Read Tunisian Arabic New Testament كُولُوسِي 3 Bible Online

كُولُوسِي 3 - Tunisian Arabic New Testament bible

كُولُوسِي 3

¹وْإِذَا كَانْكُمْ قُمْتُوا مْعَ المَسِيحْ، إِمَّالاَ اسْعَاوْ لِلحَاجَاتْ الِّي فِي السْمَاءْ وِينْ المَسِيحْ قَاعِدْ عْلَى يْمِينْ اللهْ.

²فَكّْرُوا فِي الحَاجَاتْ الِّي فِي السْمَاءْ، مُوشْ فِي الحَاجَاتْ الِّي فِي الأَرْضْ،

³رَاكُمْ مُتُّوا وِحْيَاتْكُمْ مَسْتُورَة مْعَ المَسِيحْ فِي اللهْ.

⁴وْوَقْتِلِّي يُظْهُرْ المَسِيحْ الِّي هُوَ حْيَاتْكُمْ، إِنْتُومَا زَادَا تُظْهْرُوا مْعَاهْ فِي مَجْدُو.

⁵إِمَّالاَ، إِقْضِيوْ عْلَى الحَاجَاتْ مْتَاعْ الأَرْضْ الِّي فِيكُمْ كِيفْ الزْنَى وِالنْجَاسَة وِالتَّسَيُّبْ وِالشْهَاوِي الخَايْبَة وِالطْمَعْ، الِّي هُوَ عْبَادِةْ الصْنَبْ،

⁶وِالحَاجَاتْ هَاذِيكَا تْجِيبْ الغَضَبْ مْتَاعْ اللهْ عْلَى وْلاَدْ الحْرَامْ.

⁷وْمِنْ بِينْهُمْ انْتُومَا قْبَلْ وَقْتِلِّي كُنْتُوا تَعْمْلُوا فِي الحَاجَاتْ هَاذُوكُمْ.

⁸آمَا تَوَّا نَحِّيوْ عْلِيكُمْ الحَاجَاتْ هَاذُومَا الكُلْهُمْ الِّي هُومَا الغَضَبْ وِالنِّقْمَة وِالخُبْثْ وِالكُفْرْ. مَا تْقُولُوشْ الكْلاَمْ الخَايِبْ،

⁹وْمَا تِكْذْبُوشْ عْلَى بْعَضْكُمْ، عْلَى خَاطِرْكُمْ نَحِّيتُوا الإِنْسَانْ القْدِيمْ وِعْمَايْلُوا الكُلْهَا،

¹⁰وِلْبِسْتُوا الإِنْسَانْ الجْدِيدْ الِّي يِتْجَدِدْ فِي المَعْرْفَة عْلَى صُورِةْ الِّي خَلْقُو.

¹¹وْلِهْنَا مَا عَادِشْ ثَمَّة يْهُودِي وِلاَّ مُوشْ يْهُودِي، وْلاَ مْطَهِّرْ وِلاَّ مُوشْ مْطَهِّرْ، وْلاَ رُومِي وِلاَّ بَرْبَرْ، وْلاَ عَبْدْ وِلاَّ حُرْ، آمَا المَسِيحْ الِّي هُوَ كُلْ شَيْء وْفِي كُلْ شَيْء.

¹²وْإِنْتُومَا الِّي خْتَارْكُمْ اللهْ وْقَدِّسْكُمْ وْحَبّْكُمْ، البْسُوا الحَنَانْ والرَّأْفَة وِاللُّطْفْ وِالتَّوَاضُعْ وِالبْهَاوَة وِالصَّبْرْ.

¹³تْحَمّْلُوا بْعَضْكُمْ، وْسَامْحُوا بْعَضْكُمْ اذَا كَانْ وَاحِدْ مِنْكُمْ شَاكِي بِالآخَرْ. كِيفْ مَا سَامَحْكُمْ الرَّبْ، إِنْتُومَا زَادَا سَامْحُوا.

¹⁴وِالْبْسُوا المْحَبَّة فُوقْ هَاذَا الكُلُّو، رَاهِي هِيَ الرْبَاطْ الِّي يْخَلِّيكُمْ كَامْلِينْ.

¹⁵وْخَلِّيوْ سَلاَمْ المَسِيحْ الِّي اللهْ دْعَاكُمْ لِيهْ يْسَيْطِرْ عْلَى قْلُوبْكُمْ، بَاشْ تْوَلِّيوْ جَسَدْ وَاحِدْ، كُونُوا شَاكْرِينْ.

¹⁶خَلِّي كِلْمِةْ المَسِيحْ تُسْكُنْ بِينَاتْكُمْ بِغْنَاهَا الكُلُّو بَاشْ تْعَلّْمُوا وِتْنَبّْهُوا بْعَضْكُمْ بِالمَزَامِيرَ وِالتَّسَابِيحْ وِالغْنَايَاتْ الرُّوحِيَّة بْنِعْمَة وبْكُلْ حِكْمَة، وِانْتُومَا تْغَنِّيوْ للهْ مِنْ قْلُوبْكُمْ.

¹⁷وْمَهْمَا يْكُونْ قُولْكُمْ وْفِعْلْكُمْ، خَلِّيهْ يْكُونْ بْإِسْمْ الرَّبْ يَسُوعْ، حَامْدِينْ بِيهْ اللهْ الآبْ.

¹⁸يَا نْسَاء طِيعُوا رْجَالْكُمْ كِيفْ مَا يْلِيقْ بْرَبِّي.

¹⁹يَا رْجَالْ، حِبُّوا نْسَاكُمْ وْمَا تْكُونُوشْ قَاسِينْ عْلِيهُمْ.

²⁰يَا الوْلاَدْ، طِيعُوا وَالْدِيكُمْ فِي كُلْ شَيْء عْلَى خَاطِرْ هَاذَا يْرَضِّي الرَّبْ.

²¹يَا البَّيَّانْ، مَا تْغَشَشُوشْ وْلاَدْكُمْ بَاشْ مَا يَيْأْسُوشْ.

²²يَا العَبِيدْ، طِيعُوا سْيَادْكُمْ فِي الأَرْضْ فِي كُلْ شَيْء، مُوشْ قُدَّامْ عِينِيهُمْ كِيفْ الِّي يْرَضِّي فِي النَّاسْ، آمَا بْقَلْبْ طَاهِرْ وِيْخَافْ رَبِّي.

²³وْأَيْ حَاجَة تَعْمْلُوهَا أَعْمْلُوهَا مِنْ كُلْ قْلُوبْكُمْ كَإِنّْهَا لِلرَّبْ مُوشْ لِلنَّاسْ،

²⁴وْأَعْرْفُوا إِنُّو الرَّبْ بَاشْ يْجَازِيكُمْ بْمِيرَاثُو، عْلَى خَاطِرْكُمْ إِنْتُومَا تِخْدْمُوا فِي الرَّبْ المَسِيحْ.

²⁵آمَا الِّي يَعْمِلْ الشَّرْ رَاهُو بَاشْ يِتْعَاقِبْ عْلَى الشَّيْء الِّي عَمْلُو، وْمَا ثَمَّاشْ فَرْقْ بِينْ وَاحِدْ وِالآخِرْ.