Read Tunisian Arabic New Testament كُورِنْثُوسْ الثَّانِيْ 8 Bible Online

كُورِنْثُوسْ الثَّانِيْ 8 - Tunisian Arabic New Testament bible

كُورِنْثُوسْ الثَّانِيْ 8

¹وِنْحِبُّوا، يَا إِخْوَة، نِعْلْمُوكُمْ كِيفَاشْ ظُهْرِتْ نِعْمِةْ اللهْ فِي كَنَايِسْ مَقْدُونِيَّة.

²رَغْمْ المَصَاعِبْ الِّي تْعَدَّاوْ بِيهَا، فَرْحِتْهُمْ الكْبِيرَة وْفَقْرْهُمْ القَاسِي فَاضُوا وْوَلاَّوْ غُنْيَا مِنْ كَثْرِةْ الكَرَمْ مْتَاعْهُمْ.

³وْآنَا انَّجِّمْ نِشْهِدْ الِّي هُومَا عْطَاوْ عْلَى قَدْ مَا يْنَجّْمُوا، وْأَكْثِرْ مِلِّي يْنَجّْمُوا، مِنْ غِيرْ مَا لَزّْهُمْ حَتَّى حَدْ،

⁴وِتْشَّحْتُونَا بَاشْ نِكْرْمُوهُمْ كِنْخَلِّيوْهُمْ يِتْشَارْكُوا مْعَانَا بَاشْ نْعَاوْنُوا المُؤْمْنِينْ الِّي فِي اليَهُودِيَّة.

⁵آمَا عَمْلُوا أَكْثِرْ مِلِّي كُنَّا نِتْوَقّْعُوا مِنْهُمْ، فِي الأُوِّلْ سَلّْمُوا رْوَاحْهُمْ لِلرَّبْ وِمْبَاعِدْ لِينَا أَحْنَا كِيفْ مَا حَبْ رَبِّي.

⁶يَاخِي طْلَبْنَا مِنْ تِيطُسْ بَاشْ يْكَمِّلْ الخِدْمَة المُبَارْكَة الِّي بْدَاهَا مْعَاكُمْ.

⁷وْمَا دَامْكُمْ بَاهِينْ فِي كُلْ شَيْء: فِي الإِيمَانْ وِالكْلاَمْ الوَاضِحْ وِالمَعْرْفَة وِالحْرَارَة فِي الخِدْمَة وِالمْحَبَّة لِينَا، يَا لِيتْكُمْ تْكُونُوا زَادَا بَاهِينْ فِي الخِدْمَة المُبَارْكَة هَاذِي.

⁸وْمَا نْقُولِشْ الشَّيْء هَاذَا بَاشْ نُأْمِرْكُمْ بِيهْ، آمَا بَاشْ نْجَرِّبْ بِالحْرَارَة مْتَاعْ الأُخْرِينْ قَدَّاشْ عِنْدْكُمْ مْحَبَّة.

⁹وْإِنْتُومَا تَعْرْفُوا نِعْمِةْ رَبّْنَا يَسُوعْ المَسِيحْ: كِيفَاشْ وَلَّى فْقِيرْ عْلَى خَاطِرْكُمْ، رَغْمِلِّي هُوَ غْنِي، بَاشْ إِنْتُومَا تِتْغْنَاوْ بْفَقْرُو.

¹⁰وْهَاذَا رَايِي فِي الحَاجَة هَاذِي، وِلِّي هُوَ بَاهِيلْكُمْ، إِنْتُومَا أَوِّلْ نَاسْ بْدِيتُوا الخِدْمَة هَاذِي العَامْ الِّي فَاتْ، وْأَوِّلْ مِنْ حَبْ يِخْدِمْهَا.

¹¹كَمّْلُوا تَوَّا الخِدْمَة بَاشْ تْكَمّْلُوهَا عْلَى قَدْ طَاقِتْكُمْ.

¹²رَاهُو وَقْتِلِّي تْحِبُّوا تَعْطِيوْ، اللهْ يَرْضَى عْلَى الإِنْسَانْ بِلِّي عَنْدُو، مُوشْ بِلِّي مَا عِنْدُوشْ.

¹³مَا نُقْصُدْشْ الِّي إِنْتُومَا بَاشْ تِتْعَدَّاوْ بْظُرُوفْ صْعِيبَة وْغِيرْكُمْ يْكُونْ مِرْتَاحْ، آمَا نُقْصُدْ إِنّْكُمْ تْكُونُوا كِيفْ كِيفْ،

¹⁴وْتَوّا الِّي زَايِدْ عْلِيكُمْ يْكَمِّلْ الِّي نَاقِصْهُمْ، بَاشْ الِّي زَايِدْ عْلِيهُمْ يْكَمِّلْ الِّي نَاقِصْكُمْ، وْهَكَّا تْكُونُوا كِيفْ كِيفْ.

¹⁵كِيفْ مَا يْقُولْ الكْتَابْ المُقَدَّسْ: الِّي لَمْ بَرْشَة مَا فْضُلْ عَنْدُو حَتَّى شَيْء، وِلِّي لَمْ شْوَيَّة مَا نُقْصُو حَتَّى شَيْء.

¹⁶نُشْكُرْ اللهْ الِّي خَلَّى تِيطُسْ زَادَا يْحِبْ يْعَاوِنْكُمْ كِيفِي آنَا،

¹⁷وْمَا كْفَاهِشْ بَاشْ يَعْمِلْ الشَّيْء الِّي طْلَبْنَاهْ مِنُّو، زَادْ جَاكُمْ هُوَ بِيدُو مِنْ كَثْرِةْ مَا هُوَ مِتْوَلْهِي بِيكُمْ.

¹⁸وِبْعَثْنَا مْعَاهْ وَاحِدْ مِنْ خْوَاتْنَا الِّي تُشْكِرْ فِيهْ الكَنَايِسْ الكُلْهَا عْلَى خِدْمْتُو فِي التَّبْشِيرْ.

¹⁹وْزِيدْ عْلَى هَاذَا، الكَنَايِسْ خْتَارِتُّو بَاشْ يْسَافِرْ مْعَانَا بَاشْ يْعَاوِنَّا فِي الخِدْمَة المُبَارْكَة هَاذِي الِّي قَاعْدِينْ نِخْدْمُوا فِيهَا لْمَجْدْ اللهْ وْبَاشْ نْوَرِّيوْ حُسْنْ النِّيَّة مْتَاعْنَا.

²⁰وْإِحْنَا رَادِّينْ بَالْنَا بَاشْ حَتَّى حَدْ مَا يْلُومْنَا كِيفَاشْ قَاعْدِينْ نِسْتَعْمْلُوا فِي الفْلُوسْ الِّي تْبَرّْعُولْنَا بِيهَا،

²¹عْلَى خَاطِرْنَا نْحِبُّوا نَعْمْلُوا الحَاجَاتْ البَاهْيَة، مُوشْ قُدَّامْ الرَّبْ وَحْدُو، آمَا قُدَّامْ النَّاسْ زَادَا.

²²وِبْعَثْنَا مْعَاهُمْ خُونَا الِّي جَرِّبْنَاهْ بَرْشَة مَرَّاتْ وْشُفْنَا الِّي هُوَ نَاشِطْ فِي كُلْ شَيْء، وْهُوَ تَوَّا مِتْحَمِّسْ يَاسِرْ عْلَى خَاطْرُو يَاثِقْ فِيكُمْ بَرْشَة.

²³آمَا تِيطُسْ رَاهُو مْعَايَا وِيْعَاوِنْ فِيَّ عْلَى خِدْمِتْكُمْ، وْآمَا الزُّوزْ الإِخْوَة الِّي مْعَاهْ، رَاهُمْ الرُّسُلْ مْتَاعْ الكَنَايِسْ وْهُومَا مَجْدْ المَسِيحْ.

²⁴إِمَّالاَ وَرِّيوْ مْحَبِّتْكُمْ لِيهُمْ قُدَّامْ الكَنَايِسْ وْكِيفَاشْ أَحْنَا عِنْدْنَا الحَقْ كِنُتْفُوخْرُوا بِيكُمْ.