Read Tunisian Arabic New Testament كُولُوسِي 4 Bible Online

كُولُوسِي 4 - Tunisian Arabic New Testament bible

كُولُوسِي 4

¹يَا الأَسْيَادْ عَامْلُوا العَبِيدْ مْتَاعْكُمْ بِالعَدْلْ وِالمُسَاوَاتْ وْأَعْرْفُوا الِّي إِنْتُومَا زَادَا عِنْدْكُمْ سِيدْ فِي السْمَاءْ.

²دَاوْمُوا عْلَى الصَّلاَةْ وْأَحْرْصُوا إِنّْكُمْ تْكُونُوا فِيهَا شَاكْرِينْ.

³وْإِدْعِيوْلْنَا أَحْنَا زَادَا بَاشْ اللهْ يْحِلِّلْنَا بَابْ الكْلاَمْ بَاشْ نْبَشّْرُوا بِالسِّرْ مْتَاعْ المَسِيحْ. وْآنَا فِي الحَبْسْ عْلَى خَاطْرُو،

⁴بَاشْ نْظَهّْرُو كِيفْ مَا هُوَ مَلْزُومْ عْلِيَّ بَاشْ نِتْكَلِّمْ.

⁵اتْصَرّْفُوا بْحِكْمَة وَقْتِلِّي تِتْعَامْلُوا مْعَ النَّاسْ الِّي مَا هُمْشْ مُؤْمْنِينْ، وِاسْتْغَلُّوا الفُرْصَة المُنَاسْبَة.

⁶خَلِّي كْلاَمْكُمْ دِيمَا فِيهْ نِعْمَة، حْلُو وِيْفِيدْ، وْهَكَّا تَعْرْفُوا كِيفَاشْ يِلْزِمْكُمْ تْجَاوْبُوا كُلْ إِنْسَانْ.

⁷تِيخِيكُسْ خُونَا الِّي نْحِبُّوهْ وِالخَادِمْ الأَمِينْ وِرْفِيقْنَا فِي خِدْمِةْ الرَّبْ بَاشْ يْخَبِّرْكُمْ عْلَى حْوَالِي الكُلْهَا.

⁸بْعَثْتْهُولْكُمْ إِنْتُومَا عْلَى الشَّيْء هَاذَا بَاشْ تَعْرْفُوا احْوَالْنَا وِيْشَجِّعْكُمْ،

⁹وِبْعَثْتْ مْعَاهْ أُونُسِيمُوسْ، خُونَا الأَمِينْ الِّي نْحِبُّو، وْهُوَ وَاحِدْ مِنْكُمْ. وْهُومَا بَاشْ يْخَبّْرُوكُمْ بِلِّي يَاقَعْ عِنْدْنَا الكُلُّو.

¹⁰يْسَلِّمْ عْلِيكُمْ أَرِسْتَرْخُسْ رْفِيقِي فِي الحَبْسْ، وْمَرْقُسْ وِلْدْ عَمْ بَرْنَابَا، وْهُوَ الِّي وَصِّيتْكُمْ عْلِيهْ، رَحّْبُوا بِيهْ إِذَا كَانْ جَاكُمْ،

¹¹وْيَسُوعْ الِّي يْنَادِيوْلُو يُوسْتُسْ، وْهَاذُومَا مِاليْهُودْ، وْهُومَا وَحَّدْهُمْ الِّي يِخْدْمُوا مْعَايَا فِي مَمْلِكْةْ اللهْ، وْشَجّْعُونِي.

¹²يْسَلِّمْ عْلِيكُمْ أَبَفْرَاسْ، وْهُوَ زَادَا وَاحِدْ مِنْكُمْ وْعَبْدْ المَسِيحْ يَسُوعْ، دِيمَا يْجَاهِدْ فِي صْلاَتُو عْلَى خَاطِرْكُمْ بَاشْ تُنْضْجُوا وِتْكُونُوا مِتْأَكّْدِينْ بِالكَامِلْ مِالشَّيْء الِّي يْحِبُّو اللهْ الكُلُّو.

¹³وْآنَا نِشْهِدْلُو الِّي هُوَ يِتْعِبْ بَرْشَة فِي الخِدْمَة عْلَى خَاطِرْكُمْ إِنْتُومَا وِلِّي فِي لاَوْدُكِيَّة وْهِيرَابُولِيسْ.

¹⁴وِيْسَلِّمْ عْلِيكُمْ لُوقَا الطْبِيبْ الِّي نْحِبُّو وْدِيمَاسْ.

¹⁵سَلّْمُوا عْلَى الإِخْوَة الِّي فِي لاَوْدُكِيَّة وِعْلَى نِمْفَا وِالكَنِيسَة الِّي تِجْتَمَعْ فِي دَارْهَا.

¹⁶وْبَعْدْ مَا تَقْرَاوْ الجْوَابْ هَاذَا، أَبْعْثُوهْ لْكَنِيسِةْ لاَوْدُكِيَّة بَاشْ يِتْقْرَى قُدَّامْهَا، وِالجْوَابْ الِّي مِنْ لاَوْدُوكِيَّة أَقْرَاوْهْ إِنْتُومَا زَادَا.

¹⁷قُولُوا لْأَرْخِبُّوسْ: «أَحْرِصْ عْلَى الخِدْمَة الِّي قْبِلْتْهَا مِنْ عِنْدْ الرَّبْ بَاشْ اتَّمِمْهَا.»

¹⁸السْلاَمْ هَاذَا بْخَطْ يِدِّي آنَا بُولُسْ. اذَّكّْرُوا السْلاَسِلْ مْتَاعِي. وْخَلِّي نِعْمِةْ اللهْ تْكُونْ مْعَاكُمْ!