Read Tunisian Arabic New Testament تْسَالُونِيكِي الأَوِلْ 1 Bible Online

تْسَالُونِيكِي الأَوِلْ 1 - Tunisian Arabic New Testament bible

تْسَالُونِيكِي الأَوِلْ 1

¹مِنْ بُولُسْ وْسِلْوَانُسْ وْتِيمُوثَاوُسْ لْكَنِيسِةْ تْسَالُونِيكِي الِّي فِي اللهْ الآبْ وْفِي الرَّبْ يَسُوعْ المَسِيحْ. النِّعْمَة وِالسَّلاَمْ عْلِيكُمْ.

²نُشْكُرْ اللهْ فِي كُلْ وَقْتْ عْلَى خَاطِرْكُمْ الكُلْكُمْ وْنِتْفَكّرُوكُمْ دِيمَا فِي صْلاَتْنَا،

³نِتْذَكّْرُوا قُدَّامْ إِلاَهْنَا وْبُونَا خِدْمِةْ إِيمَانْكُمْ وْجِهَادْ مْحَبِّتْكُمْ وْصَبْرْ الرَّجَاءْ مْتَاعْكُمْ فِي رَبّْنَا يَسُوعْ المَسِيحْ.

⁴نَعْرْفُوا، يَا الإِخْوَة المَحْبُوبِينْ، إِنُّو اللهْ هُوَ الِّي خْتَارْكُمْ،

⁵رَانَا جِبْنَالْكُمْ الإِنْجِيلْ، مُوشْ بِالكْلاَمْ آكَاهُو، آمَا بْقُوِّةْ الرُّوحْ القُدُسْ وِالثِّيقَة الكَامْلَة، وْإِنْتُومَا تَعْرْفُوا كِيفَاشْ كُنَّا فِي وُسْطْكُمْ عْلَى خَاطِرْ مَصْلْحِتْكُمْ،

⁶كِيفَاشْ وَلِّيتُوا تَعْمْلُوا كِيفْنَا أَحْنَا وْكِيفْ الرَّبْ، وِقْبِلْتُوا كْلاَمْ اللهْ وْإِنْتُومَا تْعَانُوا مِالوْجَايِعْ وفَرْحَانِينْ بِالرُّوحْ القُدُسْ،

⁷وْوَلِّيتُوا مِثَالْ لِلمُؤْمْنِينْ الكُلْهُمْ الِّي فِي مَقْدُونِيَّة وْأَخَائِيَة،

⁸عْلَى خَاطِرْ كْلاَمْ الرَّبْ تِنْشَرْ مِنْ عِنْدْكُمْ، مُوشْ فِي بْلاَدْ مَقْدُونِيَّة وِبْلاَدْ أَخَائِيَة آكَاهُو، آمَا الخْبَرْ مْتَاعْ إِيمَانْكُمْ بِالله تِنْشَرْ فِي البْلاَيِصْ الكُلْهَا وْمَا عُدْنَاشْ مِحْتَاجِينْ بَاشْ نَحْكِيوْ عْلِيهْ.

⁹وْهُومَا يَحْكِيوْ عْلِينَا كِيفَاشْ رَحِّبْتُوا بِينَا، وْكِيفَاشْ رْجَعْتُوا لْرَبِّي وِبْعِدْتُوا عْلَى الصْنَبْ بَاشْ تْكُونُوا خُدَّامْ مْتَاعْ اللهْ الحَيْ وِالحَقْ،

¹⁰وْإِنْتُومَا تِسْتَنَّاوْ فِي جَيَّانْ إِبْنُوا مِالسْمَاءْ، وْهُوَ الِّي قَيّْمُو اللهْ مِنْ بِينْ المُوتَى، يَسُوعْ الِّي يْنَجِّينَا مِالغَضَبْ الِّي بَاشْ يْجِي.