Read Tunisian Arabic New Testament غَلاَطْيَة 5 Bible Online

غَلاَطْيَة 5 - Tunisian Arabic New Testament bible

غَلاَطْيَة 5

¹المَسِيحْ حَرِّرْنَا وْحَطّْنَا فِي طْرِيقْ الحُرِّيَّة، إِمَّالاَ اثْبْتُوا وَابْقَاوْ أَحْرَارْ وْمَا تَرْجْعُوشْ لِحْمِلْ العُبُودِيَّة.

²آنَا بُولُسْ نْقُولِلْكُمْ: إِذَا تِطَّهْرُوا رَاهُو المَسِيحْ مَا يِنْفَعْكُمْشْ فِي حَتَّى شَيْء.

³وْنِشْهِدْ مَرَّة أُخْرَى عْلَى كُلْ وَاحِدْ مْطَهِّرْ الِّي هُوَ مَلْزُومْ بَاشْ يْطِيعْ الشَّرِيعَة الكُلْهَا.

⁴يَلِّي تْحِبُّوا الصْلاَحْ الِّي يْجِي مِالشَّرِيعَة، بْعِدْتُوا عْلَى المَسِيحْ وْتِحْرِمْتُوا مِالنِّعْمَة.

⁵رَانَا عْلَى طْرِيقْ الرُّوحْ وْبِالإِيمَانْ نِسْتَنَّاوْ فِي الرَّجَاءْ الِّي يْجِي مِالبِرْ.

⁶فِي يَسُوعْ المَسِيحْ مَا ثَمَّاشْ مَنْفْعَة لاَ فِي الطْهُورْ وْلاَ فِي غِيرْ الطْهُورْ، آمَا الإِيمَانْ الِّي يُظْهُرْ فِي المْحَبَّة.

⁷كُنْتُوا مَاشِينْ بِالقْدَا شْكُونْ عَطِّلْكُمْ حَتَّى لِينْ وَلِّيتُوا مَا اطِّيعُوشْ الحَقْ؟

⁸التَّغْلِيطْ هَاذَا مُوشْ مِنْ عِنْدْ الِّي دْعَاكُمْ.

⁹رَاهِي شْوَيَّة خْمِيرَة كَافْيَة بَاشْ تْخَمِّرْ العْجِينْ الكُلُّو.

¹⁰آمَا عِنْدِي ثِيقَة مِنْ عِنْدْ الرَّبْ فِيكُمْ الِّي انْتُمْ مَا كُمْشْ بَاشْ تْفَكّْرُوا انّْكُمْ تِمْشِيوْ فِي طْرِيقْ آخَرْ وْإِنُّو الِّي يَعْمِلْ في المَشَاكِلْ فِي وُسْطْكُمْ بَاشْ يِتْعَاقِبْ مَهْمَا يْكُونْ هُوَ.

¹¹آمَا يَا إِخْوَة، كَانْ جَا صْحِيحْ الِّي آنَا مَازِلْتْ انَّادِي بِالطْهُورْ، إِمَّالاَ عْلاَشْ يْعَذّْبُوا فِيَّ لْتَوَّا، إِمَّالاَ رَاهُو حْدِيثِي عْلَى الصَّلِيبْ مَا يَعْمِلْشْ حَتَّى مُشْكْلَة.

¹²يَا لِيتْهُمْ الِّي يِقَلّْقُوا فِيكُمْ يِمْشُو عْلَى رْوَاحْهُمْ.

¹³يَا إِخْوَة رَاكُمْ تِدْعِيتُوا لِلحُرِّيَّة، وْمَا تِسْتَعْمْلُوشْ الحُرِّيَّة بَاشْ تْرَضُّوا الشَّهَوَاتْ مْتَاعْ بْدَنْكُمْ، آمَا اخْدْمُوا بْعَضْكُمْ بِمْحَبَّة.

¹⁴رَاهِي الشَّرِيعَة الكُلْ اتِّمْ فِي وْصِيَّة وَحْدَة: «حِبْ قْرِيبِكْ كِيفْ مَا تْحِبْ رُوحِكْ.»

¹⁵آمَا إِذَا كَانْكُمْ تْعَضُّوا وْتَاكْلُوا فِي بْعَضْكُمْ رُدُّوا بَالْكُمْ لاَ تِفْنُوا بْعَضْكُمْ.

¹⁶إِمَّالاَ نْقُولْ: عِيشُوا فِي الرُّوحْ، وْمَا تَعْمْلُوشْ شْهَاوِي البْدَنْ.

¹⁷رَاهُو البْدَنْ يِشْتْهَى عَكْسْ الرُّوحْ، وِالرُّوحْ عَكْسْ البْدَنْ، وْهَاذُمْ الإِثْنِينْ كُلْ وَاحِدْ يْقَاوِمْ فِي الآخَرْ، حَتَّى لِينْ مَا تَعْمْلُوشْ الشَّيْء الِّي تْحِبُّوا عْلِيهْ.

¹⁸آمَا إِذَا كَانْكُمْ يْقُودْ فِيكُمْ الرُّوحْ رَاكُمْ مَا كُمْشْ تَحْتْ السُّلْطَة مْتَاعْ الشَّرِيعَة.

¹⁹أَعْمَالْ البْدَنْ ظَاهْرَة وْهِيَ: الزْنَى وِالنْجَاسَة وِالفْسَادْ

²⁰وِعْبَادِةْ الصْنَبْ وِالسِّحْرْ وِالعَدَاوَة وِالعَرْكْ وِالغِيرَة وِالغَشَّة وِالتَّحَزُّبْ وِالإِنْقِسَامْ وِالتَّعَصُّبْ.

²¹وِالحُسْدْ وِالسُّكْرْ وِالتَّبْذِيرْ وِالحَاجَاتْ الِّي تِشْبِهْ لْهَاذُومَا. آنَا انَّبَّهْكُمْ تَوَّا كِيفْ مَا نَبِّهْتْكُمْ قْبَلْ: الِّي يَعْمْلُوا الحَاجَاتْ هَاذِي، مَا هُمْشْ بَاشْ يُورْثُوا مَمْلِكْةْ اللهْ.

²²آمَا ثَمَرْ الرُّوحْ هُوَ: المْحَبَّة وِالفَرَحْ وِالسَّلاَمْ وْوِسْعْ البَالْ وِالبْهَاوَة وِالطِّيبَة وِالأَمَانَة

²³وِاللُّطْفْ وِالتَّحَكُّمْ فِي النَّفْسْ وْمَا ثَمَّة حَتَّى قَانُونْ يَمْنَعْ الحَاجَاتْ هَاذُمْ.

²⁴آمَا الِّي وَلاَّوْ تَابْعِينْ لِلمَسِيحْ، هُومَا صَلْبُوا الطْبِيعَة مْتَاعْ البَشَرْ مْعَ الرَّغَبَاتْ وِالشْهَاوِي.

²⁵إِذَا أَحْنَا نَحْيَاوْ بِالرُّوحْ يِلْزِمْنَا زَادَا نْعِيشُوا بِالرُّوحْ.

²⁶وْمَا نِتْفُوخْرُوشْ عْلَى بْعَضْنَا وْمَا نْعَانْدُوشْ بْعَضْنَا وْكُلْ وَاحِدْ يِحْسِدْ الآخَرْ.