Read Tunisian Arabic New Testament غَلاَطْيَة 3 Bible Online

غَلاَطْيَة 3 - Tunisian Arabic New Testament bible

غَلاَطْيَة 3

¹يَا أَهْلْ غَلاَطْيَة الِّي مَا عِنْدْكُمْشْ عْقَلْ، شْكُونْ الِّي سْحِرِّلْكُمْ عْقُولْكُمْ، إِنْتُومَا الِّي شُفْتُوا بْعِينِيكُمْ شْنُوَّة الِّي عَمْلُو يَسُوعْ المَسِيحْ عْلَى الصَّلِيبْ.

²نْحِبْ نِسْإِلْكُمْ عْلَى حَاجَة وَحْدَة: يَاخِي خْذِيتُوا الرُّوحْ القُدُسْ بِالأَعْمَالْ مْتَاعْ الشَّرِيعَة وِلاَّ عْلَى خَاطِرْكُمْ سْمَعْتُوا الإِنْجِيلْ وِامِّنْتُوا بِيهْ؟

³يَاخِي لِلحَدْ هَاذَا إِنْتُومَا خْرَجْتُوا مِنْ عْقُولْكُمْ؟ يَاخِي بَعْدْ مَا بْدِيتُوا بِالرُّوحْ تْكَمّْلُوا بِالْجَسَدْ؟

⁴يَاخِي البَرْشَة حَاجَاتْ الِّي جَرِّبْتُوهَا رَاحِتْ خْسَارَة؟ هَاذَا إِذَا كَانْ رَاحِتْ خْسَارَة بِالحَقْ.

⁵يَاخِي اللهْ عْطَاكُمْ الرُّوحْ وِعْمَلْ مُعْجْزَاتْ مَا بِينَاتْكُمْ بِالأَعْمَالْ مْتَاعْ الشَّرِيعَة وِلاَّ عْلَى خَاطِرْكُمْ سْمَعْتُوا الإِنْجِيلْ وِامِّنْتُوا بِيهْ؟

⁶كِيفْ مَا يْقُولْ الكْتَابْ المُقَدَّسْ: «إِبْرَاهِيمْ إِمِّنْ بِالله وْإِيمَانُو رَدُّو بَارْ.»

⁷إِمَّالاَ يِلْزِمْكُمْ تَعْرْفُوا الِّي النَّاسْ الِّي يِمّْنُوا هُومَا بِالحَقْ ذُرِّيِّةْ إِبْرَاهِيمْ.

⁸وِالكْتَابْ المُقَدَّسْ سْبِقْ وِشْهِدْ الِّي اللهْ بَاشْ يَعْطِي البِرْ بِالإِيمَانْ لِلنَّاسْ الِّي مَا هُمْشْ يْهُودْ وْبَشِّرْ إِبْرَاهِيمْ بِالمْسَبِّقْ وْقَالُّو: «بَاشْ تِتْبَارِكْ فِيكْ الشْعُوبْ الكُلْهَا.»

⁹إِمَّالاَ الِّي هُومَا مُؤْمْنِينْ، اللهْ يْبَارِكْهُمْ مْعَ إِبْرَاهِيمْ الِّي إِمِّنْ.

¹⁰آمَا الِّي هُومَا يَعَمّْلُوا عْلَى إِنّْهُمْ يْطِيعُوا الشَّرِيعَة، رَاهُمْ الكُلْهُمْ بَاشْ يْكُونُوا مَلْعُونِينْ عْلَى خَاطِرْ مَكْتُوبْ فِي الكْتَابْ المُقَدَّسْ: «مَلْعُونْ كُلْ وَاحِدْ مَا يَعْمِلْشْ دِيمَا كُلْ مَا هُوَ مَكْتُوبْ فِي كْتَابْ الشَّرِيعَة.»

¹¹وَاضِحْ الِّي الشَّرِيعَة مَا تْرُدْ حَتَّى وَاحِدْ بَارْ قُدَّامْ اللهْ عْلَى خَاطِرْ الكْتَابْ المُقَدَّسْ يْقُولْ: «الِّي وَلَّى بَارْ بِالإِيمَانْ، رَاهُو بِالإِيمَانْ يَحْيَى.»

¹²آمَا الشَّرِيعَة مَا هِياشْ مِبْنِيَّة عْلَى الإِيمَانْ وْبِالعَكْسْ «الِّي يَعْمِلْ بِالوْصَايَا الكُلْهَا مْتَاعْ الشَّرِيعَة يَحْيَى بِيهَا.»

¹³المَسِيحْ حَرِّرْنَا مِنْ اللَّعْنَة مْتَاعْ الشَّرِيعَة كِفْدَانَا وْتِلْعِنْ هُوَ فِي عُوضْنَا. عْلَى خَاطِرْ مَكْتُوبْ فِي الكْتَابْ المُقَدَّسْ: «مَلْعُونْ كُلْ مِنْ يِتْعَلِّقْ عْلَى لُوحَة.»

¹⁴بَاشْ عْلَى طْرِيقْ المَسِيحْ تُوصِلْ البَرْكَة مْتَاعْ إِبْرَاهِيمْ لِلنَّاسْ الِّي مَا هُمْشْ يْهُودْ، وْبِالإِيمَانْ نَاخْذُوا الرُّوحْ القُدُسْ الِّي تُوعِدْنَا بِيهْ.

¹⁵يَا إِخْوَة نَعْطِيكُمْ مِثَالْ مِالدِّنْيَا: وَقْتِلِّي وَاحِدْ يَعْمِلْ عَهْدْ رَاهُو حَتَّى حَدْ آخَرْ مَا يْنَجِّمْ يْنَحِّيهْ وِلاَّ يْزِيدْ عْلِيهْ.

¹⁶وِالوُعُودْ تِعْطَاتْ لْإِبْرَاهِيمْ وِلْذُرِّيتُو، وْمَا قَالِشْ لِلذُّرِّيَّاتْ مْتَاعُو كَإِنُّو اللهْ يُقْصُدْ فِي بَرْشَة نَاسْ آمَا هُوَ يُقْصُدْ فِي وَاحِدْ بَرْكَة وَقْتِلِّي يْقُولْ «لْذُرِّيتِكْ» وْيَعْنِى المَسِيحْ.

¹⁷الِّي نْحِبْ نْقُولُو هُوَ الِّي الشَّرِيعَة الِّي جَاتْ بَعْدْ أَرْبْعَة مْيَة وِثْلاَثِينْ سْنَة مَا تْنَجِّمْشْ تْنَحِّي العَهْدْ الِّي اللهْ سْبِقْ وْعِمْلُو وِتْخَلِّي الوَعْدْ يُبْطُلْ.

¹⁸لُوكَانْ المِيرَاثْ يْجِي مِالشَّرِيعَة، تَالِي رَاهُو مَا جَاشْ مِالوَعْدْ آمَا اللهْ بِالوَعْدْ نْعِمْ عْلَى إِبْرَاهِيمْ بِالمِيرَاثْ.

¹⁹إِمَّالاَ الشَّرِيعَة عْلاَشْ جَاتْ؟ هِيَ تْزَادِتْ بَاشْ تْظَهِّرْ الذْنُوبْ حَتَّى لِينْ يْجِي المَسِيحْ الِّي هُوَ «الذِّرِّيَّة» الِّي تِعْطَالُو الوَعْدْ وْهِيَ جَابِتْهَا المْلاَيْكَة عْلَى يْدِينْ وْسِيطْ.

²⁰آمَا كِيْجِي الوَعْدْ مِنْ وَاحِدْ آكَاهُو، مُوشْ لاَزِمْ يْكُونْ ثَمَّة وْسِيطْ، وِلِّي وْعِدْ هْنَا هُوَ اللهْ وَحْدُو.

²¹يَاخِي الشَّرِيعَة بَاشْ تْجِي ضِدْ الوُعُودْ مْتَاعْ اللهْ؟ حَاشَا. لُوكَانْ تِعْطَاتْ شَرِيعَةْ قَادْرَة بَاشْ تِحْيِي رَاهُو البِرْ بِالحَقْ جَا مِالشَّرِيعَة.

²²آمَا الكْتَابْ حَطْ النَّاسْ الكُلْ تَحْتْ سُلْطِةْ الذْنُوبْ، بَاشْ يِتْعْطَى الوَعْدْ الِّي عْلَى طْرِيقْ الإِيمَانْ بْيَسُوعْ المَسِيحْ لِلِّي يِمّْنُوا بِيهْ.

²³قْبَلْ مَا يْجِي الإِيمَانْ كَانِتْ الشَّرِيعَة حَابْسِتْنَا وْرَابْطِتْنَا حَتَّى لِينْ جَا الوَقْتْ الِّي يِتْعْلِنْ فِيهْ الإِيمَانْ.

²⁴إِمَّالاَ الشَّرِيعَة كَانِتْ هِيَ الِّي تْأَدِّبْ فِينَا حَتَّى لِينْ جَا المَسِيحْ بَاشْ نْوَلِّيوْ أَبْرَارْ بِالإِيمَانْ.

²⁵آمَا بَعْدْ مَا جَا الإِيمَانْ تْحَرِّرْنَا مِنْ سُلْطِةْ الِّي يْأَدِّبْ فِينَا.

²⁶وِانْتُومَا الكُلْ وْلاَدْ اللهْ بِالإِيمَانْ بْيَسُوعْ المَسِيحْ.

²⁷وِلِّي تْعَمِّدْتُوا فِي المَسِيحْ الكُلْكُمْ تْغَطِّيتُوا بِالمَسِيحْ.

²⁸تَوَّا مَا ثَمَّاشْ فَرْقْ بِينْ يْهُودِي وْيُونَانِي، عَبْدْ وِلاَّ حُرْ، ذْكَرْ وِلاَّ أَنْثَى عْلَى خَاطِرْكُمْ الكُلْكُمْ وَاحِدْ فِي المَسِيحْ يَسُوعْ.

²⁹وْإِذَا كَانْ انْتُومَا تَابْعِينْ لِلمَسِيحْ إِمَّالاَ انْتُومَا ذُرِّيِّةْ إِبْرَاهِيمْ وِانْتُومَا بَاشْ تُورْثُوا الشَّيْء الِّي وْعِدْ بِيهْ اللهْ.