Read Tunisian Arabic New Testament تْسَالُونِيكِي الأَوِلْ 2 Bible Online

تْسَالُونِيكِي الأَوِلْ 2 - Tunisian Arabic New Testament bible

تْسَالُونِيكِي الأَوِلْ 2

¹وْتَعْرْفُوا، يَا الإِخْوَة، الِّي جَيَّانَّا لِيكُمْ مَا كَانِشْ زَايِدْ،

²رَغْمِلِّي تْعَذِّبْنَا وِتْهِنَّا فِي فِيلِبِّي كِيفْ مَا تَعْرْفُوا، إِلاَهْنَا عْطَانَا الشَّجَاعَة بَاشْ نَحْكِيوْلْكُمْ جْهَارْ عْلَى الإِنْجِيلْ مْتَاعْ اللهْ وِالنَّاسْ عَارْضُونَا بَرْشَة.

³كِدْعِينَاكُمْ لِلخَلاَصْ مَانَاشْ غَالْطِينْ وِلاَّ نِيِّتْنَا خَايْبَة وِلاَّ نَخْدْعُوا فِيكُمْ،

⁴آمَا نِتْكَلّْمُوا أَحْنَا الِّي اللهْ استثيقنا وِامِّنَّا عْلَى الإِنْجِيلْ، وِعْلَى خَاطِرْ الشَّيْء هاذا احْنَا نِتْكَلّْمُوا جْهَارْ مُوشْ بَاشْ نْرَضِّيوْ النَّاسْ، آمَا بَاشْ نْرَضِّيوْ اللهْ الِّي يَعْرِفْ قْلُوبْنَا.

⁵مَا نَافِقْنَاكُمْشْ بْحَتَّى كِلْمَة، كِيفْ مَا تَعْرْفُوا، وْمَا نَاشْ طَمَّاعِينْ، رَبِّي يِشْهِدْ،

⁶وْمَا طْلَبْنَاشْ المَجْدْ مِالنَّاسْ، لاَ مِنْكُمْ وْلاَ مِنْ غِيرْكُمْ،

⁷رَغْمِلِّي أَحْنَا انَّجّْمُوا يْكُونْ عِنْدْنَا قْدَرْ مَا دَامْنَا رُسُلْ المَسِيحْ. آمَا أَحْنَا وَلِّينَا قْلُوبْنَا حْنِينَة كِيفْ الوْلاَدْ الصْغَارْ مَا بِينَاتْكُمْ كِيفْ مَا الأُمْ تِتْلْهَى بِوْلاَدْهَا،

⁸رَانَا حَبِّينَاكُمْ حَتَّى لِينْ تْمَنِّينَا كَانْ نْشَارْكُوكُمْ مُوشْ فِي الإِنْجِيلْ مْتَاعْ اللهْ آكَاهُو آمَا زَادَا فِي حْيَاتْنَا، عْلَى خَاطِرْكُمْ وَلِّيتُوا حْبَابْنَا.

⁹إِنْتُومَا تِتْذَكّْرُوا، يَا الإِخْوَة، الشْقَى وِالتْعَبْ مْتَاعْنَا، كُنَّا نْبَشّْرُوا فِيكُمْ بِالإِنْجِيلْ مْتَاعْ اللهْ وْإِحْنَا نِخْدْمُوا فِي اللِّيلْ وِالنْهَارْ بَاشْ مَا نْثَقّْلُوشْ عْلَى حَتَّى وَاحِدْ فِيكُمْ.

¹⁰وْإِنْتُومَا شْهُودْ وِالله زَادَا شَاهِدْ كِيفَاشْ تْصَرِّفْنَا مْعَاكُمْ، إِنْتُومَا المُؤْمْنِينْ، بِطْهَارَة وْعَدْلْ وْكُنَّا مَا عْلِينَاشْ لُومْ.

¹¹كُنَّا لْكُلْ وَاحِدْ فِيكُمْ كِيفْ البُو لْوِلْدُو،

¹²وِنْصَحْنَاكُمْ وْشَجَّعْنَاكُمْ وْأَكِّدْنَا عْلِيكُمْ إِنّْكُمْ تْعِيشُوا عِيشَة تْلِيقْ بِالله الِّي نَادَاكُمْ لْمَمْلِكْتُو وْمَجْدُو.

¹³زَادَا أَحْنَا نِحْمْدُوا اللهْ عْلَى خَاطِرْكُمْ دِيمَا. وَقْتِلِّي جَاكُمْ كْلاَمْ اللهْ الِّي سْمَعْتُوهْ مِنْ عِنْدْنَا، قْبِلْتُوهْ مُوشْ عْلَى إِنُّو كْلاَمْ بَشَرْ، آمَا قْبِلْتُوهْ عْلَى إِنُّو بِالحَقْ كْلاَمْ اللهْ الِّي يْأَثِّرْ فِيكُمْ إِنْتُومَا المُؤْمْنِينْ.

¹⁴وَلِّيتُوا، يَا الإِخْوَة، تَعْمْلُوا كِيفْ كَنَايِسْ اللهْ فِي المَسِيحْ يَسُوعْ، الِّي فِي مَنْطِقْةْ اليَهُودِيَّة، عْلَى خَاطِرْ وْلاَدْ بْلاَدْكُمْ عَذّْبُوكُمْ كِيفْ مَا هُومَا عَذّْبُوهُمْ اليْهُودْ

¹⁵الِّي قَتْلُوا الرَّبْ يَسُوعْ وِالأَنْبِيَاءْ وْعَذّْبُونَا أَحْنَا، وِلِّي هُومَا عْمُرْهُمْ مَا يْرَضِّيوْ اللهْ وِيْعَادُوا فِي النَّاسْ الكُلْهُمْ!

¹⁶وْمَا يْخَلُّونَاشْ نْبَشّْرُوا الشْعُوبْ الأُخْرِينْ الكُلْهُمْ بَاشْ يْنَجّْمُوا يُخْلْصُوا، بَاشْ يِتْمْلاَوْ أَكْثِرْ بِالذْنُوبْ، وْفِي الإِخِّرْ نْزِلْ عْلِيهُمْ الغَضَبْ الكُلُّو مْتَاعْ اللهْ.

¹⁷آمَا أَحْنَا، يَا الإِخْوَة، رَانَا كِبْعِدْنَا عْلِيكُمْ سَاعَة مِالزْمَانْ، بِبْدُونَاتْنَا مُوشْ بِقْلُوبْنَا، رَانَا زِدْنَا سْتَاحِجْنَاكُمْ أَكْثِرْ وِنْحِبُّوا نْشُوفُوكُمْ.

¹⁸هَاذَاكَا عْلاَشْ حَبِّينَا نْجِيوْكُمْ، وْبِالأَخَصْ آنَا بُولُسْ، مَرَّة وْمَرّْتِينْ آمَا الشِّيطَانْ عَطِّلْنَا.

¹⁹شْكُونْ بَاشْ يْكُونْ الرّجَاءْ وِالفَرْحَة مْتَاعْنَا وِالتَّاجْ الِّي نِتْفُوخْرُوا بِيهْ قُدَّامْ رَبّْنَا يَسُوعْ المَسِيحْ نْهَارِتْ الِّي يْجِي؟ يَاخِي مُوشْ إِنْتُومَا؟

²⁰إِي نْعَمْ، إِنْتُومَا مَجْدْنَا وْفَرْحِتْنَا.