Read Tunisian Arabic New Testament غَلاَطْيَة 1 Bible Online

غَلاَطْيَة 1 - Tunisian Arabic New Testament bible

غَلاَطْيَة 1

¹مِنْ بُولُسْ الِّي هُوَ رَسُولْ مُوشْ مِنْ عِنْدْ النَّاسْ وِلاَّ عْلَى طْرِيقْ إِنْسَانْ آمَا مِنْ عِنْدْ يَسُوعْ المَسِيحْ وِالله الآبْ، الِّي قَيّْمُو مِالمُوتْ.

²وْمِنْ الإِخْوَة الِّي مْعَايَا الكُلْهُمْ، لِلكَنَايِسْ الِّي فِي جِيهِةْ غَلاَطْيَة.

³النِّعْمَة وِالسَّلاَمْ لِيكُمْ مِنْ عِنْدْ اللهْ بُونَا وِالرَّبْ يَسُوعْ المَسِيحْ.

⁴الِّي عْطَى حْيَاتُو مِنْ أَجْلْ ذْنُوبْنَا بَاشْ يْحَرِّرْنَا مِالعَالَمْ الشِّرِّيرْ هَاذَا كِيفْ مَا يْحِبْ إِلاَهْنَا وْبُونَا.

⁵الِّي لِيهْ المَجْدْ دِيمَا وْلِلأَبَدْ. آمِينْ.

⁶آنَا مِتْعَجِّبْ كِيفَاشْ فِيسَعْ تِبْعْدُوا عَلِّي دْعَاكُمْ بِالنِّعْمَة مْتَاعْ المَسِيحْ وْتِمْشِيوْ لْإِنْجِيلْ غْرِيبْ؟

⁷مَا نُقْصُدْشْ الِّي ثَمَّة إِنْجِيلْ آخَرْ، آمَا ثَمَّة نَاسْ الِّي يَعْمْلُوا فِي المَشَاكِلْ مَا بِينَاتْكُمْ وِيْحِبُّوا يْبَدّْلُوا إِنْجِيلْ المَسِيحْ.

⁸آمَا إِذَا كَانْ أَحْنَا نْبَشّْرُوكُمْ، وِلاَّ مَلاَكْ مِالسْمَاءْ بَشِّرْكُمْ بْإِنْجِيلْ غِيرْ الإِنْجِيلْ الِّي بَشِّرْنَاكُمْ بِيهْ رَاهُو مَلْعُونْ.

⁹وْكِيمَا قُلْنَا قْبَلْ نْعَاوِدْ نْقُولْ تَوَّا زَادَا إِذَا كَانْ وَاحِدْ يْبَشِّرْكُمْ بْإِنْجِيلْ غِيرْ الِّي قْبِلْتُوهْ، رَاهُو يْكُونْ مَلْعُونْ.

¹⁰يَاخِي آنَا تَوَّا قَاعِدْ نْحَاوِلْ نِسْتَعْطَفْ النَّاسْ وِلاَّ نِسْتَعْطَفْ اللهْ؟ وِلاَّ قَاعِدْ نْرَضِّي فِي النَّاسْ؟ إِذَا كَانْ آنَا مَازِلْتْ نْرَضِّي فِي النَّاسْ، رَانِي مَا نْكُونِشْ خَادِمْ لِلمَسِيحْ.

¹¹وْنِعْلِمْكُمْ يَا الإِخْوَة الِّي الإِنْجِيلْ الِّي بَشِّرْتْكُمْ بِيهْ مُوشْ إِنْجِيلْ مِنْ عِنْدْ البَشَرْ.

¹²آنَا لاَ خْذِيتُو وْلاَ تْعَلِّمْتُو مِنْ عِنْدْ إِنْسَانْ، آمَا رَاهُو جَانِي بْوَحْي مِنْ عِنْدْ يَسُوعْ المَسِيحْ.

¹³وِانْتُومَا سْمَعْتُوا بْسِيرْتِي قْبَلْ فِي الدِّينْ اليْهُودِي، كِيفَاشْ كُنْتْ نْعَذِّبْ فِي الكَنِيسَة مْتَاعْ اللهْ وْمِتْدَيِّنْ لأَقْصَى حَدْ وْكُنْتْ نْخَرِّبْ فِيهَا.

¹⁴وْكِيفَاشْ كُنْتْ فِي الدِّينْ اليْهُودِي أَقْوَى مِنْ بَرْشَة مِنْ وْلاَدْ الجِيلْ مْتَاعِي فِي شَعْبِي، وْكُنْتْ نْغِيرْ أَكْثِرْ مِنْهُمْ عْلَى التَّقَالِيدْ مْتَاعْ جْدُودْنَا.

¹⁵آمَا وَقْتِلِّي حَبْ اللهْ الِّي خْتَارْنِي وْآنَا مَازِلْتْ فِي كِرْشْ أُمِّي، وْمِنْ بَعْدْ دْعَانِي بْنِعْمْتُو

¹⁶وْظَهِّرْ ابْنُو فِيَّ بَاشْ نْبَشِّرْ بِيهْ الشْعُوبْ الِّي فِي الدِّنْيَا، وَقْتْهَا مَا شَاوِرْتِشْ نَاسْ مِنْ لْحَمْ وْدَمْ

¹⁷وْمَا طْلَعْتِشْ لْأُورْشَلِيمْ بَاشْ نْقَابِلْ الرُّسُلْ الِّي كَانُوا قَبْلِي، آمَا مْشِيتْ لِبْلاَدْ العْرَبْ وْبَعْدْ رْجَعْتْ لْدِمَشْقْ.

¹⁸وْبَعْدْ ثْلاَثَة سْنِينْ طْلَعْتْ لْأُورْشَلِيمْ بَاشْ نِتْعَرِّفْ عْلَى بُطْرُسْ، وِقْعَدْتْ عَنْدُو خُمْسْتَاشِنْ يُومْ.

¹⁹آمَا مَا قَابِلْتِشْ حَتَّى وَاحِدْ مِالرُّسُلْ غِيرُو هُوَ كَانْ يَعْقُوبْ خُو الرَّبْ.

²⁰وِالله يِشْهِدْ الِّي آنَا مَانِيشْ نِكْذِبْ فِي الشَّيْء الِّي قَاعِدْ نِكْتِبْ فِيهْ لِيكُمْ.

²¹وْبَعْدْ هَاذَا آنَا جِيتْ لْمَنْطِقْةْ سُورْيَة وْكِيلِيكِيَّة.

²²آمَا مَا كُنْتِشْ مَعْرُوفْ بِالوِجْهْ عِنْدْ الكَنَايِسْ مْتَاعْ المَسِيحْ الِّي فِي اليَهُودِيَّة.

²³آمَا كَانُوا يِسْمْعُوا إِنُّو الِّي كَانْ قْبَلْ يْعَذِّبْ فِينَا، قَاعِدْ يْبَشِّرْ بِالإِيمَانْ الِّي قْبَلْ كَانْ يْحَاوِلْ بَاشْ يْخَرّْبُو.

²⁴وْكَانُوا يْمَجّْدُوا فِي اللهْ عْلَى خَاطْرِي.