Read Tunisian Arabic New Testament أَفَسُسْ 2 Bible Online

أَفَسُسْ 2 - Tunisian Arabic New Testament bible

أَفَسُسْ 2

¹وِانْتُومَا قْبَلْ كُنْتُوا مُوتَى بِالمَعَاصِي وِالذْنُوبْ مْتَاعْكُمْ

²الِّي عِشْتُوا فِيهَا قْبَلْ وْتَبِّعْتُوا طْرِيقْ الزْمَانْ هَاذَا وْطُعْتُوا رَئِيسْ الأَرْوَاحْ الشِّرِّيرَة الِّي فِي العَالَمْ الِّي يِخْدِمْ فِي وْلاَدْ المَعْصْيَة.

³الِّي أَحْنَا الكُلْنَا زَادَا تْصَرِّفْنَا كِيفْهُمْ قْبَلْ وْتَبَّعْنَا الشَّهَوَاتْ مْتَاعْ البْدَنْ وِالأَفْكَارْ. وْبِطْبِيعِتْنَا كُنَّا وْلاَدْ مَغْضُوبْ عْلِيهُمْ كِيفْ بْقِيِّةْ النَّاسْ.

⁴آمَا اللهْ الِّي هُوَ غْنِي فِي رَحْمْتُو، وِعْلَى خَاطِرْ مْحَبّْتُو العْظِيمَة الِّي حَبّْنَا بِيهَا

⁵وْكِكُنَّا مُوتَى بِالذْنُوبْ، رَجَّعْنَا لِلحَيَاةْ مْعَ المَسِيحْ. رَاكُمْ خْلُصْتُوا بِالنِّعْمَة

⁶وْقَوِّمْنَا مْعَاهْ وْقَعِّدْنَا مْعَاهْ فِي السْمَاوَاتْ فِي المَسِيحْ يَسُوعْ.

⁷بَاشْ يْظَهِّرْ فِي الزْمَانْ الجَّايْ نِعْمْتُو العْظِيمَة الِّي بْلاَشْ حْسَابْ وِبْهَاوْتُو فِي المَسِيحْ يَسُوعْ.

⁸رَاكُمْ بِالنِّعْمَة خْلُصْتُوا بِالإِيمَانْ وْهَاذَا مُوشْ مِنْكُمْ، رَاهِي هْدِيَّة مِنْ عِنْدْ اللهْ.

⁹وْمُوشْ بِالأَعْمَالْ بَاشْ حَتَّى حَدْ مَا يِتْفُوخِرْ.

¹⁰أَحْنَا تُحْفِةْ اللهْ وْهُوَ خْلَقْنَا فِي المَسِيحْ يَسُوعْ لأَعْمَالْ صَالْحَة حَضِّرْهَا مِنْ قْبَلْ بَاشْ نَعْمْلُوهَا.

¹¹هَاذَاكَا عْلاَشْ تْذَكّْرُوا الِّي إِنْتُومَا قْبَلْ كُنْتُوا أُمَمْ مِلِّي تُولِدْتُوا. النَّاسْ الِّي قَاعْدِينْ يِطَّهْرُوا تَوَّا بِاليِدْ فِي بْدُونَاتْهُمْ يْسَمُّوكُمْ مُوشْ مْطَهّْرِينْ.

¹²فِي الوَقْتْ هَاذَاكَا كُنْتُوا بْعَادْ عْلَى المَسِيحْ وِبْرَايْنِيَّة عْلَى شَعْبْ إِسْرَائِيلْ وْمَا كَانِشْ عِنْدْكُمْ نْصِيبْ فِي العُهُودْ المَوْعُودْ بِيهَا، وْمَا عِنْدْكُمْشْ رَجَاءْ وْكَافْرِينْ بْرَبِّي فِي العَالَمْ.

¹³آمَا تَوَّا فِي المَسِيحْ يَسُوعْ انْتُومَا الِّي كُنْتُوا بْعَادْ، وَلِّيتُوا قْرَابْ بْدَمْ المَسِيحْ.

¹⁴عْلَى خَاطْرُو هُوَ سَلاَمْنَا الِّي رَدْ الإِثْنِينْ وَاحِدْ وْهَدِّمْ العَدَاوَة الِّي هِيَ الحِيطْ الِّي يْفَرِّقْ مَا بِينَاتْهُمْ.

¹⁵بِالْجَسَدْ مْتَاعُو رَدْ الوْصَايَا وِالقَوَاعِدْ مْتَاعْ الشَّرِيعَة بَاطْلَة بَاشْ يْرُدّْهُمْ الإِثْنِينْ إِنْسَانْ وَاحِدْ جْدِيدْ فِيهْ هُوَ وْهَكَّا خَلَّى النَّاسْ يْعِيشُوا فِي سَلاَمْ.

¹⁶وْصَالَحْهُمْ الإِثْنِينْ مْعَ اللهْ فِي جَسَدْ وَاحِدْ عْلَى طْرِيقْ الصَّلِيبْ الِّي نَحَّى بِيهْ العَدَاوَة.

¹⁷وْمِنْ بَاعِدْ جَا وْبَشِّرْكُمْ بِبْشَارِةْ السَّلاَمْ إِنْتُومَا الِّي كُنْتُوا بْعَادْ كِيمَا بَشِّرْ القْرَابْ هَاذُوكُمْ.

¹⁸وْبِيهْ هُوَ انَّجّْمُوا الكُلْنَا نْجِيوْ لِلآبْ بْرُوحْ وَاحِدْ.

¹⁹إِمَّالاَ إِنْتُومَا مَا عُدْتُوشْ غُرَبَاءْ وِبْرَايْنِيَّة آمَا وَلِّيتُوا مِنْ شَعْبْ اللهْ مْعَ المُؤْمْنِينْ فِي عَايِلْةْ اللهْ.

²⁰وْتِبْنِيتُوا عْلَى السَّاسْ مْتَاعْ الرُّسُلْ وِالأَنْبِيَاءْ وِالمَسِيحْ هُوَ بِيدُو حَجْرِةْ السَّاسْ.

²¹الِّي فِيهْ البَنْيْ يِتْنَظِّمْ وْيَعْلَى وِيْوَلِّي هَيْكِلْ مُقَدَّسْ فِي الرَّبْ.

²²وْفِيهْ انْتُومَا زَادَا تِبْنِيتُوا مْعَ بْعَضْكُمْ وْوَلِّيتُوا بِيتْ مْتَاعْ اللهْ بِالرُّوحْ.