Read Tunisian Arabic New Testament فِيلِبِّي 3 Bible Online

فِيلِبِّي 3 - Tunisian Arabic New Testament bible

فِيلِبِّي 3

¹فِي الإِخِّرْ، يَا خْوَاتِي، أَفْرْحُوا فِي الرَّبْ. مَا يْقَلَّقْنِيشْ انِّي نِكْتْبِلْكُمْ عْلَى الحَاجَاتْ هِيَ بِيدْهَا، رَاهُو بَاهِيلْكُمْ كِنْعَاوِدْهَا.

²رُدُّوا بَالْكُمْ مِالكْلاَبْ، رُدُّوا بَالْكُمْ مِلِّي يَعْمْلُوا فِي الشَّرْ، رُدُّوا بَالْكُمْ مِنْ الطْهَارة اللِّي الْمْشَوْهَة،

³أَحْنَا أَهْلْ الطْهُورْ الحَقَّانِي عْلَى خَاطِرْنَا نِعْبْدُوا اللهْ بِالرُّوحْ وْنِتْفُوخْرُوا بِالمَسِيحْ يَسُوعْ وْمَا نْعَمّْلُوشْ عْلَى الحَاجَاتْ مْتَاعْ البْدَنْ،

⁴رَغْمِلِّي آنَا زَادَا عِنْدِي الحَقْ بَاشْ نْعَمِّلْ عْلِيهَا. إِذَا كَانْ غِيرِي مْشَى فِي بَالُو الِّي هُوَ مِنْ حَقُّو بَاشْ يْعَمِّلْ عْلَى الحَاجَاتْ مْتَاعْ البْدَنْ، رَانِي آنَا أَحَقْ مِنُّو

⁵رَانِي مْطَهِّرْ فِي النْهَارْ الثَّامِنْ مِلِّي تُولِدْتْ، وْآنَا مِنْ بَنِي إِسْرَائِيلْ، مِنْ عَرْشْ بِنْيَامِينْ، عِبْرِي مِالعِبْرَانِيِّينْ. آمَا فِي الشَّرِيعَة آنَا فَرِّيسِي،

⁶وْفِي الغِيرَة كُنْتْ مِتْشَدِدْ وْعَذِّبْتْ الكَنِيسَة، وْفِي البِرْ الِّي تْقُولْ عْلِيهْ الشَّرِيعَة آنَا مَا عْلِيَّاشْ لُومْ.

⁷آمَا الرِّبْحْ الِّي كَانْ عِنْدِي، حْسِبْتُو خْسَارَة عْلَى خَاطِرْ المَسِيحْ،

⁸وْبِالرَّسْمِي نِحْسِبْ كُلْ شَيْء خْسَارَة عْلَى خَاطِرْ الرِّبْحْ الأَكْبِرْ، وِلِّي هُوَ انِّي نَعْرِفْ المَسِيحْ يَسُوعْ رَبِّي. عْلَى خَاطْرُو خْسِرْتْ كُلْ شَيْء وِحْسِبْتْ كُلْ شَيْء فَضْلَة بَاشْ نِرْبِحْ المَسِيحْ

⁹وِنْكُونْ فِيهْ، وْمَا نْوَلِّيشْ بَارْ بِالشَّرِيعَة، آمَا بِالإِيمَانْ بِالمَسِيحْ، وْهُوَ البِرْ الِّي يَعْطِيهْ رَبِّي بِالإِيمَانْ.

¹⁰وْنَعْرِفْ المَسِيحْ وْنَعْرِفْ القُوَّة الِّي ظُهْرِتْ فِي قْيَامْتُو وِنْشَارْكُو فِي وْجَايْعُو وِنْوَلِّي كِيفُو فِي مُوتُو،

¹¹وْآنَا عِنْدِي رَجَاءْ الِّي آنَا بَاشْ نْقُومْ مِنْ بِينْ المُوتَى.

¹²وْمَا نِدَّعِيشْ الِّي آنَا رْبِحْتْ الشَّيْء هَاذَاكَا وِلاَّ وَلِّيتْ كَامِلْ، آمَا نَسْعَى لَعَلَّى نِرْبِحْ الشَّيْء الِّي رْبِحْنِي بِيهْ المَسِيحْ يَسُوعْ.

¹³يَا إِخْوَة، مَا نِعْتَبِرْشْ رُوحِي رْبِحْتْ، آمَا تْهِمّْنِي حَاجَة وَحْدَة وْهِيَ إِنِّي نِنْسَى الشَّيْء الِّي وْرَايَا وِنْجَاهِدْ عْلَى جَالْ الشَّيْء الِّي لْقُدَّامْ،

¹⁴وْنِجْرِي لِلهَدَفْ، بَاشْ نِرْبِحْ الجَايْزَة الِّي هِيَ دَعْوِةْ اللهْ الِّي هِيَ مِالسْمَاءْ فِي المَسِيحْ يَسُوعْ.

¹⁵أَحْنَا الكُلْنَا، الِّي كَامْلِينْ، يِلْزِمْنَا يْكُونْ عِنْدْنَا الرَّايْ هَاذَا. وْكَانْ عِنْدْكُمْ رَايْ آخَرْ، رَاهُو اللهْ بَاشْ يْنَوِّرْهُولْكُمْ.

¹⁶آمَا تَوَّا، خَلِّينَا نْشِدُّوا صْحِيحْ فِي الشَّيْء الِّي تَبَّعْنَاهْ حَتَّى لْتَوَّا وِنْكُونُوا صَادْقِينْ.

¹⁷أَعْمْلُوا كِيفِي، يَا الإِخْوَة، وْشُوفُوا النَّاسْ الِّي يِتْصَرّْفُوا كِيفْنَا.

¹⁸قُلْتِلْكُمْ دِيمَا، وِنْقُولْ تَوَّا وْعِينَيَّ تِجْرِي بِالدْمُوعْ، ثَمَّة بَرْشَة نَاسْ يِتْصَرّْفُوا فِي حْيَاتْهُمْ كِيفْ مَا يِتْصَرّْفُوا الأَعْدَاءْ مْتَاعْ صَلِيبْ المَسِيحْ.

¹⁹هَاذُومَا عَاقْبِتْهُمْ الهْلاَكْ، وْإِلاَهْهُمْ كِرْشْهُمْ، وْفُخْرُتْهُمْ عَارْهُمْ، وْمَا يْفَكّْرُوا كَانْ فِي أُمُورْ الدِّنْيَا.

²⁰آمَا أَحْنَا، رَاهِي بْلاَدْنَا فِي السْمَاءْ وْمِنْهَا نِسْتَنَّاوْ وْإِحْنَا مِسْتَاحْجِينْ جَيَّانْ المُخَلِّصْ مْتَاعْنَا الرَّبْ يَسُوعْ المَسِيحْ.

²¹وْهُوَ الِّي يْبَدِّلْ بْدَنَّا البْسِيطْ، وِيْرُدُّوا عْلَى صُورِةْ جَسَدُو المَجِيدْ بْقُدْرْتُو الِّي يُحْكُمْ بِيهَا فِي كُلْ شَيْء.