Read Tunisian Arabic New Testament كُورِنْثُوسْ الثَّانِيْ 12 Bible Online

كُورِنْثُوسْ الثَّانِيْ 12 - Tunisian Arabic New Testament bible

كُورِنْثُوسْ الثَّانِيْ 12

¹وْإِذَا كَانْ نْحِبْ نِتْفُوخِرْ - بِالرَّغْمْ الِّي مَا يْوَاتِينِيشْ - انَّجِّمْ نَحْكِي عْلَى الرُّؤْيَاتْ الِّي مِنْ عِنْدْ رَبِّي وِالحَاجَاتْ الِّي كْشِفْهَالِي.

²نَعْرِفْ رَاجِلْ مُؤْمِنْ بِالمَسِيحْ تِخْطَفْ لِلسْمَاء الثَّالْثَة قْبَلْ أَرْبَعْطَاشِنْ سْنَة. (يَاخِي تِخْطَفْ ابَّدْنُو؟ مَا نَعْرِفْشْ. وِلاَّ بْلاَشْ بْدَنْ؟ مَا نَعْرِفْشْ. اللهْ أَعْلَمْ.)

³آمَا نَعْرِفْ الِّي هُوَ تِخْطَفْ لِلجَنَّة (ابَّدْنُو وِلاَّ مِنْ غِيرْ بْدَنْ؟ مَا نَعْرِفْشْ. اللهْ أَعْلَمْ.)

⁴نَعْرِفْ الِّي هُوَ تِخْطَفْ لِلفِرْدَوْسْ وْغَادِيكَا سْمَعْ كْلاَمْ مَا يْنَجِّمْشْ البَشَرْ يَنْطِقْ بِيهْ وْحَتَّى حَدْ مَا عَنْدُو الحَقْ يُذْكُرْ الكْلاَمْ هَاذَاكَا.

⁵الرَّاجِلْ هَاذَا نِتْفُوخِرْ بِيهْ، آمَا آنَا مَا نِتْفُوخِرْ كَانْ بِضَعَفَاتِي.

⁶وْكَانْ حَبِّيتْ نِتْفُوخِرْ رَانِي مَا كُنْتِشْ جَاهِلْ، عْلَى خَاطِرْ نْقُولْ فِي الحَقْ. آمَا مَا نِتْفُوخِرْشْ بَاشْ حَتَّى حَدْ مَا يْفَكِّرْ الِّي آنَا أَكْبِرْ مِالحَالَة الِّي آنَا عْلِيهَا وِلاَّ آشْ يِسْمْعُوا مِنِّي.

⁷وْبَاشْ مَا نِتْكَبِّرْشْ عْلَى خَاطِرْ الإِعْلاَنَاتْ الكْبِيرَة هَاذِي، دُخْلِتْلِي شُوكَة فِي بَدْنِي كَإِنّْهَا رَسُولْ مِنْ عِنْدْ الشِّيطَانْ بَاشْ يِضْرِبْنِي.

⁸وِطْلَبْتْ مِنْ رَبِّي ثْلاَثَة مَرَّاتْ بَاشْ يْنَحِّيهَا مِنِّي،

⁹يَاخِي قَلِّي: «نِعْمْتِي تِكْفِيكْ. قُوتِي تِكْمِلْ فِي الضُّعْفْ.» إِمَّالاَ آنَا نِتْفُوخِرْ وْنَفْرَحْ بْضَعْفِي بَاشْ قُوِّةْ المَسِيحْ تِحْمِينِي.

¹⁰وْهَكَّا آنَا نَرْضَى بَاشْ نِتْحَمِّلْ الضَّعْفْ وِالإِهَانَة وِالضِّيقْ وِالإِضْطِهَادْ وِالتْعَبْ فِي سَبِيلْ المَسِيحْ، عْلَى خَاطِرْنِي كِنِبْدَا ضْعِيفْ وَقْتْهَا نْكُونْ قْوِي.

¹¹هَانِي وَلِّيتْ جَاهِلْ، وْإِنْتُومَا لَزِّيتُونِي بَاشْ نْكُونْ هَكَّا. كَانْ يِلْزِمْكُمْ تِكْرْمُونِي، وْمَا نِيشْ أَقَلْ «مِالرُّسُلْ الكْبَارْ هَاذُمْ»، حَتَّى لُوكَانْ مَا نِسْوَى شَيْء.

¹²وِالعَلاَمَاتْ عْلَى انِّي آنَا رَسُولْ ظُهْرِتْ مَا بِينَاتْكُمْ بِالصَّبْرْ: مُعْجْزَاتْ وِعْجَايِبْ وْحَاجَاتْ غْرِيبَة.

¹³شْنُوَّة نَاقِصْكُمْ عْلَى الكَنَايِسْ الأُخْرِينْ غِيرْ انِّي مَا نْثَقِّلْشْ عْلِيكُمْ فِي حَتَّى شَيْء. إِمَّالاَ سَامْحُونِي عْلَى الغَلْطَة هَاذِي!

¹⁴آنَا مُسْتْعَدْ بَاشْ نْجِيكُمْ مَرَّة ثَالْثَة، وْمَانِيشْ بَاشْ نْثَقِّلْ عْلِيكُمْ عْلَى خَاطِرْنِي مَا حَاجْتِيشْ بِالحَاجَاتْ الِّي عِنْدْكُمْ آمَا حَاجْتِي بِيكُمْ إِنْتُومَا. مُوشْ الوْلاَدْ هُومَا الِّي يِلْزِمْهُمْ يْخَبِّيوْ الفْلُوسْ لْوَالْدِيهُمْ، آمَا الوَالْدِينْ هُومَا الِّي يْخَبِّيوْ لِوْلاَدْهُمْ.

¹⁵وْآنَا نُصْرُفْ كُلْ مَا عِنْدِي وْآنَا فَرْحَانْ، وْحَتَّى نْمُوتْ عْلَى خَاطِرْكُمْ، يَاخِي كِآنَا نْحِبّْكُمْ بَرْشَة، إِنْتُومَا تْحِبُّونِي شْوَيَّة؟

¹⁶إِي نْعَمْ، آنَا مَا ثَقِّلْتِشْ عْلِيكُمْ فِي حَتَّى شَيْء، آمَا ثَمَّة شْكُونْ يْقُولْ الِّي آنَا مِتْحَيِّلْ وِسْلِبْتْكُمْ؟

¹⁷يَاخِي خْذِيتْ مِنْ عِنْدْكُمْ حَاجَة عْلَى يْدِينْ الِّي بْعَثْتْهُمْلْكُمْ؟

¹⁸وَقْتِلِّي شَدِّيتْ صْحِيحْ فِي تِيطُسْ بَاشْ يِمْشِيلْكُمْ وِبْعَثْتْ مْعَاهْ الأَخْ الآخَرْ، يَاخِي تِيطُسْ خْذَا مِنْ عِنْدْكُمْ حَاجَة؟ مَا خْدِمْنَاشْ بْنَفْسْ الرُّوحْ؟ مَا مْشِينَاشْ فِي الطْرِيقْ هُوَ بِيدُو؟

¹⁹عِنْدْكُمْ مُدَّة طْوِيلَة وْإِنْتُومَا مَاشِي فِي بَالْكُمْ الِّي أَحْنَا نْدَافْعُوا عْلَى رْوَاحْنَا بَرْشَة قُدَّامْكُمْ. أَحْنَا نِتْكَلّْمُوا قُدَّامْ اللهْ فِي المَسِيحْ، هَاذَا الكُلْ يَا الأحْبَابْ بَاشْ نِبْنِيوْكُمْ.

²⁰وْآنَا خَايِفْ، إِذَا جِيتْكُمْ، نَلْقَاكُمْ فِي حَالَة مَا نْحِبّْهَاشْ، وْتَلْقَاوْنِي فِي حَالَة مَا تْحِبُّوهَاشْ. نْخَافْ لاَ يْكُونْ بِينَاتْكُمْ عَرْكْ وْحُسْدْ وْغُشْ وْأَنَانِيَّة وْذَمَّانْ وْنَمِيمَة وْتَكَبُّرْ وْخُوضَة.

²¹نْخَافْ، إِذَا جِيتْكُمْ مَرَّة أُخْرَى، يْخَلِّينِي رَبِّي ذْلِيلْ بِينَاتْكُمْ، نْوَلِّي نِبْكِي عْلَى بَرْشَة مِلِّي عَمْلُوا الذْنُوبْ قْبَلْ وْمَا تَابُوشْ عْلَى النْجَاسَة وِالزْنَى وِالفِسْقْ.