَى خَاطِرْنِي خْطَبْتْكُمْ لْرَاجِلْ وَاحِدْ الِّي هُوَ المَسِيحْ، نْقَدِّمْكُمْ لِيهْ كِيفْ صْبِيَّة طَاهْرَة.

³آنَا خَايِفْ لَعْقُولاَتْكُمْ تِبْعِدْ عْلَى الصِّدْقْ وِالطَّاعَة لْيَسُوعْ المَسِيحْ كِيفْ مَا حَوَّا تْخَدْعِتْ بِالخُبْثْ مْتَاعْ اللَّفْعَى.

⁴لُو كَانْ جَاكُمْ وَاحِدْ يْبَشِّرْ بْيَسُوعْ آخَرْ غِيرْ الِّي بَشِّرْنَاكُمْ بِيهْ، وِلاَّ يْجِيبِلْكُمْ رُوحْ غِيرْ الِّي خْذِيتُوهْ، وْإِنْجِيلْ غِيرْ الِّي جَاكُمْ. رَاكُمْ تْحَمِّلْتُوهْ بِالقْدَا.

⁵وْمَا نِتْصَوِّرْشْ رُوحِي أَقَلْ قِيمَة «مِالرُّسُلْ الكْبَارْ هَاذُوكُمْ!»

⁶إِذَا كُنْتْ نَاقِصْ فِي الكْلاَمْ، رَانِي مَا نِيشْ نَاقِصْ فِي المَعْرْفَة. وِالشَّيْء هَاذَا ظَهِّرْنَاهُولْكُمْ فِي كُلْ شَيْء.

⁷يَاخِي آنَا عْمَلْتْ ذَنْبْ كِطَيِّحْتْ مِنْ رُوحِي بَاشْ إِنْتُومَا تْكُونْ عِنْدْكُمْ قِيمَة وْبَشِّرْتْكُمْ بْإِنْجِيلْ اللهْ مِنْ غِيرْ مُقَابِلْ؟

⁸حْرِمْتْ كَنَايِسْ أُخْرِينْ وِخْذِيتْ مِنْ عِنْدْهُمْ بَاشْ نِخْدِمْكُمْ إِنْتُومَا

⁹وْمَا ثَقِّلْتِشْ عْلَى حَتَّى وَاحِدْ مِنْكُمْ وَقْتِلِّي كُنْتْ مِحْتَاجْ وْآنَا مَا بِينَاتْكُمْ، وِالإِخْوَة الِّي جَاوْ مِنْ مَقْدُونِيَّة عْطَاوْنِي الِّي نِحْتَاجُو. وْهَكَّا شَدِّيتْ صْحِيحْ بَاشْ مَا نْثَقِّلْشْ عْلِيكُمْ فِي حَتَّى شَيْء وْبِشْ نْزِيدْ نْشِدْ صْحِيحْ أَكْثِرْ.

¹⁰وْكِيفْ ما حَقْ المَسِيحْ فِيَّ، حَتَّى حَدْ مَا يْنَحِّيلِي فُخْرْتِي فِي بْلاَدْ أَخَائِيَة.

¹¹عْلاَشْ؟ زَعْمَة عْلَى خَاطِرْ مَا نْحِبْكُمْشْ؟ رَبِّي يِعْلِمْ قَدَّاشْ آنَا نْحِبّْكُمْ.

¹²وِلِّي نَعْمِلْ فِيهْ تَوَّا بَاشْ نْزِيدْ نَعْمْلُو بَاشْ نْوَقِّفْ النَّاسْ الِّي يْلَوّْجُوا عْلَى فُرْصَة بَاشْ يِتْفُوخْرُوا الِّي هُومَا يَعْمْلُوا فِي حَاجَاتْ كِيفْ الِّي نَعْمْلُوا فِيهَا أَحْنَا.

¹³هُومَا رُسُلْ كَذَّابِينْ وْخُدَّامْ خَدَّاعِينْ يْوَرِّيوْ لِلنَّاسْ الِّي هُومَا زَادَا رُسُلْ المَسِيحْ.

¹⁴وْمَا يْجِيكِشْ عْجَبْ، رَاهُو الشِّيطَانْ بِيدُو يُظْهُرْ بْمَظْهِرْ مَلاَكْ نُورْ،

¹⁵مُوشْ غْرِيبْ إِنُّو الخُدَّامْ مْتَاعُو يُظْهْرُوا بْمَظْهِرْ الخُدَّامْ الأَبْرَارْ. هَاذُوكُمْ آخْرِتْهُمْ بَاشْ تْكُونْ عْلَى قَدْ عْمَايِلْهُمْ.

¹⁶نْعَاوِدْ الِّي قُلْتُو: حَتَّى وَاحِدْ مَا يِمْشِي فِي بَالُو الِّي آنَا مَا عِنْدِيشْ عْقَلْ، مَا كَانِشْ اقْبْلُونِي كِيفْ وَاحِدْ مَا عِنْدُوشْ عْقَلْ بَاشْ نَلْقَى حَاجَة نِتْفُوخِرْ بِيهَا.

¹⁷وِالكْلاَمْ الِّي نْقُولْ فِيهْ تَوَّا مُوشْ مِنْ عِنْدْ الرَّبْ، آمَا نْقُولُو كِيفْ وَاحِدْ مَا عِنْدُوشْ عْقَلْ وْعِنْدُو الجُرْأَة بَاشْ يِتْفُوخِرْ.

¹⁸مَا دَامْهُمْ بَرْشَة مِنْكُمْ يِتْفُوخْرُوا بْحَاجَاتْ مْتَاعْ الدِّنْيَا، آنَا زَادَا بَاشْ نِتْفُوخِرْ.

¹⁹وْإِنْتُومَا العَاقْلِينْ تِتْحَمّْلُوا الِّي مَا عِنْدُوشْ عْقَلْ وْإِنْتُومَا فَرْحَانِينْ.

²⁰إِي نْعَمْ، تِتْحَمّْلُوا الِّي يِسْتَعْبِدْكُمْ وِلِّي يِسْتْغَلّْكُمْ وْيِسْلِبْكُمْ وْيِتْكَبِّرْ عْلِيكُمْ وْيَضْرِبْكُمْ بِالكَفْ.

²¹شَيْء يْحَشِّمْ! يُظْهُرْلِي مَا كُنَّاشْ قْوِيِّينْ فِي الشَّيْء هَاذَا. الِّي هُومَا يِتْفُوخْرُوا بِيهْ (وِكْلاَمِي كْلاَمْ وَاحِدْ جَاهِلْ) آنَا زَادَا نِتْفُوخِرْ بِيهْ.

²²إِذَا كَانْهُمْ هُومَا عِبْرَانِيِّينْ آنَا زَادَا عِبْرَاني، وِلاَّ إِسْرَائِيلِيِّينْ آنَا زَادَا إِسْرَائِيلِي، وِلاَّ مِنْ وْلاَدْ إِبْرَاهِيمْ آنَا زَادْ مِنْ وْلاَدْ إِبْرَاهِيمْ.

²³وْإِذَا كَانُوا خُدَّامْ المَسِيحْ (وِنْقُولْ الشَّيْء هَاذَا كِيفْ وَاحِدْ جَاهِلْ) رَانِي نْفُوتْهُمْ: فِي الجِهَادْ جَاهِدْتْ أَكْثِرْ مِنْهُمْ، فِي الدْخُولْ لِلحَبْسْ عَانِيتْ أَكْثِرْ مِنْهُمْ، فِي الضَّرْبْ تْحَمِّلْتُو أَكْثِرْ مِنْهُمْ ابَّرْشَة وِتْعَرِّضْتْ لِلمُوتْ بَرْشَة مَرَّاتْ،

²⁴وْضَرْبُونِي اليْهُودْ بِالسُّوطْ خَمْسَة مَرَّاتْ فِي كُلْ مَرَّة مِنْهُمْ تِسْعَة وِثْلاَثِينْ مَرَّة.

²⁵وْضَرْبُونِي الرُّومَانْ بِالعْصَا ثْلاَثَة مَرَّاتْ، وِالنَّاسْ رَجْمُونِي مَرَّة، وِتْكَسّْرِتْ بِيَّا السْفِينَة ثْلاَثَة مَرَّاتْ، وْعَدِّيتْ نْهَارْ وْلِيلَة فِي قَلْبْ البْحَرْ.

²⁶وْفِي السَّفْرَاتْ الِّي عْمَلْتْهُمْ تْعَرِّضْتْ لِلخْطَرْ مْتَاعْ الوِدْيَانْ وِالسُّرَّاقْ، وِالخْطَرْ مْتَاعْ اليْهُودْ وِلِّي مَاهُمْشْ يْهُودْ، وِالأَخْطَارْ فِي المُدُنْ، وْأَخْطَارْ فِي الخْلاَء، وْأَخْطَارْ فِي البْحَرْ، وْأَخْطَارْ مِالإِخْوَة الكَذَّابِينْ.

²⁷عَانِيتْ مِالخِدْمَة وِالتْعَبْ وِالسْهَرْ دِيمَا، وِالجُّوعْ وِالعْطَشْ وِالصُّومَانْ دِيمَا وِالبَرْدْ وِالعْرَى.

²⁸وْهَاذَا الكُلْ مْعَ الِّي نْعَانِي فِيهْ كُلْ يُومْ مِاللَّهْوَة بِالكَنَايِسْ الكُلْ.

²⁹شْكُونْ الِّي يُضُعُفْ وْآنَا مَا نُضْعُفْشْ مْعَاهْ، وِشْكُونْ الِّي يَعْثِرْ وْمَا نِحْزِنْشْ عْلِيهْ بَرْشَة.

³⁰لُوكَانْ بَاشْ نِتْفُوخِرْ رَانِي نِتْفُوخِرْ بْضَعْفِي.

³¹وِالله بُو رَبّْنَا يَسُوعْ المُبَارَكْ لِلأَبَدْ يَعْرِفْ الِّي آنَا مَا نِكْذِبْشْ،

³²وْإِنُّو الوَالِي مْتَاعْ المَلِكْ الحَارِثْ فِي دِمَشْقْ أْمَرْ بَاشْ يْعِسُّوا عْلَى المْدِينَة بَاشْ يْنَجّْمُوا يْشِدُّونِي.

³³آمَا الإِخْوَة حَطُّونِي فِي قُفَّة كْبِيرَة وْهَبّْطُونِي عْلَى الشِّبَّاكْ مِنْ شِيرِةْ السُّورْ، وِمْنَعْتْ مِنُّو.