Read Tunisian Arabic New Testament غَلاَطْيَة 6 Bible Online

غَلاَطْيَة 6 - Tunisian Arabic New Testament bible

غَلاَطْيَة 6

¹يَا إِخْوَة إِذَا وَاحِدْ مِنْكُمْ عْمَلْ خَطِيّة حَاوْلُوا تْرَجّْعُوهْ انْتُومَا الرُّوحَانِيِّينْ بْرُوحْ لُطْفْ وْإِنْتِ زَادَا رُدْ بَالِكْ لاَ تَعْمِلْ خَطِيّة.

²وْكُلْ وَاحِدْ فِيكُمْ يْهِزْ حِمْلْ الآخَرْ وْهَكَّا تْكَمّْلُوا شَرِيعِةْ المَسِيحْ.

³وْإِذَا وَاحِدْ ظَنْ رُوحُو شَيْء وْهُوَ حَتَّى شَيْء رَاهُو يِخْدَعْ فِي رُوحُو.

⁴وْكُلْ وَاحِدْ يْثَبِّتْ فِي الخِدْمَة مْتَاعُو وَقْتْهَا يْنَجِّمْ يِتْفُوخِرْ بِالشَّيْء الِّي يْخُصُّو هُوَ مُوشْ الِّي يْخُصْ غِيرُو.

⁵وْكُلْ وَاحِدْ بَاشْ يْهِزْ الحْمِلْ مْتَاعُو.

⁶الِّي يِتْعَلِّمْ الكِلْمَة يْشَارِكْ الِّي عَلِّمْهَا فِي الخِيرَاتْ الكُلْ.

⁷مَا تِتْخِدْعُوشْ: رَاهُو اللهْ مَا يْنَجِّمْ يْعَدّيهَا عْلِيهْ حَتَّى حَدْ، وْكُلْ مَا يَزْرْعُو الإِنْسَانْ يَحْصْدُو زَادَا.

⁸الِّي يَزْرَعْ لِلبْدَنْ مْتَاعُو، مِالبْدَنْ يَحْصِدْ الفْسَادْ. وِلِّي يَزْرَعْ لِلرُّوحْ، مِالرُّوحْ يَحْصِدْ حَيَاةْ أَبَدِيَّة.

⁹إِمَّالاَ مَا تِفْشْلُوشْ فِي عَمْلاَنْ الخِيرْ، رَاهُو كِيْجِي الوَقْتْ بَاشْ نَحْصْدُوا إِذَا مَا نِتْرْخَاوِشْ.

¹⁰مَا دَامْ عِنْدْنَا الفُرْصَة نَعْمْلُوا الخِيرْ لِلنَّاسْ الكُلْ وْبِالأَخَصْ لْأَهْلْ الإِيمَانْ.

¹¹شُوفُوا مَا اكْبِرْهَا الحْرُوفْ الِّي كْتِبْتْهَالْكُمْ بِيدِي!

¹²هَاكَا الِّي يْحِبُّوا يُظْهْرُوا بْمَظْهِرْ بَاهِي فِي البْدَنْ يْلَزّْمُوا عْلِيكُمْ بَاشْ تِطَّهْرُوا وْهُومَا يَعْمْلُوا هَاذَا بَاشْ مَا يِتْعَذّْبُوشْ بِسْبَبْ صَلِيبْ المَسِيحْ.

¹³حَتَّى هَاكَا الِّي يِطَّهْرُوا هُومَا بِيدْهُمْ مَا يَعْمْلُوشْ بِالشَّرِيعَة، آمَا يْحِبُّوكُمْ انْتُومَا تِطَّهْرُوا بَاشْ يِتْفُوخْرُوا فِي البْدَنْ مْتَاعْكُمْ.

¹⁴آمَا أنَا حَاشَانِي وْمَا نِتْفُوخِرْ كَانْ بْصَلِيبْ رَبّْنَا يَسُوعْ المَسِيحْ، الِّي بِيهْ صَارْ العَالَمْ بِالنِّسْبَة لِيَّا مَصْلُوبْ وْآنَا وَلِّيتْ بِالنِّسْبَة لِيهْ مَصْلُوبْ.

¹⁵الطْهُورْ حَتَّى شَيْء وْغِيرْ الطْهُورْ حَتَّى شَيْء، آمَا المُهِمْ إِنُّو الإِنْسَانْ يْصِيرْ خْلِيقَة جْدِيدَة.

¹⁶السَّلاَمْ وِالرَّحْمَة عْلَى كُلْ الِّي يْعِيشُوا بِالشَّيْء هَاذَا وِعْلَى إِسْرَائِيلْ اللهْ.

¹⁷بَعْدْ اليُومْ هَاذَا حَتَّى حَدْ مَا عَادْ يْزِيدْ عْلِيَّا تْعَبْ آخَرْ عْلَى خَاطِرْنِي هَازْ عَلاَمَاتْ الرَّبْ يَسُوعْ فِي بَدْنِي.

¹⁸يَا إِخْوَة نِعْمِةْ رَبّْنَا يَسُوعْ المَسِيحْ مْعَاكُمْ. آمِينْ!