Read Tunisian Arabic New Testament فِيلِبِّي 2 Bible Online

فِيلِبِّي 2 - Tunisian Arabic New Testament bible

فِيلِبِّي 2

¹يَاخِي إِنْتُومَا مِتْعَزِّينْ فِي المَسِيحْ، وْمِتْهَنِّينْ فِي المْحَبَّة، وْمِتْشَارْكِينْ فِي الرُّوحْ، وْعِنْدْكُمْ حَنَانْ وْرَحْمَة؟

²إِمَّالاَ تَمَمُوا فَرْحْتِي كِتْكُونُوا عِنْدْكُمْ رَايْ وَاحِدْ وِمْحَبَّة وَحْدَة وْقَلْبْ وَاحِدْ وْفِكْرْ وَاحِدْ،

³بْعَادْ عْلَى العْنَادْ وِالفُخْرَة، مِتْوَاضْعِينْ كِتْبَجّْلُوا الأُخْرِينْ عْلَى رْوَاحْكُمْ.

⁴حَتَّى وَاحِدْ فِيكُمْ مَا يْلَوِّجْ عْلَى مَصْلَحْتُو، آمَا يْلَوِّجْ عْلَى مَصْلَحْةْ غِيرُو.

⁵إِمَّالاَ خَلِّي يْكُونْ عِنْدْكُمْ فِكْرْ المَسِيحْ يَسُوعْ:

⁶وْهُوَ عْلَى صُورِةْ اللهْ، مَا اعْتَبَرْشْ كَوْنُو بِالضَّبْطْ كِيفْ اللهْ حَاجَة مَسْرُوقة

⁷نَقِّصْ مِنْ رُوحُو وْوَلَّى كِيفْ خَادِمْ وَلَّى كِيفْ بْنَادِمْ وِظْهُرْ فِي صُورِةْ إِنْسَانْ

⁸تْوَاضَعْ وْطَاعْ حَتَّى لِينْ مَاتْ عْلَى الصَّلِيبْ مَاتْ.

⁹لَكِنْ اللهْ رَفْعُو وْإِسْمْ فُوقْ كُلْ إِسْمْ عْطَاهْ

¹⁰بَاشْ تُسْجُدْ لإِسْمْ يَسُوعْ كُلْ رُكْبَة فِي السْمَاءْ وْفِي الأَرْضْ وْتِحْتْ الأَرْضْ

¹¹وْيِشْهِدْ كُلْ لْسَانْ الِّي يَسُوعْ المَسِيحْ هُوَ الرَّبْ بَاشْ يِتْمَجِّدْ الله الآبْ.

¹²كِيفْ مَا طُعْتُوا فِي كُلْ وَقْتْ، يَا حْبَابِي، طِيعُونِي تَوَّا وْآنَا غَايِبْ أَكْثِرْ مِلِّي طُعْتُونِي وْآنَا حَاضِرْ، وْأَسْعَاوْ بَاشْ تُخْلْصُوا بْخُوفْ وْرِعْدَة،

¹³عْلَى خَاطِرْ رَبِّي يْحَضِّرْ فِيكُمْ بَاشْ يْرُدّْكُمْ تْحِبُّوا وْتَقْدْرُوا بَاشْ تْرَضِّيوْهْ.

¹⁴وْأَعْمْلُوا كُلْ شَيْء مِنْ غِيرْ مَا تِتْشَكَّاوْ وِلاَّ تِتْعَارْكُوا،

¹⁵بَاشْ تْكُونُوا طَاهْرِينْ وْمَا عْلِيكُمْشْ لُومْ وِوْلاَدْ اللهْ مِنْ غِيرْ عِيبْ فِي جِيلْ ضَالْ فَاسِدْ، تِضْوُوا فِيهْ كِيفْ النْجُومْ فِي الدِّنْيَا،

¹⁶شَادِّينْ صْحِيحْ فِي كِلْمِةْ الحَيَاةْ بَاشْ نِتْفُوخِرْ بِيكُمْ فِي يُومْ المَسِيحْ الِّي آنَا مَا سْعِيتِشْ وْمَا تْعِبْتِشْ خْسَارَة.

¹⁷إذَا كُنْتْ مَسْكُوبْ عْلَى الذْبِيحَة وِالخِدْمَة مْتَاعْ إِيمَانْكُمْ، رَانِي فْرَحْتْ وِتْهَنِّيتْ مْعَاكُمْ الكُلْكُمْ،

¹⁸آمَا إِنْتُومَا الكُلْكُمْ أَفْرْحُوا وِاتْهَنَّاوْ مْعَايَا.

¹⁹وْنِتْمَنَّى فِي الرَّبْ يَسُوعْ بَاشْ نَبْعْثِلْكُمْ تِيمُوثَاوُسْ فِي أَقْرِبْ وَقْتْ بَاشْ نَعْرِفْ أَحْوَالْكُمْ وْقَلْبِي يِطْمَانْ.

²⁰وْمَا عِنْدِيشْ شْكُونْ كِيفُو يِتْلْهَى بِيكُمْ بْقَلْبْ وْرَبْ،

²¹رَاهُمْ الكُلْهُمْ يِخْدْمُوا فِي رْوَاحْهُمْ مُوشْ فِي يَسُوعْ المَسِيحْ.

²²وْإِنْتُومَا تَعْرْفُوا الخِبْرَة مْتَاعُو وْكِيفَاشْ خْدِمْ مْعَايَا فِي التَّبْشِيرْ كِيفْ الوْلِدْ مْعَ بُوهْ.

²³وْنِتْمَنَّى بَاشْ نَبْعِثْهُولْكُمْ وَقْتِلِّي تِتْوَضِّحْ أُمُورِي.

²⁴وْعِنْدِي ثِيقَة فِي رَبِّي الِّي آنَا زَادَا بَاشْ نْجِيكُمْ بَعْدْ شْوَيَّة.

²⁵وْشُفْتْ الِّي لاَزِمْ نَبْعْثِلْكُمْ أَبَفْرُودِيتُسْ، خُويَا وِرْفِيقِي فِي الخِدْمَة وِالجِهَادْ، هَاذَا الِّي بْعَثْتُوهْ بَاشْ يِخْدِمْنِي،

²⁶وْهُوَ مِسْتَاحِجْكُمْ الكُلْكُمْ وْمِتْقَلَّقْ عْلَى خَاطِرْكُمْ سْمَعْتُوا بِالمْرَضْ مْتَاعُو.

²⁷كَانْ مْرِيضْ بَرْشَة قْرِيبْ يْمُوتْ، آمَا اللهْ حَنْ عْليهْ وْحَنْ عْلِيَّا آنَا زَادَا، بَاشْ مَا نْزِيدِشْ نِحْزِنْ أَكْثِرْ

²⁸الشَّيْء هَاذَا خَلاَّنِي نَبْعِثْهُولْكُمْ فِيسَعْ بَاشْ كِتْشُوفُوهْ تَفْرْحُوا وِالحُزْنْ مْتَاعِي يُنْقُصْ

²⁹إِمَّالاَ اقْبْلُوهْ فِي الرَّبْ وْإِنْتُومَا فَرْحَانِينْ بَرْشَة وْإِكْرْمُوا النَّاسْ الِّي كِيفُو،

³⁰رَاهُو قْرِيبْ يْمُوتْ عْلَى خَاطِرْ خِدْمِةْ المَسِيحْ وْخَاطِرْ بِحْيَاتُو بَاشْ يْكَمِّلْ يَعْطِينِي الشَّيْء الِّي مَا نَجِّمْتُوشْ تَعْطُوهُولِي.