Read Tunisian Arabic New Testament أَفَسُسْ 4 Bible Online

أَفَسُسْ 4 - Tunisian Arabic New Testament bible

أَفَسُسْ 4

¹إِمَّالاَ آنَا المَحْبُوسْ بِسْبَبْ الرَّبْ نُطْلُبْ مِنْكُمْ بَاشْ تِتْصَرّْفُوا كِيفْ مَا يْلِيقْ بِالدَّعْوَة الِّي تِدْعِيتُوا لِيهَا.

²كُونُوا مِتْوَاضْعِينْ وْطَيّْبِينْ وْبَالْكُمْ وَاسِعْ وِتْحَمّْلُوا بْعَضْكُمْ فِي المْحَبَّة.

³حَاوْلُوا أَكْثِرْ مَا تْنَجّْمُوا بَاشْ تْكُونُوا وَاحِدْ فِي الرُّوحْ وْحَافْظُوا عْلَى السَّلاَمْ الِّي يُرْبُطْكُمْ بِبْعَضْكُمْ

⁴ثَمَّة جَسَدْ وَاحِدْ وْرُوحْ وَاحِدْ، كِيفْ مَا اللهْ دْعَاكُمْ لْرَجَاءْ وَاحِدْ.

⁵رَبْ وَاحِدْ، إِيمَانْ وَاحِدْ، مَعْمُودِيَّة وَحْدَة.

⁶إِلاَهْ وْبُو وَاحِدْ لِلنَّاسْ الكُلْ، فُوقْ الكُلْ وْبِالكُلْ وْفِي الكُلْ.

⁷آمَا تِعْطَاتْ لْكُلْ وَاحِدْ فِينَا نِعْمَة بِالقَدْرْ الِّي عْطَاهُولُو المَسِيحْ.

⁸هَاذَاكَا عْلاَشْ الكْتَابْ المُقَدَّسْ يْقُولْ وَقْتِلِّي طْلَعْ لِلسْمَاء جَابْ مْرَابِيطْ وِعْطَى لِلنَّاسْ مَوَاهِبْ.

⁹طْلَعْ الفُوقْ مَعْنَاهَا الِّي هُوَ زَادَا نْزِلْ لأَوْطَى بْلاَصَة فِي الأَرْضْ.

¹⁰الِّي نْزِلْ هُوَ بِيدُو طْلَعْ فُوقْ السْمَاوَاتْ الكُلْهَا بَاشْ يِمْلَى كُلْ شَيْء.

¹¹هُوَ الِّي عْطَى مَوَاهِبْ لِلنَّاسْ بَاشْ يْكُونُوا رُسُلْ وْأُخْرِينْ أَنْبِيَاءْ وْأُخْرِينْ مُبَشّْرِينْ وْأُخْرِينْ رُعَاةْ وْمُعَلّْمِينْ.

¹²بَاشْ يْحَضِّرْ المُؤْمْنِينْ لِلخِدْمَة بَاشْ يِبْنِيوْ جَسَدْ المَسِيحْ.

¹³حَتَّى لِينْ نُوصْلُوا الكُلْنَا لْوِحْدِة الإِيمَانْ وْوِحْدِةْ مَعْرِفْةْ ابْنْ اللهْ. لْدَرْجِةْ الإِنْسَانْ الكَامِلْ لِقْيَاسْ طُولْ كَمَالْ المَسِيحْ.

¹⁴بَاشْ مَا نْكُونُوشْ وْلاَدْ صْغَارْ وْمِتْقَلّْبِينْ وْمَهْزُوزِينْ بْكُلْ رِيحْ مْتَاعْ تَعْلِيمْ جَايْ مِنْ عِنْدْ نَاسْ خُبَثَاءْ وْغَشَّاشِينْ يْغَلّْطُوا فِي النَّاسْ بِالخُبْثْ مْتَاعْهُمْ.

¹⁵آمَا نْقُولُوا الحَقْ بِالمْحَبَّة وْنِكْبْرُوا فِي كُلْ شَيْء بَاشْ نُوصْلُوا لِلِّي هُوَ الرَّاسْ الِّي هُوَ المَسِيحْ.

¹⁶وِلِّي بِيهْ هُوَ الجَسَدْ الكُلُّو مْرَكِّبْ مْعَ بَعْضُو وْيِتِلْحِمْ بِالمْفَاصِلْ الِّي تُرْبِطْ الأَعْضَاءْ مْتَاعُو مْعَ بْعَضْهَا وْوَقْتِلِّي كُلْ عُضْوْ فِيهْ يِخْدِمْ خِدْمْتُو، الجَسَدْ يِكْبِرْ وْيِتْبْنَى فِي المْحَبَّة.

¹⁷تَوَّا نْقُولْ الشَّيْء هَاذَا وْنِشْهِدْ بِيهْ فِي الرَّبْ بَاشْ مَا عَادِشْ تِتْصَرّْفُوا كِيفْ الشْعُوبْ الأُخْرَى بِسْبَبْ عْقُولاَتْهُمْ الفَارْغَة.

¹⁸فِكْرْهُمْ فِيهْ الظْلاَمْ وِبْعَادْ عْلَى الحَيَاةْ الِّي يَعْطِيهَا اللهْ بِسْبَبْ جَهْلْهُمْ الِّي جَايْ مِنْ قْسَاوِةْ قْلُوبْهُمْ.

¹⁹مَا عَادِشْ يِحْشْمُوا مِنْ حَتَّى شَيْء وْغَرْقُوا فِي النْجَاسَة كِيفْ مَا حَبُّوا.

²⁰آمَا إِنْتُومَا مَا تْعَلِّمْتُوشْ المَسِيحْ هَكَّا.

²¹اذَا كَانْكُمْ سْمَعْتُوا عْلِيهْ وْمَا دَامْكُمْ اتَّبْعُوا فِيهْ تْعَلِّمْتُوا الحَقْ الِّي فِي يَسُوعْ.

²²امَّالاَ نَحِّيوْ عْلِيكُمْ نْفُوسْكُمْ القْدِيمَة الِّي تْعَوِّدْتُوا تْعِيشُوا بِيهَا وِلِّي فَسّْدِتْهَا الشَّهَوَاتْ الخَدَّاعَة.

²³وِاتْجَدَدُوا فِي رُوحْ فِكْرْكُمْ.

²⁴وِالْبْسُوا نَفْسْكُمْ الجْدِيدَة الِّي تْخَلْقِتْ عْلَى صُورِةْ اللهْ وِلِّي تُظْهُرْ فِي البِرْ وِالقَدَاسَة الصْحَاحْ.

²⁵لِلسْبَبْ هَاذَا، نَحِّيوْ الكِذْبْ وِتْكَلّْمُوا بِالصِّدْقْ كُلْ وَاحِدْ مْعَ الآخَرْ عْلَى خَاطِرْنَا الكُلْنَا أَعْضَاءْ لِبْعَضْنَا.

²⁶إِذَا كَانْ تِتْغَشَشُوا مَا تَعْمْلُوشْ الذْنُوبْ، مَا تْخَلِّيوْشْ الشَّمْسْ تُغْرُبْ وْإِنْتُومَا مِتْغَشَشِينْ.

²⁷وْمَا تَعْطِيوْشْ الفُرْصَة لِبْلِيسْ.

²⁸خَلِّي السَّارِقْ مَا عَادِشْ يِسْرِقْ، آمَا يِخْدِمْ، يْخَدِّمْ يْدِيهْ فِي خِدْمَة شْرِيفَة بَاشْ يْنَجِّمْ يَعْطِي لِلنَّاسْ المِحْتَاجِينْ.

²⁹مَا تْخَلِّيوْشْ حَتَّى كِلْمَة خَايْبَة تُخْرُجْ مِنْ افَّامْكُمْ، كَانْ الكْلاَمْ الِّي يِبْنِي الأُخْرِينْ بْقَدْرْ مَا يِحْتَاجُوا، بَاشْ يَعْطِي نِعْمَة لِلِّي يِسْمْعُوا

³⁰وْمَا تْحَزّْنُوشْ الرُّوحْ القُدُسْ الِّي تِخْتِمْتُوا بِيهْ لِليُومْ الِّي بَاشْ تِتْفْدَاوْ فِيهْ.

³¹نَحِّيوْ عْلِيكُمْ كُلْ مْرَارَة وْنِقْمَة وْغُشْ وِعْيَاطْ وْسَبَّانْ وْكُلْ خُبْثْ

³²وْكُونُوا بَاهِينْ مْعَ بْعَضْكُمْ وْتَرْحْمُوا وِتْسَامْحُوا بْعَضْكُمْ كِيفْ مَا اللهْ سَامِحْكُمْ فِي المَسِيحْ.