Read Tunisian Arabic New Testament كُورِنْثُوسْ الثَّانِيْ 9 Bible Online

كُورِنْثُوسْ الثَّانِيْ 9 - Tunisian Arabic New Testament bible

كُورِنْثُوسْ الثَّانِيْ 9

¹وْآنَا نْرَى الِّي مُوشْ لاَزِمْ نِكْتْبِلْكُمْ عْلَى الإِخْوَة المُؤْمْنِينْ كِيفَاشْ تْعَاوْنُوهُمْ،

²عْلَى خَاطِرْنِي نَعْرِفْ الِّي انْتُومَا تْحِبُّوا الشَّيْء هَاذَا وْنِتْفُوخِرْ بِيكُمْ قُدَّامْ المَقْدُونِيِّينْ وِنْقُولِلْهُمْ الِّي إخْوِتْنَا فِي أَخَائِيَة حَاضْرِينْ مِالعَامْ الِّي فَاتْ. الحِرْصْ مْتَاعْكُمْ شَجَّعْ النَّاسْ بَاشْ يْعَاوْنُوا،

³آمَا رَانِي بْعَثْتِلْكُمْ الإِخْوَة هَاذُومَا بَاشْ فُخْرِتْنَا بِيكُمْ فِي الشَّيْء هَاذَا مَا تْكُونِشْ غَالْطَة، وْبَاشْ تْكُونُوا حَاضْرِينْ كِيفْ مَا قُلْتْ.

⁴وْآنَا نْخَافْ إِنُّو يْجِيوْ مْعَايَا جْمَاعَة مِالمَقْدُونِيِّينْ وْيَلْقَاوْكُمْ مَا كُمْشْ حَاضْرِينْ، نُقْعْدُوا أَحْنَا فِي الحِشْمَة، إِذَا كَانْ مُوشْ إِنْتُومَا زَادَا. بَعْدْ مَا كُنَّا وَاثْقِينْ فِي فُخْرِتْنَا بِيكُمْ.

⁵هَاذَاكَا عْلاَشْ رِيتْ إِنُّو لاَزِمْ نُطْلُبْ مِالإِخْوَة بَاشْ يِسْبْقُونِي لِيكُمْ بَاشْ يْحَضّْرُوا الحَاجَاتْ الِّي وْعِدْتُونِي بِيهَا، وْهَكَّا بَاشْ تَعْطِيوْ عْلَى رَاحِتْكُمْ مُوشْ مَلْزُوزِينْ.

⁶وِاتْذَكّْرُوا إِنُّو الِّي يَزْرَعْ بالْبُخْلْ يَحْصِدْ بالْبُخْلْ، وِلِّي يَزْرَعْ بالْبَرْكَة يَحْصِدْ بِالْبَرْكَة.

⁷خَلِّي كُلْ وَاحِدْ يَعْطِي الشَّيْء الِّي نْوَاهْ فِي قَلْبُو، مُوشْ نَادِمْ وِلاَّ مَلْزُوزْ، عْلَى خَاطِرْ اللهْ يْحِبْ الِّي يَعْطِي وْهُوَ فَرْحَانْ.

⁸وِالله قَادِرْ بَاشْ يْزِيدْكُمْ كُلْ خِيرْ، وِيْكُونْ عِنْدْكُمْ مَا يِكْفِيكُمْ فِي كُلْ وَقْتْ بَاشْ تْزِيدُوا تَعْمْلُوا الخِيرْ أَكْثِرْ،

⁹كِيفْ مَا تِكْتِبْ فِي الكْتَابْ المُقَدَّسْ: فَرِّقْ بْلاَشْ حْسَابْ وِعْطَى لِلفُقَرَاءْ، البِرْ مْتَاعُو يْدُومْ لِلأَبَدْ.

¹⁰وِالله الِّي يَعْطِي الزِّرِّيعَة لِلِّي يَزْرَعْ وِالخُبْزْ لِلمَاكْلَة بَاشْ يَعْطِيكُمْ زِرِّيعِتْكُمْ وِيْكَثِّرْهَا بَاشْ البِرْ مْتَاعْكُمْ يِنْتِجْ بَرْشَة ثَمَرْ.

¹¹وْيِغْنِيكُمْ فِي كُلْ شَيْء، بَاشْ يْكُونْ الكَرَمْ مْتَاعْكُمْ بْلاَشْ حْسَابْ وِالنَّاسْ يُشْكْرُوا اللهْ عْلَى خَاطِرْ الكَرَمْ مْتَاعْكُمْ.

¹²رَاهِي الخِدْمَة هَاذِي الِّي تِخْدْمُوا فِيهَا مُوشْ تِكْفِي احْتِيَاجَاتْ المُؤْمْنِينْ آكَاهُو، آمَا تْفِيضْ بَاشْ تْخَلِّي النَّاسْ يِحْمْدُوا اللهْ بَرْشَة.

¹³وِالخِدْمَة هَاذِي دَلِيلْ عْلَى إِيمَانْكُمْ، وِيْمَجّْدُوا اللهْ عْلَى طَاعِتْكُمْ وَقْتِلِّي تِشْهْدُوا بْإِنْجِيلْ المَسِيحْ وِعْلَى الكَرَمْ مْتَاعْكُمْ وَقْتِلِّي تْعَاوْنُوهُمْ وِتْعَاوْنُوا الأُخْرِينْ الكُلْهُمْ.

¹⁴وِيْصَلِّيوْ مِنْ أَجْلْكُمْ وْهُومَا مِسْتَاحْجِينْكُمْ عْلَى خَاطِرْ نِعْمِةْ اللهْ عْلِيكُمْ عْظِيمَة.

¹⁵وِالحَمْدْ للهْ عْلَى نِعْمْتُو الِّي مَا ثَمَّاشْ كِيفْهَا!