Read Tunisian Arabic New Testament كُورِنْثُوسْ الثَّانِيْ 7 Bible Online

كُورِنْثُوسْ الثَّانِيْ 7 - Tunisian Arabic New Testament bible

كُورِنْثُوسْ الثَّانِيْ 7

¹يَا حْبَابْنَا، الوُعُودْ هَاذِي الكُلْهَا عْطَاهَالْنَا اللهْ، آمَا خَلِّينَا نْكُونُوا طَاهْرِينْ مِالحَاجَاتْ الكُلْهَا الِّي تْنَجِّسْ البْدَنْ وِالرُّوحْ، وْنَسْعَاوْ بَاشْ نْعِيشُوا فِي قَدَاسَة كَامْلَة وِنْخَافُوا مِنْ رَبِّي.

²حِلُّولْنَا قْلُوبْكُمْ، رَانَا مَا ظْلَمْنَا حَتَّى حَدْ وْمَا ضَرِّينَا حَتَّى حَدْ وْمَا تْحَيِّلْنَا عْلَى حَتَّى حَدْ.

³مَا نِيشْ نْقُولْ فِي الشَّيْء هَاذَا بَاشْ نُحْكُمْ عْلِيكُمْ، رَانِي قُلْتِلْكُمْ مِنْ قْبَلْ الِّي إِنْتُومَا فِي قْلُوبْنَا بَاشْ نْمُوتُوا مْعَ بْعَضْنَا وِلاَّ نَحْيَاوْ مْعَ بْعَضْنَا.

⁴آنَا نَاثِقْ فِيكُمْ بَرْشَة وْنِتْفُوخِرْ بِيكُمْ بَرْشَة. بْرَغْمْ المَشَاكِلْ الكُلْهَا الِّي عِنْدْنَا، قَلْبِي مَلْيَانْ بِالشَّجَاعَة وْفَايِضْ بِالفَرْحَة.

⁵مِلِّي وْصُلْنَا لْمَقْدُونِيَّة مَا ارْتَحْنَاشْ، المَشَاكِلْ جَايِتْنَا مِالجِيهَاتْ الكُلْ: العَرْكْ البَرَّا وِالخُوفْ الدَاخِلْ.

⁶آمَا اللهْ الِّي يْعَزِّي المِتْوَاضْعِينْ عَزَّانَا بْجَيَّانْ تِيطُسْ،

⁷مُوشْ بْجَيَّانُو بَرْكْ، آمَا كِشَجَّعْتُوهْ. وِفْرَحْتْ أَكْثِرْ وَقْتِلِّي حْكَالْنَا كِيفَاشْ إِنْتُومَا سْتَاحِجْتُونِي وِحْزِنْتُوا عْلَى خَاطْرِي وْغِرْتُوا عْلِيَّ.

⁸حَتَّى إِذَا كَانْ خَلِّيتْكُمْ تِحْزْنُوا بِالجْوَابْ مْتَاعِي، رَانِي مَا نِيشْ نَادِمْ الِّي كْتِبْتُو. وْإِذَا كَانْ نْدِمْتْ، عْلى خَاطِرْنِي شُفْتْ الِّي هُوَ خَلاَّكُمْ تِحْزْنُوا لْسَاعَة مِالزْمَانْ،

⁹رَانِي تَوَّا فَرْحَانْ، مُوشْ عْلَى خَاطِرْنِي خَلِّيتْكُمْ تِحْزْنُوا، آمَا عْلَى خَاطِرْ حُزْنْكُمْ خَلاَّكُمْ اتُّوبُوا. وْهُوَ حُزْنْ كِيفْ مَا يْحِبْ اللهْ، إِمَّالاَ أَحْنَا مَا ضَرِّينَاشْ حَتَّى وَاحِدْ فِيكُمْ.

¹⁰رَاهُو الحُزْنْ الِّي يْحِبْ عْلِيهْ اللهْ يْهِزْ لِلتَّوْبَة الِّي تْهِزْ لِلخَلاَصْ وِلِّي مَا فِيهَاشْ نْدَمْ، آمَا الحُزْنْ الِّي مِالدِّنْيَا رَاهُو يْهِزْ لِلمُوتْ.

¹¹شُوفُوا كِيفَاشْ الحُزْنْ الِّي يْحِبْ عْلِيهْ اللهْ قَدَّاشْ خَلاَّكُمْ تْكُونُوا حَارْصِينْ وْقَدَّاشْ ادَّافْعُوا وْقَدَّاشْ تِتْغَشَشُوا وْقَدَّاشْ تْخَافُوا وْقَدَّاشْ تِسْتَاحْجُوا وْقَدَّاشْ تْغِيرُوا وْقَدَّاشْ تِنْتَقْمُوا وْوَرِّيتُوا الِّي إِنْتُومَا أَبْرِيَاءْ مِالشَّيْء الِّي وْقَعْ الكُلُّو.

¹²إِمَّالاَ، آنَا مَا كْتِبْتِلْكُمْشْ عْلَى خَاطِرْ الِّي غْلُطْ وِلاَّ عْلَى خَاطِرْ الِّي تِغْلَطْ فِي حَقُّو، آمَا بَاشْ يُظْهُرْ قُدَّامْ اللهْ الِّي إِنْتُومَا مِتْلْهِينْ بِينَا،

¹³هَاذَاكَا عْلاَشْ وَقْتِلِّي إِنْتُومَا تِتْعَزَّاوْ أَحْنَا زَادَا نِتْعَزُّوا. وْزِيدْ عْلَى هَاذَا فْرَحْنَا أَكْثِرْ الِّي تِيطُسْ كَانْ فَرْحَانْ عْلَى خَاطِرْكُمْ الكُلْكُمْ طَمِّنْتُوهْ.

¹⁴وْإِذَا كَانْ آنَا ظَهِّرْتْلُو الِّي آنَا نِتْفُوخِرْ بِيكُمْ، رَانِي مَا نِحْشِمْشْ بِالشَّيْء هَاذَاكَا. وْكِيفْ مَا كُنَّا صَادْقِينْ فِي الِّي قُلْنَاهُولْكُمْ الكُلْ، رَانَا زَادَا صَادْقِينْ وَقْتِلِّي تْفُوخِرْنَا بِيكُمْ قُدَّامْ تِيطُسْ.

¹⁵وِمْحَبّْتُو لِيكُمْ تْزِيدْ، كُلْ مَا يِتْفَكِّرْ كِيفَاشْ الكُلْكُمْ طُعْتُوهْ وِقْبِلْتُوهْ بْخُوفْ وِاحْتِرَامْ.

¹⁶وْآنَا فَرْحَانْ الِّي نَاثِقْ فِيكُمْ فِي كُلْ شَيْء.