Read Tunisian Arabic New Testament غَلاَطْيَة 2 Bible Online

غَلاَطْيَة 2 - Tunisian Arabic New Testament bible

غَلاَطْيَة 2

¹وْبَعْدْ أَرْبَعْطَاشِنْ عَامْ طْلَعْتْ مَرَّة أُخْرَى لْأُورْشَلِيمْ وِمْعَايَا بَرْنَابَا وْهَزِّيتْ مْعَايَا تِيطُسْ زَادَا.

²وْآنَا مْشِيتْ الغَادِي عْلَى خَاطِرْ اللهْ وَرَّانِي رُؤْيَا الِّي آنَا يِلْزِمْنِي نِمْشِي، وِعْرَضْتْ عْلِيهُمْ الإِنْجِيلْ الِّي نْبَشِّرْ بِيهْ بِينْ النَّاسْ الِّي مَا هُمْشْ يْهُودْ، آمَا عْرَضْتُو عْلَى الفَاهْمِينْ وِالكْبَارْ الِّي فِيهُمْ، بَاشْ التْعَبْ الِّي تْعِبْتُو قْبَلْ وِلاَّ تَوَّا مَا يْكُونِشْ مِنْ غِيرْ فَايْدَة.

³وْحَتَّى مِنْ تِيطُسْ الِّي كَانْ مْعَايَا مَا تِجْبَرْشْ بَاشْ يِطَّهِّرْ رَغْمِلِّي هُوَ كَانْ يُونَانِي.

⁴آمَا الكْلاَمْ تِجْبِدْ بِسْبَبْ الإِخْوَة الدَّجَّالِينْ الِّي دَخْلُوا بِينَاتْنَا فِي السِّرْ وْدَخْلُوا بَاشْ يِتْجَسَسُوا عْلَى الحُرِّيَّة الِّي عِنْدْنَا فِي المَسِيحْ يَسُوعْ بَاشْ يْرَجّْعُونَا عَبِيدْ مَرَّة أُخْرَى

⁵وْإِحْنَا عْمُرْنَا مَا طِعْنَاهُمْ وِلاَّ سْتَسْلِمْنَا لِيهُمْ، بَاشْ حَقْ الإِنْجِيلْ يَبْقَي ثَابِتْ عِنْدْكُمْ.

⁶آمَا الِّي كَانُوا يْقُولُوا عْلِيهُمْ الِّي هُومَا شْيُوخْ، مَا عِنْدِيشْ فَرْقْ مَا بِينَاتْهُمْ مَهْمَا كَانِتْ قِيمِتْهُمْ مَا دَامْ اللهْ مَا يُخْزُرْشْ لِلنَّاسْ بِالوْجُوهْ، وْهُومَا مَا زَادُوا شَيْء عَلِّي نْبَشِّرْ بِيهْ.

⁷آمَا بِالعَكْسْ شَافُوا الِّي آنَا تِمِّنْتْ عْلَى الإِنْجِيلْ بَاشْ نْوَصّْلُو لِلنَّاسْ الِّي مُوشْ مْطَهّْرِينْ، كِيمَا بُطْرُسْ تِمِّنْ عْلَى الإِنْجِيلْ بَاشْ يْوَصّْلُو لِلنَّاسْ الِّي مْطَهّْرِينْ.

⁸الِّي سْتَعْمِلْ بُطْرُسْ بَاشْ يْهِزْ الرِّسَالَة لِلنَّاسْ المْطَهّْرِينْ، سْتَعْمِلْنِي آنَا لِلنَّاسْ الِّي مَا هُمْشْ مْطَهّْرِينْ.

⁹يَعْقُوبْ وْبُطْرُسْ وْيُوحَنَّا الِّي النَّاسْ يِعْتَبْرُوهُمْ عْرُصْ فِي الكَنِيسَة عَرْفُوا النِّعْمَة الِّي تِعْطَاتْلِي وْحَطُّوا يْدِيهُمْ فِي يْدَيَّا آنَا وْبَرْنَابَا كِيفْ أَمَارَة الِّي أَحْنَا مِتْشَارْكِينْ فِي الخِدْمَة بَاشْ أَحْنَا نِمْشِيوْا لِلنَّاسْ الِّي مَا هُمْشْ مْطَهّْرِينْ وْهُومَا لِلنَّاسْ المْطَهّْرِينْ.

¹⁰وْطَلْبُوا مِنَّا بَاشْ مَا نَنْسَاوْشْ الفُقَرَاءْ وِالشَّيْء هَاذَا بِالأَخَصْ كُنْتْ دِيمَا نَعْمِلْ فِيهْ.

¹¹آمَا كِجَا بُطْرُسْ لِمْدِينِةْ أَنْطَاكْيَة عَارِكْتُو قُدَّامْ المُؤْمْنِينْ الكُلْهُمْ، عْلَى خَاطْرُو كَانْ غَالِطْ.

¹²قْبَلْ مَا يْجِيوْ جْمَاعَة مِنْ عِنْدْ يَعْقُوبْ، كَانْ بُطْرُسْ يَاكُلْ مْعَ النَّاسْ الِّي مَاهُمْشْ يْهُودْ. آمَا كِجَاوْ هَاذُمْ بْعِدْ وِقْعَدْ وَحْدُو عْلَى خَاطْرُو خَافْ مِنْ النَّاسْ الِّي يْقُولُوا الِّي الطْهُورْ لاَزِمْ.

¹³وْثَمَّة جْمَاعَة مِالمُؤْمْنِينْ اليْهُودْ تْصَرّْفُوا بْنِفَاقْ كِيمَا بُطْرُسْ حَتَّى لِينْ بَرْنَابَا زَادَا غْلُطْ كِيفْهُمْ.

¹⁴وِكِشُفْتْ الِّي هُومَا مَا هُمْشْ مَاشِينْ فِي الطْرِيقْ الصْحِيحْ الِّي يْقُولْ عْلِيهْ الحَقْ الِّي فِي الإِنْجِيلْ وْقُلْتْ لْبُطْرُسْ قُدَّامْ الحَاضْرِينْ الكُلْ: «إِذَا كَانْ إِنْتِ يْهُودِي وِتْعِيشْ كِيفْ النَّاسْ الِّي مَا هُمْشْ يْهُودْ، مُوشْ كِيمَا اليْهُودْ. إِمَّالاَ كِيفَاشْ تُجْبُرْ النَّاسْ الِّي مَا هُمْشْ يْهُودْ بَاشْ يْعِيشُوا كِيفْ اليْهُودْ؟»

¹⁵أَحْنَا مَوْلُودِينْ يْهُودْ وْمَا نَاشْ مِالشْعُوبْ المِذْنْبِينْ.

¹⁶آمَا عْرَفْنَا الِّي الإِنْسَانْ مَا يْوَلِّيشْ بَارْ وَقْتِلِّي يَعْمِلْ الحَاجَاتْ الِّي تْقُولْ عْلِيهُمْ الشَّرِيعَة آمَا وَقْتِلِّي يِمِّنْ بْيَسُوعْ المَسِيحْ آكَاهُو. وْإِحْنَا زَادَا آمِّنَّا بِالمَسِيحْ يَسُوعْ بَاشْ نْوَلِّيوْ أَبْرَارْ بِالإِيمَانْ بِيهْ، مُوشْ بِالأَعْمَالْ مْتَاعْ الشَّرِيعَة الِّي مَا تْرُدْ حَتَّى إِنْسَانْ بَارْ.

¹⁷آمَا إِذَا كَانْ نْحَاوْلُوا بَاشْ نْوَلِّيوْ أَبْرَارْ فِي المَسِيحْ وِنْكُونُوا مِذْنْبِينْ كِخْرَجْنَا عْلَى الشَّرِيعَة، زَعْمَة المَسِيحْ يْكُونْ خَادِمْ لِلذْنُوبْ؟ حَاشَا.

¹⁸آمَا إِذَا نَرْجَعْ وْنِبْنِي الِّي هْدِمْتُو، رَانِي نْوَرِّي الِّي آنَا خَارِجْ عْلَى الشَّرِيعَة

¹⁹آنَا بِالشَّرِيعَة وَلِّيتْ مِيتْ بالنِّسْبَة لِلشَّرِيعَة، آمَا نْعِيشْ للهْ.

²⁰مْعَ المَسِيحْ مُتْ عْلَى الصَّلِيبْ بَاشْ مَا نَحْيَاشْ آنَا، آمَا المَسِيحْ هُوَ الِّي يَحْيَى فِيَّ. الحَيَاةْ الِّي نْعِيشْهَا تَوَّا فِي البْدَنْ قَاعِدْ نْعِيشْهَا بِالإِيمَانْ فِي إِبْنْ اللهْ الِّي حَبّْنِي وِعْطَى حْيَاتُو عْلَى خَاطْرِي

²¹آنَا مَا نَكْفِرْشْ بِالنِّعْمَة مْتَاعْ اللهْ، لُوكَانْ جَا البِرْ يْجِي بِالشَّرِيعَة، رَاهُو مُوتْ المَسِيحْ مَا عِنْدُوشْ حَتَّى فَايْدَة.