Read Tunisian Arabic New Testament كُولُوسِي 2 Bible Online

كُولُوسِي 2 - Tunisian Arabic New Testament bible

كُولُوسِي 2

¹وِنْحِبّْكُمْ تَعْرْفُوا قَدَّاشْ نْجَاهِدْ عْلَى خَاطِرْكُمْ انْتُومَا وِلِّي فِي لاَوْدُكِيَّة وِلِّي مَا شَافُونِيشْ الكُلْهُمْ،

²بَاشْ قْلُوبْهُمْ تِتْشَجَّعْ وِيْكُونُوا مِتَّحْدِينْ بِالمْحَبَّة، بَاشْ يْوَلِّيوْ غُنْيَا فِي كُلْ شَيْء كِيِفْهْمُوا بِالكَامِلْ وِيْكُونُوا مِتْأَكّْدِينْ وَقْتِلِّي يَعْرْفُوا سِرْ اللهْ، الِّي هُوَ المَسِيحْ،

³عْلَى خَاطْرُو هُوَ الِّي مُوْجُودَة فِيهْ كْنُوزْ الحِكْمَة وِالمَعْرْفَة الكُلْهَا.

⁴نْقُولْ الشَّيْء هَاذَا بَاشْ حَتَّى حَدْ مَا يْغُشّْكُمْ بِالكْلاَمْ الحْلُو.

⁵رَغْمِلِّي آنَا غَايِبْ عْلِيكُمْ بْبَدْنِي، رَانِي مْعَاكُمْ بِالرُّوحْ، نَفْرَحْ كِنْشُوفْكُمْ مْنَظّْمِينْ وْثَابْتِينْ فِي الإِيمَانْ بِالمَسِيحْ.

⁶إِمَّالاَ عِيشُوا فِي الرَّبْ يَسُوعْ المَسِيحْ كِيفْ مَا قْبِلْتُوهْ،

⁷مَادِّينْ عْرُوقْكُمْ وْمِبْنِينْ فِيهْ وْسَاسْكُمْ صْحِيحْ فِي الإِيمَانْ كِيفْ مَا تْعَلِّمْتُوا، شَاكْرِينْ بَرْشَة عْلَى كُلْ شَيْء.

⁸وْرُدُّوا بَالْكُمْ لَوَاحِدْ يِسْحْرِلْكُمْ عْقُولْكُمْ بِكْلاَمْ الفَلْسْفَة وِالغَشَّة الزَّايْدَة الِّي مِبْنِيَّة عْلَى التَّقَالِيدْ مْتَاعْ البَشَرْ الِّي تْخُصْ الحَاجَاتْ القْوِيَّة الِّي مَا تِتْشَافِشْ فِي الدِّنْيَا، مُوشْ عْلَى المَسِيحْ.

⁹بَاشْ فِي المَسِيحْ تِتْوْجِدْ صِفَاتْ اللهْ الكُلْهَا فِي البْدَنْ،

¹⁰بَاشْ تِتْمْلاَوْ بِالمَسِيحْ الِّي هُوَ الرَّاسْ مْتَاعْ كُلْ رِئَاسَة وْسُلْطَة رُوحِيَّة.

¹¹وِالطْهُورْ الِّي اطَّهَّرْتُوهْ فِي المَسِيحْ، مُوشْ بِالِيْدِينْ، آمَا بْتَنْحِيتْ بْدَنْ الخَطِيّة البَشَري، وْهَاذَا هُوَ الطْهُورْ مْتَاعْ المَسِيحْ.

¹²إِنْتُومَا وَقْتِلِّي تْعَمِّدْتُوا فِي المَسِيحْ تِدْفِنْتُوا مْعَاهْ وْقُمْتُوا مْعَاهْ زَادَا، عْلَى خَاطِرْكُمْ امِّنْتُوا بْقُدْرِةْ اللهْ الِّي قَيّْمُو مِنْ بِينْ المُوتَى.

¹³كُنْتُوا مُوتَى فِي ذْنُوبْكُمْ وْمَا كُنْتُوشْ مْطَهّْرِينْ فِي البْدَنْ، يَاخِي اللهْ حْيَاكُمْ مْعَ المَسِيحْ وْسَامِحْكُمْ عْلَى ذْنُوبْكُمْ الكُلْهَا.

¹⁴وِمْحَى الكِمْبْيَالْ الِّي لَزّْمَاتُوعْلِينَا الفَرَايِضْ وِلِّي مَا كَانِشْ فِي صَالِحْنَا، وْنَحَّاهْ وْسَمّْرُو عْلَى الصَّلِيبْ،

¹⁵وْنَحَّى السْلاَحْ مْتَاعْ الرُّؤَسَاءْ وِلِّي عِنْدْهُمْ سُلْطَة رُوحِيَّة وْخَلاَّهُمْ عِبْرَة، هَزّْهُمْ مْرَابِيطْ قُدَّامْ النَّاسْ كِغْلِبْهُمْ فِي الصَّلِيبْ.

¹⁶مَا تْخَلِّيوْشْ حَتَّى وَاحِدْ يُحْكُمْ عْلِيكُمْ فِي المَاكْلَة وِالشْرَابْ وِلاَّ فِي الأَعْيَادْ وْطْلُوعْ الهْلاَلْ وِالأَسْبَاتْ،

¹⁷هَاذِي الكُلْهَا مَاهِي إِلاَّ ظِلْ مْتَاعْ الحَاجَاتْ الِّي بَاشْ تَاقَعْ فِي المُسْتَقْبِلْ، آمَا الحْقِيقَة رَاهِي المَسِيحْ.

¹⁸وْمَا تْخَلِّيوْشْ حَتَّى وَاحِدْ يْخَسِّرْكُمْ وِيْنَحِّيلْكُمْ الجَايْزَة كِيْظَهّْرِلْكُمْ الِّي هُوَ مِتْوَاضَعْ وْيِعْبِدْ المْلاَيْكَة وْيُحْكُمْ عْلَى النَّاسْ الأُخْرِينْ، مَنْفُوخْ بِالتَّكَبُّرْ وِالرَّايْ الفَاسِدْ مْتَاعْ البَشَرْ،

¹⁹وْمَاهُوشْ مْكَبِّشْ فِي الرَّاسْ، وِلِّي بِيهْ يِتْقَوَّى الْجَسَدْ الكُلُّو وِيْشِدْ فِي بَعْضُو بِالضْلُوعْ وِالمْفَاصِلْ بَاشْ يِكْبِرْ بْقُدْرِةْ رَبِّي.

²⁰اذَا كَانْكُمْ مُتُّوا مْعَ المَسِيحْ فِي مَا يْخُصْ الحَاجَاتْ القْوِيَّة الِّي مَا تِتْشَافِشْ فِي الدِّنْيَا، عْلاَشْ تْعِيشُوا كَإِنّْكُمْ تَابْعِينْ لِلعَالَمْ هَاذَا وِاطِّيعُوا فِي الفَرَايِضْ هَاذِي:

²¹«مَا تْمِسِّشْ، مَا تْذُوقِشْ الشَّيْء هَاذَا، مَا تْشِدِّشْ الشَّيْء هَاذَاكَا.»

²²وْهِيَ الكُلْهَا حَاجَاتْ تِفْنَى كِنَعْمْلُوهَا؟ إِي نْعَمْ، هِيَ أَحْكَامْ وْتَعَالِيمْ مْتَاعْ البَشَرْ،

²³تُظْهُرْ الِّي هِيَ فِيهَا الحِكْمَة بالعِبَادَة الِّي مْلَزّْمَة عْلَى النَّاسْ وَقْتِلِّي الإِنْسَانْ يْهِينْ بَدْنُو وِيْهَبِّطْ مِنْ رُوحُو، وِالحَاجَاتْ هَاذِي مَا عِنْدْهَاشْ قِيمَة وْمَا تْنَحِّيشْ الشْهَاوِي مْتَاعْ البَشَرْ.