Read Tunisian Arabic New Testament كُورِنْثُوسْ الثَّانِيْ 6 Bible Online

كُورِنْثُوسْ الثَّانِيْ 6 - Tunisian Arabic New Testament bible

كُورِنْثُوسْ الثَّانِيْ 6

¹مَا دَامْنَا أَحْنَا مِتْشَارْكِينْ فِي الخِدْمَة مْعَ اللهْ نُطْلْبُوا مِنْكُمْ إِنّْكُمْ مَا تْكُونُوشْ قْبِلْتُوا نِعْمِةْ اللهْ مِنْ غِيرْ فَايْدَة.

²عْلَى خَاطْرُو يْقُولْ: فِي الوَقْتْ المنَاسِبْ جَاوِبْتِكْ، وْ فِي يُومْ الخَلاَصْ عَاوِنْتِكْ. وْهَاذَا يُومْ وْوَقْتْ مُنَاسِبْ عِنْدْ اللهْ، وْهَاذَا يُومْ الخَلاَصْ.

³مَا نْحِبُّوشْ نْعَطّْلُوا فِي حَتَّى حَاجَة بَاشْ مَا يْكُونْ حَتَّى لُومْ عْلَى خِدْمِتْنَا،

⁴آمَا نْوَرِّيوْ الِّي أَحْنَا خُدَّامْ اللهْ فِي كُلْ شَيْء وْنُصْبْرُوا فِي الأَوْقَاتْ الصْعِيبَة وْأَوْقَاتْ الإِحْتِيَاجْ وِالضِّيقْ

⁵وِالضَّرْبْ وِالحَبْسْ وِالمَشَاكِلْ وِالتْعَبْ وِالسْهَرْ وِالصُّومْ،

⁶بِالطْهَارَة وِالمَعْرْفَة وْوُسْعْ البَالْ وِالبْهَاوَة وِالرُّوحْ مْتَاعْ القَدَاسَة وِالمْحَبَّة الصَّادْقَة،

⁷بِالكْلاَمْ الصَّادِقْ وْقُدْرِةْ اللهْ وِسْلاَحْ الحَقْ وَقْتِلِّي نْهَاجْمُوا وْوَقْتِلِّي نْدَافْعُوا،

⁸بِالكَرَامَة وِالذُّلْ، بِالسُّمْعَة الخَايْبَة وِالبَاهْيَة. النَّاسْ يِعْتَبْرُونَا كَاذْبِينْ وْإِحْنَا صَادْقِينْ،

⁹مَجْهُولِينْ وْإِحْنَا مَعْرُوْفِينْ، مُوتَى وْإِحْنَا كِيفْ مَا تْشُوفُوا حَيِّينْ، يْعَاقْبُونَا آمَا مَا يُقْتْلُونَاشْ،

¹⁰حْزَانَى وْإِحْنَا دِيمَا فَرْحَانِينْ، فُقَرَاءْ وْإِحْنَا نِغْنِيوْ بَرْشَة نَاسْ، مَا عِنْدْنَا حَتَّى شَيْء وْإِحْنَا نِمْلْكُوا كُلْ شَيْء.

¹¹كَلِّمْنَاكُمْ بْصَرَاحَة، يَا أَهْلْ كُورِنْثُوسْ، وْحَلِّينَالْكُمْ قْلُوبْنَا.

¹²مَا نَاشْ أَحْنَا الِّي ضَيِّقْنَا عْلِيكُمْ، آمَا الضِّيقْ رَاهُو فِي قْلُوبْكُمْ.

¹³نْكَلِّمْكُمْ كِيفْ وْلاَدِي. إِمَّالاَ إِنْتُومَا حِلُّوا قْلُوبْكُمْ وْعَامْلُونَا كِيفْ مَا نْعَامْلُوكُمْ.

¹⁴مَا تْكُونُوشْ تَحْتْ سْقَفْ وَاحِدْ مْعَ الِّي مَا هُمْشْ مُؤْمْنِينْ. شْنُوَّة الِّي يِجْمَعْ الخِيرْ مْعَ الشَّرْ؟ وِشْنُوَّة الِّي يَرْبِطْ النُّورْ بِالظْلاَمْ؟

¹⁵وِشْنُوَّة الشَّيْء الِّي المَسِيحْ يْوَافِقْ فِيهْ بْلِيسْ؟ وِشْنُوَّة الشَّيْء الِّي المُؤْمِنْ يِتْشَارِكْ فِيهْ مْعَ الِّي مُوشْ مُؤْمِنْ؟

¹⁶وِشْنُوَّة الإِتِّفَاقْ الِّي بِينْ هَيْكِلْ اللهْ وِالصْنَبْ؟ رَانَا أَحْنَا هَيْكِلْ اللهْ الحَيْ. هَاذَا الِّي يْقُولُو اللهْ: بَاشْ نُسْكُنْ فِي وُسْطْهُمْ وْنِمْشِي مْعَاهُمْ، وِيْكُونُوا شَعْبِي وِنْكُونْ إِلاَهْهُمْ.

¹⁷هَاذَاكَا عْلاَشْ الرَّبْ يْقُولْ أُخْرْجُوا مِنْ وُسْطْهُمْ وْخَلِّيوْهُمْ، مَا تْمِسُّوشْ المَنْزُوسْ، وْآنَا نِقْبِلْكُمْ

¹⁸وِنْكُونْ بُوكُمْ وِتْكُونُوا وْلاَدِي وِبْنَاتِي يْقُولْ الرَّبْ القَادِرْ.