Read Tunisian Arabic New Testament كُورِنْثُوسْ الثَّانِيْ 2 Bible Online

كُورِنْثُوسْ الثَّانِيْ 2 - Tunisian Arabic New Testament bible

كُورِنْثُوسْ الثَّانِيْ 2

¹قَرِرْتْ انِّي مَا نْجِيكُمْشْ بَاشْ مَا نْكُونِشْ سْبَبْ فِي إِنّْكُمْ تِحْزْنُوا مَرَّة أُخْرَى.

²إِذَا كَانْ نْخَلِّيكُمْ تِحْزْنُوا شْكُونْ الِّي بَاشْ يْفَرَّحْنِي غِيرْ الِّي حَزِّنْتْهُمْ؟

³وْآنَا كْتِبْتِلْكُمْ الجْوَابْ هَاذَاكَا عْلَى خَاطِرْنِي مَا نْحِبِّشْ نِحْزِنْ بِسْبَبْ النَّاسْ الِّي المَفْرُوضْ هُومَا يْفَرّْحُونِي وَقْتِلِّي نْجِيكُمْ، وْآنَا نَاثِقْ فِيكُمْ الكُلْكُمْ، نَاثِقْ الِّي الشَّيْء الِّي يْفَرَّحْنِي يْفَرَّحْكُمْ إِنْتُومَا الكُلْ.

⁴كْتِبْتِلْكُمْ وْقَلْبِي مْعَبِّي بِالحُزْنْ وِالضِّيقْ وْعِينَيَّ تِجْرِي بالدْمُوعْ، مُوشْ بَاشْ تِحْزْنُوا آمَا بَاشْ تَعْرْفُوا قَدَّاشْ آنَا نْحِبّْكُمْ.

⁵وِلِّي كَانْ سْبَبْ فِي الحُزْنْ رَاهُو مَا خَلاَّنِيشْ نِحْزِنْ آنَا وَحْدِي، آمَا بَاشْ مَا نْبَالِغْشْ، رَاهُو خَلاَّكُمْ الكُلْكُمْ تِحْزْنُوا شْوَيَّة.

⁶وِالرَّاجِلْ هَاذَاكَا يِكْفِيهْ العِقَابْ الِّي عَاقْبُوهْ بَرْشَة نَاسْ مِنْكُمْ.

⁷وْتَوَّا خِيرِلْكُمْ كَانْ تْسَامْحُوهْ وِتْشَجّْعُوهْ، مَا كَانِشْ رَاهُو بَاشْ يْوَلِّي حْزِينْ بَرْشَة.

⁸هَاذَاكَا عْلاَشْ نْوَصِّيكُمْ بَاشْ تْخَلِّيوْهْ يَعْرِفْ الِّي إِنْتُومَا تْحِبُّوهْ.

⁹رَانِي كْتِبْتِلْكُمْ بَاشْ نْجَرِّبْكُمْ وِنْشُوفْكُمْ اطِّيعُونِي فِي كُلْ شَيْء وِلاَّ لاَ.

¹⁰الِّي تْسَامْحُوهْ آنَا زَادَا نْسَامْحُو، وْإِذَا كَانْ ثَمَّة حَاجَة سَامَحْتْ عْلِيهَا رَاهُو عْلَى خَاطِرْكُمْ فِي حْضُورْ المَسِيحْ،

¹¹بَاشْ مَا نْخَلِّيوْشْ الشِّيطَانْ يِغْلِبْنَا، وْإِحْنَا نَعْرْفُوا النْوَايَا مْتَاعُو.

¹²جِيتْ لْتَرُوَاسْ بَاشْ نْبَشِّرْ بْإِنْجِيلْ المَسِيحْ، وِتْحَلْلِي بَابْ لِلخِدْمَة فِي الرَّبْ.

¹³آمَا قْلَقْتْ بَرْشَة عْلَى خَاطِرْنِي مَا لْقِيتِشْ خُويَا تِيطُسْ، وَلّيتْ وَدَّعْتْ الإِخْوَة وْسَافِرْتْ لْمَقْدُونِيَّة.

¹⁴آمَا الحَمْدْ للهْ الِّي يُنْصُرْنَا دِيمَا فِي المَسِيحْ، وْيِسْتَعْمِلْنَا بَاشْ رِيحِةْ مَعْرِفْةْ المَسِيحْ تْفُوحْ فِي البْلاَيِصْ الكُلْ.

¹⁵أَحْنَا العِطْرْ مْتَاعْ المَسِيحْ عِنْدْ اللهْ بِينْ الِّي يُخْلْصُوا وِلاَّ الِّي بَاشْ يِتْهِلْكُوا.

¹⁶هِيَ رِيحِةْ مُوتْ تُقْتُلْ عِنْدْ الِّي يِتْهِلْكُوا، وْرِيحِةْ حَيَاةْ تِحْيِي عِنْدْ الِّي يُخْلْصُوا. إِمَّالاَ شْكُونْ قَادِرْ بَاشْ يَعْمِلْ الشَّيْء هَاذَا؟

¹⁷أَحْنَا مَا نْتَاجْرُوشْ بِكْلاَمْ رَبِّي كِيفْ نَاسْ أُخْرِينْ، آمَا أَحْنَا نِتْكَلّْمُوا كْلاَمْ صَادِقْ فِي المَسِيحْ، كْلاَمْ رُسُلْ مْتَاعْ اللهْ قُدَّامْ اللهْ.