Read Tunisian Arabic New Testament كُورِنْثُوسْ الثَّانِيْ 13 Bible Online

كُورِنْثُوسْ الثَّانِيْ 13 - Tunisian Arabic New Testament bible

كُورِنْثُوسْ الثَّانِيْ 13

¹وْهَاذِي المَرَّة الثَّالْثَة الِّي بَاشْ نْجِيكُمْ فِيهَا. وِالكْتَابْ المُقَدَّسْ يْقُولْ: «مَا يِتْحْكَمْ فِي قَضِيَّة كَانْ مَا يْكُونُوا ثَمَّة زُوزْ شْهُودْ وِلاَّ ثْلاَثَة.»

²وَقْتِلِّي جِيتْكُمْ المَرَّة الثَّانْيَة قُلْتْ لِلِّي عَمْلُوا الذْنُوبْ قْبَلْ وِالشَّيْء بِيدُو نْقُولُو لِلأُخْرِينْ وْآنَا غَايِبْ: إِذَا كَانْ رْجَعْتِلْكُمْ رَانِي مَا نِيشْ بَاشْ نْكُونْ صْعِيبْ،

³مَا دَامْكُمْ تُطْلْبُوا فِي دَلِيلْ عْلَى إِنُّو المَسِيحْ يِتْكَلِّمْ عْلَى لْسَانِي. وِالمَسِيحْ مُوشْ ضْعِيفْ وَقْتِلِّي يِتْعَامِلْ مْعَاكُمْ، آمَا رَاهُو قْوِي بِينَاتْكُمْ.

⁴وْرَغْمِلِّي تِصْلَبْ وْهُوَ ضْعِيفْ، رَاهُو تَوَّا حَيْ بْقُدْرِةْ اللهْ. وْإِحْنَا زَادَا ضْعَافْ فِي المَسِيحْ، آمَا وَقْتِلِّي نِتْعَامْلُوا مْعَاكُمْ بَاشْ نْكُونُوا حَيِّينْ مْعَاهْ بْقُدْرِةْ اللهْ.

⁵جَرّْبُوا رْوَاحْكُمْ وْحَاسْبُوهَا إِذَا كَانْ مَازِلْتُوا مُؤْمْنِينْ وِلاَّ لاَ. يَاخِي مَا تَعْرْفُوشْ رْوَاحْكُمْ وِلِّي يَسُوعْ المَسِيحْ فِيكُمْ؟ وِلاَّ رَاكُمْ فَاشْلِينْ.

⁶آمَا أَحْنَا نِتْمَنَّاوْ إِنّْكُمْ تَعْرْفُوا الِّي أَحْنَا مَا نَاشْ فَاشْلِينْ.

⁷وِنْصَلِّي للهْ إِنّْكُمْ مَا تَعْمْلُوشْ الشَّرْ، مُوشْ بَاشْ نُظْهْرُوا الِّي أَحْنَا نَاجْحِينْ، آمَا بَاشْ إِنْتُومَا تَعْمْلُوا الخِيرْ حَتَّى إِذَا كَانْ أَحْنَا نُظْهْرُوا كَإِنَّا فَاشْلِينْ.

⁸أَحْنَا مَا انَّجّْمُوشْ نْقَاوْمُوا الحَقْ، آمَا انَّجّْمُوا نِخْدْمُوهْ آكَاهُو.

⁹وْإِحْنَا نَفْرْحُوا بَرْشَة كِنْكُونُوا أَحْنَا ضْعَافْ وْإِنْتُومَا قْوِيِّينْ، وِالشَّيْء الِّي نْصَلِّيوْ مِنْ أَجْلُو إِنّْكُمْ تْكُونُوا كَامْلِينْ.

¹⁰نِكْتْبِلْكُمْ وْآنَا غَايِبْ بَاشْ مَا نْكُونِشْ قَاسِي مْعَاكُمْ وْآنَا حَاضِرْ، بِالسُّلْطَة الِّي عْطَاهَالِي الرَّبْ بَاشْ نِبْنِيكُمْ مُوشْ بَاشْ نْهَدِّمْكُمْ.

¹¹وْتَوَّا يَا إِخْوَة، أَفْرْحُوا وْحَاوْلُوا تْكُونُوا كَامْلِينْ، وِاتْشَجّْعُوا وْكُونُوا رَايْ وَاحِدْ وْعِيشُوا فِي سَلاَمْ، وْإِلاَهْ المْحَبَّة وِالسَّلاَمْ يْكُونْ مْعَاكُمْ.

¹²سَلْمُوا عْلَى بْعَضْكُمْ بُّوسَة مُقَدّْسَة.

¹³يْسَلْمُوا عْلِيكُمْ الإِخْوَة القِدِّيسِينْ الكُلْهُمْ.

¹⁴وْنِعْمِةْ رَبّْنَا يَسُوعْ المَسِيحْ وِمْحَبِّةْ اللهْ وْشَرِكِةْ الرُّوحْ القُدُسْ تْكُونْ مْعَاكُمْ الكُلْ!