Read Tunisian Arabic New Testament أَفَسُسْ 6 Bible Online

أَفَسُسْ 6 - Tunisian Arabic New Testament bible

أَفَسُسْ 6

¹يَا وْلاَدْ، وَاجِبْ عْلِيكُمْ بَاشْ اطِّيعُوا وَالْدِيكُمْ وْهَاذَا هُوَ الصْوَابْ.

²«إِكْرِمْ بُوكْ وْأُمِّكْ» هَاذِي الوْصِيَّة الأُولَى الِّي فِيهَا وَعْدْ.

³«بَاشْ تَلْقَى الخِيرْ وِيْطُولْ عُمْرِكْ فِي الأَرْضْ.»

⁴وْيَا وَالْدِينْ مَا تْخَلِّيوْشْ وْلاَدْكُمْ يِتْغَشَشُوا، آمَا رَبِّيوْهُمْ وْأَدّْبُوهُمْ كِيفْ مَا يْحِبْ الرَّبْ.

⁵يَا عَبِيدْ، طِيعُوا سْيَادْكُمْ الِّي فِي الأَرْضْ بْخُوفْ وْرِعْدَة وِبْقَلْبْ صَادِقْ كِيفْ مَا اطِّيعُوا المَسِيحْ.

⁶مُوشْ كَانْ قُدَّامْ عِينِيهُمْ بَاشْ تْرَضِّيوْهُمْ آمَا اخْدْمُوهُمْ بْكُلْ قْلُوبْكُمْ كِيفْ عَبِيدْ مْتَاعْ المَسِيحْ.

⁷اخْدْمُوهُمْ بْنِيَّة صَادْقَة كَإِنّْكُمْ تِخْدْمُوا فِي الرَّبْ مُوشْ فِي النَّاسْ.

⁸اتْذَكّْرُوا الِّي الرَّبْ بَاشْ يْجَازِي كُلْ وَاحِدْ عْلَى الخِيرْ الِّي عَمْلُو، اذَا كَانْ حُرْ وِلاَّ عَبْدْ.

⁹وْإِنْتُومَا يَا أَسْيَادْ أَعْمْلُوا مْعَاهُمْ نَفْسْ الشَّيْء وْمَا تَهَدَدُوهُمْشْ وْإِنْتُومَا تَعْرْفُوا الِّي سِيدْكُمْ وْسِيدْهُمْ فِي السْمَاءْ وِلِّي هُوَ مَا يْخَيِّرْ حَدْ عْلَى الآخَرْ.

¹⁰وْفِي الإِخِّرْ، كُونُوا قْوِيِّينْ فِي الرَّبْ وْفِي قُدْرْتُو العْظِيمَة.

¹¹وِالْبْسُوا السْلاَحْ الكَامِلْ مْتَاعْ اللهْ بَاشْ تْنَجّْمُوا تِثْبْتُوا قُدَّامْ الخُطَطَ مْتَاعْ بْلِيسْ.

¹²رَانَا مَا نَاشْ نْحَارْبُوا فِي لْحَمْ وْدَمْ، آمَا رَانَا نْحَارْبُوا فِي الرِّئَاسَاتْ وِالقُوَّاتْ وْأَسْيَادْ العَالَمْ مْتَاعْ الظَّلْمَة الِّي مُوجُودَة تَوَّا، نْحَارْبُوا فِي الأَرْوَاحْ الِّي هِيَ جُنُودْ شَرْ فِي السْمَاوَاتْ.

¹³هَاذَاكَا عْلاَشْ هِزُّوا السْلاَحْ الكَامِلْ الكُلُّو مْتَاعْ اللهْ بَاشْ تْنَجّْمُوا تْقَاوْمُوا فِي يُومْ الشَّرْ وْتِثْبْتُوا لِلإِخْرْ.

¹⁴إِمَّالاَ اثْبْتُوا مِتْحَزّْمِينْ بِحْزَامْ الحَقْ وْحَاطِّينْ البِرْ كِيمَا دِرْعْ عْلَى سْدُورْكُمْ.

¹⁵وْكُونُوا حَاضْرِينْ بَاشْ تْبَشّْرُوا بْإِنْجِيلْ السَّلاَمْ

¹⁶وْزِيدْ عْلَى هَاذَا الكُلْ حُطُّوا الإِيمَانْ عْلَى سْدُورْكُمْ بَاشْ تْنَجّْمُوا تَطْفِيوْ النْبُولَة الشَّاعْلَة مْتَاعْ الشِّرِّيرْ.

¹⁷وِاقْبْلُوا الخَلاَصْ كِيفْ كَاسْكَة فُوقْ رُوسْكُمْ وْسِيفْ الرُّوحْ الِّي هُوَ كِلْمِةْ اللهْ.

¹⁸وْصَلِّيوْ فِي كُلْ وَقْتْ بْكُلْ صْلاَةْ وْطِلْبَة فِي الرُّوحْ وْدَاوْمُوا عْلَى الشَّيْء هَاذَا. وِادْعِيوْ لِلمُؤْمْنِينْ الكُلْهُمْ.

¹⁹وْلِيَّ آنَا زَادَا بَاشْ يِتْعْطَالِي الكْلاَمْ وَقْتِلِّي نِتْكَلِّمْ بَاشْ نَحْكِي بْشَجَاعَة عْلَى السِّرْ الغَامِضْ مْتَاعْ الإِنْجِيلْ.

²⁰الِّي آنَا السَّفِيرْ مْتَاعُو وِمْسَلْسِلْ عْلَى خَاطْرُو. صَلِّيوْ انِّي نِتْكَلِّمْ بْشَجَاعَة.

²¹وْإِذَا تْحِبُّوا تَعْرْفُوا أَحْوَالِي وْأَخْبَارْ الخِدْمَة مْتَاعِي، رَاهُو تِيخِيكُسْ الأَخْ المَحْبُوبْ وِالخَادِمْ الأَمِينْ فِي الرَّبْ يْخَبِّرْكُمْ بِيهَا الكُلْهَا.

²²وْآنَا بْعَثْتْهُولْكُمْ عْلَى خَاطِرْ الشَّيْء هَاذَا بَاشْ تَعْرْفُوا أَخْبَارْنَا وْبَاشْ يْشَجِّعْكُمْ.

²³سَلاَمْ لِلإِخْوَة وِمْحَبَّة مْعَ الإِيمَانْ مِنْ عِنْدْ اللهْ الآبْ وْمِنْ عِنْدْ الرَّبْ يَسُوعْ المَسِيحْ.

²⁴نِعْمِةْ اللهْ مْعَ الِّي يْحِبُّوا رَبّْنَا يَسُوعْ المَسِيحْ الكُلْهُمْ مْحَبَّة مَا تَفْنَاشْ.