Read Tunisian Arabic New Testament كُورِنْثُوسْ الثَّانِيْ 4 Bible Online

كُورِنْثُوسْ الثَّانِيْ 4 - Tunisian Arabic New Testament bible

كُورِنْثُوسْ الثَّانِيْ 4

¹وِالله بْرَحْمْتُو عْطَانَا الخِدْمَة هَاذِي، إِمَّالاَ خَلِّينَا مَا نِفْشْلُوشْ فِيهَا،

²آمَا نِبْعْدُوا عْلَى كُلْ حَاجَة تِتْعْمَلْ فِي السِّرْ وِتْخَلِّفْ العَارْ، وْمَا نِمْشِيوْشْ فِي طْرِيقْ الخُبْثْ وْمَا نْحَرّْفُوشْ كْلاَمْ اللهْ، آمَا نْظَهّْرُوا الحَقْ بَاشْ قِيمِتْنَا تِكْبِرْ عِنْدْ النَّاسْ الِّي هُومَا قُدَّامْ اللهْ.

³إِذَا كَانْ الإِنْجِيلْ مْتَاعْنَا مَحْجُوبْ، رَاهُو مَحْجُوبْ عَلِّي بَاشْ يِتْهِلْكُوا،

⁴الِّي مَا هُمْشْ مُؤْمْنِينْ، الِّي إِلاَهْ العَالَمْ هَاذَا عْمَالْهُمْ عِينِيهُمْ بَاشْ مَا يْشُوفُوشْ النُّورْ الِّي يِضْوِي عْلِيهُمْ، نُورْ الإِنْجِيلْ مْتَاعْ مَجْدْ المَسِيحْ الِّي هُوَ صُورِةْ اللهْ.

⁵رَانَا مَا نْبَشّْرُوشْ بِرْوَاحْنَا، آمَا نْبَشّْرُوا بْيَسُوعْ المَسِيحْ رَبْ، وْإِحْنَا الخُدَّامْ مْتَاعْكُمْ عْلَى خَاطِرْ المَسِيحْ.

⁶وِالله الِّي قَالْ: «خَلِّي النُّورْ يِضْوِي مِالظْلاَمْ» هُوَ بِيدُو خَلَّى نُورُو يِضْوِي فِي قْلُوبْنَا بَاشْ تِضْوِي المَعْرْفَة مْتَاعْ مَجْدْ اللهْ، الِّي فِي وِجْهْ المَسِيحْ.

⁷وْمَانَا إِلاَّ مَاعُونْ فُخَّارْ هَازْ الكَنْزْ هَاذَا، بَاشْ يُظْهُرْ الِّي القُدْرَة هَاذِيكَا جَايَة مِنْ عِنْدْ اللهْ مُوشْ مِنْ عِنْدْنَا أَحْنَا.

⁸تِصْعَابْ عْلِينَا الدِّنْيَا مِنْ الجِيهَاتْ الكُلْ آمَا مَا نْسَلّْمُوشْ، نْحِيرُوا فِي كُلْ شَيْء آمَا مَا نَيْأْسُوشْ،

⁹النَّاسْ يِضْطَهْدُونَا آمَا رَبِّي مَا يْخَلِّينَاشْ، يْطَيّْحُونَا آمَا مَا نْمُوتُوشْ،

¹⁰نْهِزُّوا عْذَابْ مُوتْ يَسُوعْ فِي بْدُونَاتْنَا فِي كُلْ وَقْتْ بَاشْ تُظْهُرْ حْيَاتُو زَادَا فِي بْدُونَاتْنَا.

¹¹وْمَا دَامْنَا حَيِّينْ، يْسَلّْمُونَا لِلمُوتْ عْلَى خَاطِرْ يَسُوعْ بَاشْ تُظْهُرْ حْيَاةْ يَسُوعْ فِي بْدُونَاتْنَا الفَانْيَة.

¹²المُوتْ يِخْدِمْ فِينَا وِالحَيَاةْ تِخْدِمْ فِيكُمْ.

¹³وِالكْتَابْ المُقَدَّسْ يْقُولْ: «تْكَلِّمْتْ عْلَى خَاطِرْنِي امِّنْتْ.» وْإِحْنَا زَادَا نِتْكَلّْمُوا عْلَى خَاطِرْنَا نِمّْنُوا بِالإِيمَانْ هَاذَاكَا،

¹⁴وْإِحْنَا عَارْفِينْ إِنُّو اللهْ الِّي قَيِّمْ الرَّبْ يَسُوعْ مِالمُوتْ بَاشْ يْقَيِّمْنَا أَحْنَا زَادَا مْعَ يَسُوعْ وِنْوَلِّيوْ الكُلْنَا بِينْ يْدِيهْ،

¹⁵وِالشَّيْء هَاذَا الكُلْ عْلَى خَاطِرْكُمْ. وِعْلَى قَدْ مَا تُكْثُرْ النِّعْمَة يُكْثْرُوا الِّي يُشْكْرُوا اللهْ وِيْمَجّْدُوهْ.

¹⁶إِمَّالاَ مَا نْخَلِّيوْشْ العَزِيمَة مْتَاعْنَا تُضْعُفْ. مَا دَامُو الإِنْسَانْ الِّي مِنْ بَرَّة مَاشِي وْيِفْنَى، رَاهُو مِنْ دَاخِلْ قَاعِدْ يِتْجَدِدْ نْهَارْ بَعْدْ نْهَارْ.

¹⁷وِالمَشَاكِلْ الصْغِيرَة الِّي قَاعْدِينْ نْعَانِيوْ مِنْهَا قَاعْدَة تْحَضِّرْ فِينَا بَاشْ نَاخْذُوا مَجْدْ يْدُومْ لِلأَبَدْ.

¹⁸رَانَا مَا نُخْزْرُوشْ لِلحَاجَاتْ الِّي نْشُوفُوا فِيهَا، آمَا نُخْزْرُوا لِلحَاجَاتْ الِّي مَا نْشُوفُوهَاشْ، عْلَى خَاطِرْ الِّي نْشُوفُوا فِيهْ يِفْنَى، وِلِّي مَا نْشُوفُوهِشْ يُقْعُدْ لِلأَبَدْ.