Read Tunisian Arabic New Testament أَفَسُسْ 5 Bible Online

أَفَسُسْ 5 - Tunisian Arabic New Testament bible

أَفَسُسْ 5

¹انْتُومَا وْلاَدْ اللهْ إِمَّالاَ كُونُوا كِيفْ وْلاَدْ مَحْبُوبِينْ

²وْعِيشُوا فِي المْحَبَّة كِيفْ مَا المَسِيحْ حَبّْنَا وِعْطَى رُوحُو عْلَى خَاطِرْنَا قُرْبَانْ رِيحْتُو طَيّْبَة وِذْبِيحَة للهْ.

³آمَا مَا دَامْكُمْ مُؤْمْنِينْ مَا تُذْكْرُوشْ بِينَاتْكُمْ حَتَّى اسْمْ الزْنَى وْكُلْ نْجَاسَة وِلاَّ طْمَعْ.

⁴وِلاَّ الكْلاَمْ الخَايِبْ وِلاَّ التْمَسْخِيرْ وِلاَّ كْلاَمْ السْفَاهَة الِّي مَا هُمْشْ لاَيْقِينْ. فِي عُوضْ هَاذَا اشْكْرُوا اللهْ.

⁵يِلْزِمْكُمْ تَعْرْفُوا الشَّيْء هَاذَا: الِّي لاَ زَانِي وِلاَّ مَنْزُوسْ وِلاَّ طَمَّاعْ الِّي هُوَ يِعْبِدْ فِي الصْنَبْ عَنْدُو بْلاَصَة فِي مَمْلِكْةْ المَسِيحْ وِالله.

⁶مَا تْخَلِّيوْشْ حَتَّى وَاحِدْ يْغُشّْكُمْ بِالكْلاَمْ الفَارِغْ، رَاهُو بِسْبَبْ الحَاجَاتْ هَاذُومَا اللهْ يَغْضِبْ عْلَى النَّاسْ الِّي يَعْمْلُوا الحَاجَاتْ هَاذُوكُمْ.

⁷امَّالاَ مَا تْشَارْكُوهُمْشْ فِي الحَاجَاتْ هَاذُوكُمْ.

⁸قْبَلْ كُنْتُوا فِي الظْلاَمْ، آمَا تَوَّا انْتُومَا نُورْ فِي الرَّبْ. إِمَّالاَ اتْصَرّْفُوا كِيفْ وْلاَدْ النُّورْ.

⁹رَاهُو النُّورْ هُوَ الِّي يْجِيبْ بَرْشَة ثَمَرْ مْتَاعْ صْلاَحْ وْبِرْ وْحَقْ.

¹⁰حَاوْلُوا بَاشْ تِتْعَلّْمُوا الحَاجَاتْ الِّي تْرَضِّي الرَّبْ.

¹¹مَا تْشَارْكُوشْ فِي أَعْمَالْ الظْلاَمْ الِّي مَا فِيهَاشْ ثَمَرْ وْبِالعَكْسْ أَفْضْحُوهَا.

¹²رَاهُمْ حَتَّى الحَاجَاتْ الِّي يَعْمْلُوا فِيهُمْ فِي السِّرْ يِحْشِمْ الوَاحِدْ بَاشْ يَحْكِي عْلِيهُمْ.

¹³آمَا كُلْ شَيْء تُظْهُرْ حْقِيقْتُو وَقْتِلِّي يِكْشْفُو النُّورْ وْأَيْ حَاجَة تِتْكْشِفْ تْوَلِّي فِي النُّورْ.

¹⁴هَاذَاكَا عْلاَشْ تْقَالْ: فِيقْ، يَا رَاقِدْ، قُومْ مِنْ بِينْ المُوتَى، وِالمَسِيحْ بَاشْ يَعْطِيكْ نُورْ.

¹⁵إِمَّالاَ رُدُّوا بَالْكُمْ عْلَى رْوَاحْكُمْ كِيفَاشْ تِتْصَرّْفُوا. مُوشْ كِيفْ نَاسْ بْهَالِيلْ. آمَا كِيفْ نَاسْ حُكَمَاءْ

¹⁶وِاسْتْغَلُّوا الوَقْتْ عْلَى خَاطِرْ الأَيَّامْ خَايْبَة.

¹⁷هَاذَاكَا عْلاَشْ مَا تْكُونُوشْ بْهَالِيلْ، آمَا أَعْرْفُوا شْنُوَّة هِيَ ارَادِةْ اللهْ.

¹⁸وْمَا تِسْكْرُوشْ بِالشْرَابْ رَاهُو فِيهْ الفْسَادْ آمَا اتْمْلاَوْ بِالرُّوحْ القُدُسْ.

¹⁹وْكَلّْمُوا بْعَضْكُمْ بِمْزَامِيرْ وْتَسَابِيحْ وْتَرَانِيمْ رُوحِيَّة وْسَبّْحُوا الرَّبْ فِي قْلُوبْكُمْ.

²⁰تِحْمْدُوا اللهْ الآبْ فِي كُلْ وَقْتْ وِعْلَى كُلْ شَيْء بْإِسْمْ رَبّْنَا يَسُوعْ المَسِيحْ.

²¹طِيعُوا بْعَضْكُمْ كِيفْ مَا اطِّيعُوا المَسِيحْ.

²²وِالنْسَاء يْطِيعُوا رْجَالْهُمْ كِيمَا يْطِيعُوا الرَّبْ

²³عْلَى خَاطِرْ الرَّاجِلْ هُوَ رَاسْ المْرَا كِيفْ مَا المَسِيحْ هُوَ رَاسْ الكَنِيسَة، الِّي هِيَ الجَسَدْ مْتَاعُو وْهُوَ بِيدُو المُخَلِّصْ مْتَاعْهَا.

²⁴كِيفْ مَا الكَنِيسَة اطِّيعْ المَسِيحْ خَلِّي النْسَاء زَادَا يْطِيعُوا رْجَالْهُمْ فِي كُلْ شَيْء.

²⁵وِالرْجَالْ يْحِبُّوا نْسَاهُمْ كِيفْ مَا المَسِيحْ حَبْ الكَنِيسَة وِعْطَى حْيَاتُو عْلَى خَاطِرْهَا.

²⁶بَاشْ يْقَدِّسْهَا وِيْطَهِّرْهَا بِالمَاء عْلَى طْرِيقْ كِلْمْتُو.

²⁷وْيَاخُذْهَا لْرُوحُو كَنِيسَة مَجِيدَة مَا فِيهَا حَتَّى عِيبْ وْمَا هِيشْ مْشَوّْهَة وِلاَّ نَاقْصَة أَيْ حَاجَة. بَاشْ تْكُونْ مُقَدّْسَة وِبْلاَشْ عْيُوبْ.

²⁸وِالرْجَالْ يِلْزِمْهُمْ يْحِبُّوا نْسَاهُمْ كِيفْ مَا يْحِبُّوا بْدُونَاتْهُمْ، وِلِّي يْحِبْ مَرْتُو يْحِبْ رُوحُو.

²⁹وْمَا ثَمَّة حَتَّى حَدْ يَكْرَهْ بَدْنُو آمَا يْغَذِّيهْ وْيِتْلْهَى بِيهْ كِيفْ مَا يَعْمِلْ المَسِيحْ لِلكَنِيسَة.

³⁰عْلَى خَاطِرْنَا أَعْضَاءْ فِي الجَسَدْ مْتَاعُو.

³¹هَاذَاكَا عْلاَشْ الرَّاجِلْ يْخَلِّي بُوهْ وْأُمُّو وْيِتْرْبَطْ بْمَرْتُو وِيْوَلِّيوْ الإِثْنِينْ جَسَدْ وَاحِدْ.

³²السِّرْ الغَامِضْ هَاذَا عْظِيمْ وْآنَا نَحْكِي هْنَا عْلَى المَسِيحْ وِالكَنِيسَة.

³³آمَا إِنْتُومَا زَادَا خَلِّي كُلْ وَاحِدْ فِيكُمْ يْحِبْ مَرْتُو كِيفْ رُوحُو وِالمْرَا يِلْزِمْهَا تِحْتَرِمْ رَاجِلْهَا.