Read Tunisian Arabic New Testament أَفَسُسْ 3 Bible Online

أَفَسُسْ 3 - Tunisian Arabic New Testament bible

أَفَسُسْ 3

¹هَاذَاكَا عْلاَشْ آنَا بُولُسْ مَرْبُوطْ بِسْبَبْ يَسُوعْ المَسِيحْ، عْلَى خَاطِرْكُمْ إِنْتُومَا الِّي مَا كُمْشْ يْهُودْ

²أَكِيدْ رَاكُمْ سْمَعْتُوا بِالخُطَّة مْتَاعْ اللهْ بَاشْ يَعْطِينِي نِعْمَة عْلَى خَاطِرْكُمْ.

³كِيفَاشْ اللهْ كْشِفْلِي السِّرْ الغَامِضْ عْلَى طْرِيقْ الوَحْيْ كِيفْ مَا كْتِبْتْ قْبَلْ بِاخْتِصَارْ عْلَى الشَّيْء هَاذَا

⁴وْكِتَقْرَاوْ الرِّسَالَة هَاذِي بَاشْ تِفْهْمُوا الِّي آنَا نَعْرِفْ السِّرْ الغَامِضْ مْتَاعْ المَسِيحْ.

⁵هَاكَا السِّرْ الغَامِضْ الِّي مَا عَرْفُوهِشْ النَّاسْ فِي قْدِيمْ الزْمَانْ كِيفْ مَا وْحَى بِيهْ تَوَّا عْلَى طْرِيقْ الرُّوحْ لِلرُّسُلْ المُقَدّْسِينْ وِالأَنْبِيَاءْ مْتَاعُو.

⁶الِّي الأُمَمْ مِتْشَارْكِينْ مْعَ اليْهُودْ فِي الوِرْثْ وِالْجَسَدْ وْعَنْدْهُمْ الحَقْ بَاشْ يَاخْذُوا الوَعْدْ الِّي فِي المَسِيحْ يَسُوعْ بِالإِنْجِيلْ.

⁷الِّي آنَا وَلِّيتْ خَادِمْ لِيهْ بِالمَوْهْبَة مْتَاعْ نِعْمِةْ اللهْ الِّي تِعْطَاتْلِي بْقُدْرْتُو الِّي تِخْدِمْ فِيكُمْ.

⁸النِّعْمَة هَاذِي تِعْطَاتْلِي رَغْمِلِّي آنَا أَقَلْ وْآخِرْ وَاحِدْ فِي القِدِّيسِينْ بَاشْ نْبَشِّرْ الأُمَمْ بِالغْنَى مْتَاعْ المَسِيحْ الِّي مَا يِتْحَدِّشْ.

⁹وْبَاشْ نْخَلِّي النَّاسْ يْشُوفُوا كِيفَاشْ اللهْ تَمِّمْ السِّرْ بَعْدْ مَا خَلاَّهْ مْخُبِّي مِنْ أَوِّلْ الزْمَانْ.

¹⁰وْتَوَّا عْلَى طْرِيقْ الكَنِيسَة الرِّئَاسَاتْ وِالسُّلُطَاتْ الِّي فِي السْمَاوَاتْ بَاشْ تَعْرِفْ حِكْمِةْ اللهْ.

¹¹كِيفْ مَا حَبْ رَبِّي مِنْ أَوِّلْ الزْمَانْ فِي المَسِيحْ يَسُوعْ رَبّْنَا.

¹²الِّي بِيهْ هُوَ عِنْدْنَا الجُرْأَة بَاشْ نْجِيوْ قُدَّامْ اللهْ وَاثْقِينْ بِسْبَبْ إِيمَانَّا بِيهْ.

¹³هَاذَاكَا عْلاَشْ نُطْلُبْ مِنْكُمْ بَاشْ مَا تُضْعْفُوشْ بِسْبَبْ المَشَاكِلْ الِّي نْعَانِي فِيهَا عْلَى خَاطِرْكُمْ. رَاهِي فُخْرَة لِيكُمْ.

¹⁴وْلِلسْبَبْ هَاذَا نِثْنِي رْكَايْبِي قُدَّامْ الآبْ.

¹⁵الِّي مِنُّو هُوَ تْسَمَّاتْ كُلْ عَايْلَة فِي السْمَاوَاتْ وْفِي الأَرْضْ.

¹⁶بَاشْ يَعْطِيكُمْ بِغْنَى مَجْدُو انّْكُمْ تِتْقَوُّوا بْرُوحُو فِي نْفُوسْكُمْ.

¹⁷وْيُسْكُنْ المَسِيحْ فِي قْلُوبْكُمْ بِالإِيمَانْ وْتِتْأَصّْلُوا وْتِتْبْنَاوْ عْلَى سَاسْ المْحَبَّة.

¹⁸بَاشْ تْكُونْ عِنْدْكُمْ القُوَّة انْتُومَا وِالمُؤْمْنِينْ الكُلْهُمْ بَاشْ تِفْهْمُوا شْنُوَّة العَرْضْ وِالطُّولْ وِالعِلْوْ وِالغُرْقْ مْتَاعْ مْحَبِّةْ المَسِيحْ.

¹⁹وْتَعْرْفُوا مْحَبِّةْ المَسِيحْ الِّي هِيَ أَكْبِرْ مِنْ كُلْ مَعْرْفَة وْتِتْمْلاَوْ بِغْنَى اللهْ.

²⁰الِّي بْقُدْرْتُو الِّي تِخْدِمْ فِينَا يْنَجِّمْ يَعْمِلْ أَكْثِرْ ابَّرْشَة مِلِّي نِتْصَوّْرُوا.

²¹لِيهْ المَجْدْ فِي الكَنِيسَة وْفِي المَسِيحْ يَسُوعْ حَتَّى لْآخِرْ الزْمَانْ. لِلأَبَدْ. آمِينْ.