Read Tunisian Arabic New Testament كُولُوسِي 1 Bible Online

كُولُوسِي 1 - Tunisian Arabic New Testament bible

كُولُوسِي 1

¹مِنْ بُولُسْ رَسُولْ المَسِيحْ يَسُوعْ بْمَشِيئِةْ اللهْ وْمِنْ خُونَا تِيمُوثَاوُسْ

²لِلمُؤْمْنِينْ الِّي فِي كُولُوسِّي، الإِخْوَة الِّي ثَابْتِينْ فِي المَسِيحْ. النِّعْمَة وِالسَّلاَمْ عْلِيكُمْ مِنْ اللهْ بُونَا.

³نِحْمِدْ اللهْ بُو رَبّْنَا يَسُوعْ المَسِيحْ، فِي كُلْ مَرَّة نْصَلِّيوْ فِيهَا عْلَى خَاطِرْكُمْ،

⁴عْلَى الشَّيْء الِّي بْلَغْنَا عْلَى إِيمَانْكُمْ بِالمَسِيحْ يَسُوعْ وِمْحَبِّتْكُمْ لِلمُؤْمْنِينْ الكُلْهُمْ

⁵وِالرَّجَاءْ الِّي حَضِّرْهُولْكُمْ اللهْ فِي السْمَاوَاتْ، وْهُوَ الرَّجَاءْ الِّي سْمَعْتُوا بِيهْ فِي كْلاَمْ الحَقْ، الِّي هُوَ الإِنْجِيلْ

⁶الِّي وْصِلْكُمْ كِيمَا وْصُلْ لِلعَالَمْ الكُلُّو، وِبْدَا يُثْمُرْ وْيتِنْشَرْ فِيهْ كِيفْ مَا ثْمُرْ وْتِنْشَرْ مَا بِينَاتْكُمْ مِلِّي سْمَعْتُوا بْنِعْمِةْ اللهْ وِعْرَفْتُوهَا بِالحَقْ.

⁷وْهَاذَا تْعَلِّمْتُوهْ مِنْ أَبَفْرَاسْ، رْفِيقْنَا الِّي نْحِبُّوهْ فِي الخِدْمَة مْتَاعْ اللهْ وِالخَادِمْ الأَمِينْ لِلمَسِيحْ عِنْدْكُمْ.

⁸وْهُوَ الِّي خَبِّرْنَا بِمْحَبِّتْكُمْ الِّي في الرُّوحْ.

⁹هَاذَاكَا عْلاَشْ نْصَلِّيلْكُمْ فِي كُلْ وَقْتْ، مِلِّي سْمَعْنَا عْلِيكُمْ الشَّيْء هَاذَاكَا، وْنُطْلُبْ مِنْ رَبِّي بَاشْ يِمْلاَكُمْ بِالمَعْرْفَة مْتَاعْ إِرَادْتُو وْبِالحِكْمَة وِالفَهْمْ مْتَاعْ الرُّوحْ،

¹⁰بَاشْ تِتْصَرّْفُوا فِي حْيَاتْكُمْ كِيمَا يْلِيقْ بِالرَّبْ وْيِرْضِيهْ بِالكَامِلْ وْتُثْمْرُوا فِي الأَعْمَالْ الصَّالْحَة وْتِكْبْرُوا فِي مَعْرِفْةْ اللهْ،

¹¹وْتِتْقَوُّوا بِالقُوَّة الكُلْهَا الِّي فِي قُدْرْتُو المَجِيدَة بَاشْ تِتْحَمّْلُوا كُلْ شَيْء وْإِنْتُومَا فَرْحَانِينْ وْثَابْتِينْ بِالكَامِلْ وْصَابْرِينْ بِالبَاهِي،

¹²حَامْدِينْ الآبْ الِّي رَدّْكُمْ مِسْتْحَقِّينْ بَاشْ تْشَارْكُوا القِدِّيسِينْ فِي الوَرْثَة مْتَاعْهُمْ كِتُدْخْلُوا مْعَاهُمْ فِي النُّورْ.

¹³وْهُوَ الِّي نَجَّانَا مِالسُّلْطَة مْتَاعْ الظْلاَمْ وْهَزّْنَا لْمَمْلِكْةْ إِبْنُو الِّي يْحِبُّو،

¹⁴وْوَلِّينَا مِفْدِيِّينْ فِيهْ، مَعْنَاهَا ذْنُوبْنَا مَغْفُورَة.

¹⁵هُوَ صُورِةْ اللهْ الِّي مَا يِتْشَافِشْ وِالإِبْنْ الِّي أَعْلَى مِالمَخْلُوقَاتْ الكُلْهَا.

¹⁶وْبِيهْ هُوَ اللهْ خْلَقْ الحَاجَاتْ الِّي تِتْشَافْ الكُلْهَا فِي السْمَاوَاتْ وْفِي الأَرْضْ وِلِّي مَا تِتْشَافِشْ: مُلُوكْ وِلاَّ أَسْيَادْ وِلاَّ رُؤَسَاءْ وِلاَّ سْلاَطِينْ. كُلْ شَيْء تِخْلَقْ بِيهْ هُوَ وْلِيهْ هُوَ.

¹⁷كَانْ قْبَلْ كُلْ شَيْء وْفِيهْ يِتْكَوِّنْ كُلْ شَيْء.

¹⁸هُوَ رَاسْ الْجَسَدْ، مَعْنَاهَا رَاسْ الكَنِيسَة، وْهُوَ البِدَايَة وِالبَدْرِي مْتَاعْ الِّي قَامُوا مِنْ بِينْ المُوتَى بَاشْ يْكُونْ هُوَ الأُوِّلْ فِي كُلْ شَيْء،

¹⁹رَاهُو اللهْ رْضَى بَاشْ يْحُطْ فِيهْ صِفَاتُو الكُلْهَا.

²⁰وِالله يْصَالِحْ بِيهْ كُلْ شَيْء مْعَ رُوحُو، فِي الأَرْضْ كِيمَا فِي السْمَاوَاتْ، وِبْدَمُّو عْلَى الصَّلِيبْ وَلَّى ثَمَّة سَلاَمْ.

²¹وِقْبَلْ كُنْتُوا بْرَايْنِيَّة عْلَى اللهْ وِالأَعْدَاءْ مْتَاعُو بْأَفْكَارْكُمْ وْأَعْمَالْكُمْ الخَايْبَة، آمَا تَوَّا رَاهُو صَالِحْكُمْ

²²فِي الْجَسَدْ البَشَري مْتَاعْ المَسِيحْ، عْلَى طْرِيقْ المُوتْ بَاشْ تَبْقَاوْ فِي مَحْضِرْ اللهْ قِدِّيسِينْ مِنْ غِيرْ عِيبْ وْمَا عْلِيكُمْشْ لُومْ

²³بْشَرْطْ إِنّْكُمْ تِثْبْتُوا فِي الإِيمَانْ مِبْنِينْ عْلَى سَاسْ صْحِيحْ وْمَا تِتْرَدَدُوشْ وْمَا تِبْعْدُوشْ عْلَى الرّجَاءْ مْتَاعْ الإِنْجِيلْ الِّي سْمَعْتُوا بِيهْ وِوْصُلْ لِلمَخْلُوقَاتْ الكُلْهَا الِّي فِي الأَرْضْ، وْآنَا بُولُسْ وَلِّيتْ الخَادِمْ مْتَاعُو.

²⁴وْآنَا تَوَّا نَفْرَحْ بِالعْذَابْ الِّي نْعَانِي فِيهْ عْلَى خَاطِرْكُمْ، وِنْشَارِكْ فِي الوْجَايِعْ مْتَاعْ المَسِيحْ هِيَ بِيدْهَا فِي بَدْنِي عْلَى خَاطِرْ الْجَسَدْ مْتَاعُو الِّي هُوَ الكَنِيسَة

²⁵الِّي وَلِّيتْ نِخْدِمْ فِيهَا كِيفْ مَا رَبِّي خَطِّطْ عْلَى خَاطِرْكُمْ، بَاشْ كِلْمِةْ اللهْ اتِّمْ بِالكَامِلْ،

²⁶وْهِيَ السِّرْ الِّي اللهْ خَبَّاهْ عْلَى طُولْ الدْهُورْ وِالأَجْيَالْ وْكِشْفُو تَوَّا لِلقِدِّيسِينْ مْتَاعُو

²⁷الِّي رَبِّي حَبّْهُمْ يَعْرْفُوا قَدَّاشْ السِّرْ هَاذَا كَانْ غْنِي وْمَجِيدْ عِنْدْ النَّاسْ الِّي مَا هُمْشْ يْهُودْ، السِّرْ هَاذَا هُوَ انُّو المَسِيحْ فِيكُمْ هُوَ الرّجَاءْ مْتَاعْ المَجْدْ.

²⁸نْخَبّْرُوا بِيهْ النَّاسْ الكُلْهُمْ وِانَّبْهُوهُمْ وِنْعَلّْمُوهُمْ بِالحِكْمَة الكُلْهَا بَاشْ نْرُدُّوا كُلْ إِنْسَانْ نَاضِجْ فِي المَسِيحْ.

²⁹وِعْلَى خَاطِرْ الشَّيْء هَاذَا نِتْعِبْ وِنْجَاهِدْ بْفَضْلْ قُدْرْتُو الِّي تِخْدِمْ فِيَّ بْقُوَّة.