Read Tunisian Arabic New Testament فِيلِبِّي 1 Bible Online

فِيلِبِّي 1 - Tunisian Arabic New Testament bible

فِيلِبِّي 1

¹مِنْ بُولُسْ وْتِيمُوثَاوُسْ، الخُدَّامْ مْتَاعْ المَسِيحْ يَسُوعْ، لِلإِخْوَة المُؤْمْنِينْ الِّي فِي فِيلِبِّي الكُلْهُمْ، الِّي هُومَا فِي المَسِيحْ يَسُوعْ، وْلِلأَسَاقْفَة وِالخُدَّامْ.

²النِّعْمَة وِالسَّلاَمْ لِيكُمْ مِنْ عِنْدْ اللهْ بُونَا وْمِنْ عِنْدْ رَبّْنَا يَسُوعْ المَسِيحْ.

³نِحْمِدْ اللهْ كُلْ مَا اذَّكِّرْتْكُمْ

⁴وِدْعِيتِلْكُمْ الكُلْكُمْ وْآنَا فَرْحَانْ فِي صْلاَتِي الكُلْهَا

⁵عْلَى خَاطِرْكُمْ شَارِكْتُوا فِي خِدْمِةْ الإِنْجِيلْ مِنْ أَوِّلْ يُومْ لْتَوَّا.

⁶وْآنَا وَاثِقْ انُّو الِّي بْدَا يَعْمِلْ فِيكُمْ فِي حَاجَة صَالْحَة بَاشْ يْكَمِّلْ يَعْمِلْهَا حَتَّى لِينْ يْجِي يُومْ المَسِيحْ يَسُوعْ.

⁷وْعِنْدِي الحَقْ بَاشْ نْحِسْ بِيكُمْ فِي الحَاجَة هَاذِي، عْلَى خَاطِرْني دِيمَا نْفَكِّرْ فِيكُمْ، وِالكُلْكُمْ مْشَارْكِينِّي فِي نِعْمِةْ اللهْ، فِي الحَبْسْ وِلاَّ كِنْدَافِعْ عْلَى الإِنْجِيلْ وِنْقَوِّيهْ.

⁸وْرَبِّي يِشْهِدْ قَدَّاشْ آنَا مِسْتَاحِجْكُمْ الكُلْ بِالحَنَانْ مْتَاعْ المَسِيحْ يَسُوعْ.

⁹وِصْلاَتِي عْلَى خَاطِرْكُمْ هِيَ هَاذِي: انّْهَا مْحَبِّتْكُمْ تْوَلِّي أَكْثِرْ فِي المَعْرْفَة وِالفَهْمْ،

¹⁰وْتِخْتَارُوا الشَّيْء الِّي خِيرْ وِتْوَلِّيوْ طَاهْرِينْ مَا عْلِيكُمْشْ لُومْ فِي يُومْ المَسِيحْ،

¹¹وْتِتْمْلاَوْ بِالثَّمَرْ مْتَاعْ الحَقْ بْيَسُوعْ المَسِيحْ، عْلَى خَاطِرْ المَجْدْ وِالحَمْدْ مْتَاعْ اللهْ.

¹²وِنْحِبْ، يَا إِخْوَة، إِنّْكُمْ تَعْرْفُوا إِنُّو الشَّيْء الِّي جْرَالِي خَلَّى الإِنْجِيلْ يِتْنْشَرْ أَكْثِرْ

¹³حَتَّى لِينْ العَسْكِرْ وِالنَّاسْ الِّي في القْصَرْ عَرْفُوا وْسَمْعُوا بِيَّا الِّي آنَا مَرْبُوطْ فِي الحَبْسْ عْلَى خَاطِرْ المَسِيحْ،

¹⁴وِالأَغْلَبِيَّة مْتَاعْ الإِخْوَة تْشَجّْعُوا عْلَى خَاطِرْنِي آنَا مَرْبُوطْ، يَاخِي وَلاَّوْ يْبَشّْرُوا بْكِلْمِةْ اللهْ بْشَجَاعَة أَكْثِرْ وْمِنْ غِيرْ خُوفْ.

¹⁵وْمَا ثَمَّاشْ شَكْ الِّي ثَمَّة شْكُونْ مِنْهُمْ الحُسْدْ وِالمَّارْيَة هُومَا الِّي مْخَلِّينْهُمْ يْبَشّْرُوا بِالمَسِيحْ، وْثَمَّة شْكُونْ يْبَشِّرْ بْنِيَّة صَافْيَة.

¹⁶هَاذُومَا بِسْبَبْ المْحَبَّة، عَارْفِينْ الِّي اللهْ خْتَارْنِي بَاشْ نْدَافِعْ عْلَى الإِنْجِيلْ.

¹⁷وْهَاذُوكُمْ بِسْبَبْ الحُسْدْ مَا يْبَشّْرُوشْ بِالمَسِيحْ بِحْقِيقَة، مَاشِي فِي بَالْهُمْ الِّي بِالشَّيْء هَاذَاكَا يْزِيدُوا يْتَعّْبُونِي أَكْثِرْ وْآنَا فِي الحَبْسْ.

¹⁸آمَا رَاهُو مَا يْهِمّْنِيشْ، مَا دَامْ المَسِيحْ قَاعِدْ يِتْبَشِّرْ بِيهْ فِي الحَالاَتْ الكُلْهَا، بْنِيَّة صَافْيَة وِلاَّ مُوشْ صَافْيَة. رَاهُو الشَّيْء هَاذَا يْفَرَّحْنِي دِيمَا، إِي نْعَمْ يْفَرَّحْنِي دِيمَا

¹⁹وْنَعْرِفْ الِّي هُوَ يْخَلِّينِي نُخْلُصْ بْفَضْلْ صَلَوَاتْكُمْ وْعُونْ رُوحْ يَسُوعْ المَسِيحْ.

²⁰الِّي نْحِبُّو وْنِتْمَنَّاهْ هُوَ انِّي عُمْرِي مَا نْخِيبْ، آمَا نْكُونْ تَوَّا وْفِي كُلْ وَقْتْ شُجَاعْ فِي الخِدْمَة بْقَلْبِي الكُلْ عْلَى خَاطِرْ مَجْدْ المَسِيحْ فِي بَدْنِي، إِذَا كَانْ عِشْتْ وِلاَّ مُتْ.

²¹الحَيَاةْ عِنْدِي هِيَ المَسِيحْ، وِالمُوتْ رِبْحْ لِيَّا.

²²آمَا اذَا كَانْ نَبْقَى حَيْ نَعْمِلْ حَاجَاتْ صَالْحَة، رَانِي مَا نَعْرِفْشْ شْنُوَّة نَخْتَارْ

²³وْآنَا حَايِرْ بِينْ حَاجْتِينْ: نْحِبْ نِمْشِي مِالدِّنْيَا هَاذِي بَاشْ نْكُونْ مْعَ المَسِيحْ، وْهَاذَا خِيرْ،

²⁴آمَا كَانْ نَبْقى مْعَاكُمْ، أحْسِنْ ليكُمْ.

²⁵وْآنَا وَاثِقْ الِّي آنَا بَاشْ نَبْقَى مْعَاكُمْ الكُلْكُمْ بَاشْ تِتْقَدّْمُوا وْتَفْرْحُوا فِي الإِيمَانْ،

²⁶وِحْضُورِي مْعَاكُمْ يْزِيدْ مَرَّة أُخْرَى فُخْرِتْكُمْ بِالمَسِيحْ يَسُوعْ.

²⁷المُهِمْ تَوَّا هُوَ انّْهَا سِيرِتْكُمْ فِي الدِّنْيَا هَاذِي تْكُونْ لاَيْقَة بِالإِنْجِيلْ مْتَاعْ المَسِيحْ، بَاشْ كِنْجِيكُمْ نْشُوفْ، وِلاَّ وْآنَا غَايِبْ نِسْمَعْ، الِّي إِنْتُومَا ثَابْتِينْ بْرُوحْ وَاحِدْ وِتْجَاهْدُوا بْقَلْبْ وَاحِدْ عْلَى خَاطِرْ الإِيمَانْ المِبْنِي عْلَى الإِنْجِيلْ.

²⁸مَا تْخَافُوشْ مِالنَّاسْ الِّي ضِدّْكُمْ فِي حَتَّى حَاجَة. هَاذَاكَا دَلِيلْ الِّي هُومَا بَاشْ يِتْهِلْكُوا وِلِّي إِنْتُومَا بَاشْ تُخْلْصُوا وْهَاذَا بْفَضْلْ رَبِّي،

²⁹رَاهُو نْعِمْ عْلِيكُمْ بَاشْ تِتْعَذّْبُوا عْلَى خَاطِرْ المَسِيحْ، مُوشْ تِمّْنُوا بِيهْ آكَاهُو،

³⁰وْإِنْتُومَا تْجَاهْدُوا كِيفْ مَا رِيتُونِي نْجَاهِدْ، وْتِسْمْعُوا تَوَّا الِّي آنَا مَا زِلْتْ نْجَاهِدْ.