Read Tunisian Arabic New Testament كُورِنْثُوسْ الثَّانِيْ 3 Bible Online

كُورِنْثُوسْ الثَّانِيْ 3 - Tunisian Arabic New Testament bible

كُورِنْثُوسْ الثَّانِيْ 3

¹يَاخِي رْجَعْنَا نُفْخْرُوا فِي رْوَاحْنَا وِلاَّ مِحْتَاجِينْ، كِيفْ نَاسْ أُخْرِينْ، بَاشْ تْوَصِّيوْ عْلِينَا فِي جْوَابَاتْ لِيكُمْ وِإِلاَّ مِنْ عِنْدْكُمْ؟

²إِنْتُومَا بِيدْكُمْ الجْوَابْ مْتَاعْنَا، مَكْتُوبْ فِي قْلُوبْنَا، يَعْرْفُوهْ وْيَقْرَاوْهْ النَّاسْ الكُلْ.

³وَاضِحْ الِّي إِنْتُومَا رِسَالِةْ المَسِيحْ الِّي جِبْنَاهَا، وْمَا كْتِبْنَاهَاشْ بِالحْبَارْ، آمَا بْرُوحْ اللهْ الحَيْ، مُوشْ فِي أَلْوَاحْ مِالحْجَرْ، آمَا فِي أَلْوَاحْ مِنْ لْحَمْ وْدَمْ، الِّي هِيَ قْلُوبْكُمْ.

⁴هَاذِي هِيَ الثِّقَة الِّي عِنْدْنَا فِي اللهْ عْلَى طْرِيقْ المَسِيحْ،

⁵مَا نِدَّعِيوْشْ الِّي أَحْنَا قَادْرِينْ بْقُوِّتْنَا، آمَا رَاهِي قُدْرِتْنَا مِنْ عِنْدْ اللهْ.

⁶هُوَ الِّي رَدّْنَا قَادْرِينْ بَاشْ نْكُونُوا خُدَّامْ مْتَاعْ عَهْدْ جْدِيدْ، الِّي هُوَ عَهْدْ الرُّوحْ مُوشْ عَهْدْ الحَرْفْ، عْلَى خَاطِرْ الحَرْفْ يُقْتُلْ وِالرُّوحْ يِحْيِي.

⁷إِذَا كَانْ خِدْمِةْ المُوتْ الِّي حْرُوفْهَا مَنْقُوشَة عْلَى الحْجَرْ كَانْ المَجْدْ دَايِرْ بِيهَا، حَتَّى لِينْ بَنِي إِسْرَائِيلْ مَا نَجّْمُوشْ يُخْزْرُوا لْوِجْهْ مُوسَى مِنْ قُوِّةْ المَجْدْ الِّي فِيهْ، رَغْمِلِّي هُوَ مَجْدْ فَانِي،

⁸إِمَّالاَ كِيفَاشْ بَاشْ يْكُونْ مَجْدْ خِدْمِةْ الرُّوحْ؟

⁹إِذَا كَانِتْ خِدْمِةْ الِّي خَلَّى البَشَرْ يِتْحْكَمْ عْلِيهُمْ فِيهَا مَجْدْ، إِمَّالاَ بْقَدَّاشْ يْفُوتْهَا المَجْدْ مْتَاعْ خِدْمِةْ الِّي خَلَّى البَشَرْ أَبْرَارْ.

¹⁰الِّي كَانْ قْبَلْ مَجْدُو مَا ثَمَّاشْ كِيفُو، تْنَحَّى بِسْبَبْ المَجْدْ الِّي أَقْوَى مِنُّو تَوَّا.

¹¹إِذَا كَانْ الفَانِي عَنْدُو مَجْدْ، إِمَّالاَ كِيفَاشْ بَاشْ يْكُونْ المَجْدْ مْتَاعْ الِّي مَا يَفْنَاشْ؟

¹²وْإِحْنَا نِتْصَرّْفُوا بْلاَشْ خُوفْ، عْلَى خَاطِرْنَا عِنْدْنَا الرَّجَاءْ هَاذَا.

¹³أَحْنَا مَا نَاشْ كِيفْ مُوسَى الِّي كَانْ حَاطْ حْجَابْ عْلَى وِجْهُو بَاشْ بَنِي إِسْرَائِيلْ مَا يْشُوفُوشْ نْهَايِةْ المَجْدْ الِّي مَا يْدُومِشْ.

¹⁴آمَا عْقُولْهُمْ فِسْدِتْ، وِالحْجَابْ هَاذَاكَا بِيدُو مَازَالْ مُوجُودْ لِليُومْ وَقْتِلِّي نَقْرَاوْ العَهْدْ القْدِيمْ، وْمَا يِتْنَحَّى كَانْ فِي المَسِيحْ.

¹⁵وِالحْجَابْ هَاذَاكَا مَازَالْ عْلَى قْلُوبْهُمْ لِليُومْ وَقْتِلِّي تِتْقْرَى الشَّرِيعَة مْتَاعْ مُوسَى.

¹⁶آمَا وَقْتِلِّي الوَاحِدْ يَرْجَعْ لْرَبِّي، تَوْ الحْجَابْ يِتْنَحَّى.

¹⁷وِالرَّبْ هُوَ الرُّوحْ القُدُسْ، وْوِينْ يْكُونْ رُوحْ الرَّبْ، تْكُونْ ثَمَّة الحُرِّيَّة.

¹⁸وْإِحْنَا الكُلْنَا وْجُوهْنَا مَكْشُوفَة ونْشُوفوا فِي مَجْدْ الرَّبْ كِيفْ المْرَايَة، وْإِحْنَا نِتْبَدّْلُوا بَاشْ نْوَلِّيوْ عْلَى صُورْتُو، وْيِتْزَادِلْنَا مَجْدْ عْلَى مَجْدْ بْفَضْلْ الرَّبْ الِّي هُوَ الرُّوحْ.