Read Tunisian Arabic New Testament أَفَسُسْ 1 Bible Online

أَفَسُسْ 1 - Tunisian Arabic New Testament bible

أَفَسُسْ 1

¹مِنْ بُولُسْ الِّي هُوَ رَسُولْ المَسِيحْ يَسُوعْ بْإِرَادِةْ اللهْ، لِلقِدِّيسِينْ الِّي هُومَا مِنْ شَعْبْ اللهْ وِلِّي هُومَا أُمَنَاءْ فِي المَسِيحْ يَسُوعْ، الِّي سَاكْنِينْ فِي أَفَسُسْ.

²النِّعْمَة وِالسَّلاَمْ لِيكُمْ مِنْ عِنْدْ اللهْ بُونَا وِالرَّبْ يَسُوعْ المَسِيحْ.

³تَبَارَكْ اللهْ بُو رَبّْنَا يَسُوعْ المَسِيحْ، الِّي بَارِكْنَا فِي المَسِيحْ بْكُلْ بَرْكَة رُوحِيَّة فِي السْمَاوَاتْ.

⁴كِيمَا خْتَارْنَا فِيهْ قْبَلْ مَا تِتْخْلَقْ الدِّنْيَا بَاشْ نْكُونُوا قِدِّيسِينْ وْمَا عْلِينَاشْ لُومْ قُدَّامُو فِي المْحَبَّة.

⁵سْبِقْ وِخْتَارْنَا بِمْحَبّْتُو بَاشْ نْكُونُوا وْلاَدُو فِي يَسُوعْ المَسِيحْ حَسْبْ إِرَادْتُو.

⁶بَاشْ نُشْكْرُوا المَجْدْ مْتَاعْ نِعْمْتُو الِّي نْعِمْ بِيهَا عْلِينَا فِي ابْنُو الِّي يْحِبُّو.

⁷الِّي تِفْدِينَا بْدَمُّو وِتْغِفْرِتْ ذْنُوبْنَا بْنِعْمْتُو العْظِيمَة.

⁸الِّي فَاضْ بِيهَا عْلِينَا.

⁹عْلَى خَاطْرُو عَرِّفْنَا بِالسِّرْ الغَامِضْ مْتَاعْ إِرَادْتُو بْكُلْ حِكْمَة وْفَهْمْ كِيفْ مَا خَطِطْلُو وْعِمْلُو عْلَى طْرِيقْ المَسِيحْ.

¹⁰وِالخِطَّة هَاذِي بَاشْ يْتَمِّمْهَا فِي قَلْبْ الزْمَانْ، بَاشْ يْلِمْ كُلْ شَيْء فِيهْ المَسِيحْ، الحَاجَاتْ الِّي فِي السْمَاءْ وِالحَاجَاتْ الِّي فِي الأَرْضْ.

¹¹وْفِيهْ هُوَ اللهْ خْتَارْنَا بَاشْ نَاخْذُوا الوَرْثَة الِّي كْتِبْهَالْنَا، كِيفْ مَا اللهْ خَطِطْ وْقَرِرْ مِالأُوِّلْ.

¹²أَحْنَا سْبِقْنَا وْكَانْ عِنْدْنَا رَجَاءْ فِي المَسِيحْ بَاشْ نُشْكْرُوا مَجْدْ اللهْ.

¹³وِانْتُومَا زَادَا الِّي سْمَعْتُوا كِلْمِةْ الحَقْ الِّي هِيَ الإِنْجِيلْ الِّي خْلُصْتُوا بِيهْ وِلِّي فِيهْ هُوَ كِإِمِّنْتُوا اللهْ خْتِمْكُمْ بِالرُّوحْ القُدُسْ الِّي وْعِدْكُمْ بِيهْ،

¹⁴الرُّوحْ الِّي هُوَ عَرْبُونْ الوَرْثَة مْتَاعْنَا حَتَّى لِينْ يِتْفْدَاوْ المُخْتَارِينْ. امَّالاَ خَلِّينَا نُشْكْرُوهْ عْلَى مَجّْدُو.

¹⁵هَاذَاكَا عْلاَشْ آنَا زَادَا وَقْتِلِّي سْمَعْتْ بْإِيمَانْكُمْ بِالرَّبْ يَسُوعْ وِمْحَبِّتْكُمْ لِلمُؤْمْنِينْ الكُلْ

¹⁶بْقِيتْ دِيمَا نُشْكُرْ فِي اللهْ عْلَى خَاطِرْكُمْ وْنِتْفَكِّرْ فِيكُمْ فِي صْلاَتِي

¹⁷بَاشْ الآبْ المَجِيدْ الِّي هُوَ الاَهْ رَبّْنَا يَسُوعْ المَسِيحْ يَعْطِيكُمْ رُوحْ حِكْمَة يِكْشْفِلْكُمْ اللهْ بَاشْ تَعْرْفُوهْ

¹⁸وِيْنَوّْرِلْكُمْ قْلُوبْكُمْ بَاشْ تَعْرْفُوا الرَّجَاءْ الِّي عِنْدْكُمْ الِّي دْعَاكُمْ لِيهْ وِالغْنَى الِّي فِي مَجْدْ الوَرْثَة مْتَاعُو فِي المُؤْمْنِينْ.

¹⁹وْتَعْرْفُوا قُدْرْتُو العْظِيمَة الِّي مَا تِتْحَدَّاشْ وِلِّي ظَهِّرْهَالْنَا أَحْنَا المُؤْمْنِينْ بِالشَّيْء الِّي عَمْلُو بْقُوتُو الكْبِيرَة.

²⁰الِّي عَمْلُو فِي المَسِيحْ وَقْتِلِّي قَيّْمُوا مِنْ بِينْ المُوتَى وْقَعّْدُو عْلَى يْمِينُو فِي السْمَاوَاتْ.

²¹فُوقْ كُلْ رِئَاسَة وْسُلْطَة وْقُوَّة وِسْيَادَة وْكُلْ اسْمْ يِتْسَمَّى مُوشْ فِي الزْمَانْ هَاذَا بَرْكْ آمَا فِي الزْمَانْ الِّي جَايْ زَادَا.

²²وْحَطْ كُلْ شَيْء تَحْتْ سَاقِيهْ وْرَدُّو الرَّاسْ مْتَاعْ الحَاجَاتْ الكُلْهَا لِلكَنِيسَة

²³الِّي هِيَ الْجَسَدْ مْتَاعُو وِكْمَالُو وْهُوَ الِّي يِمْلَى كُلْ شَيْء فِي كُلْ شَيْء.