Read Tunisian Arabic New Testament تْسَالُونِيكِي الأَوِلْ 3 Bible Online

تْسَالُونِيكِي الأَوِلْ 3 - Tunisian Arabic New Testament bible

تْسَالُونِيكِي الأَوِلْ 3

¹وْوَقْتِلِّي مَا عَادِشْ انَّجّْمُوا نُصْبْرُوا، قَرِّرْنَا بَاشْ نَبْقَاوْ وَحِّدْنَا فِي أَثِينَا،

²يَاخِي بْعَثْنَا خُونَا تِيمُوثَاوُسْ الِّي يِخْدِمْ فِي اللهْ مْعَانَا فِي الإِنْجِيلْ مْتَاعْ المَسِيحْ بَاشْ يْشَجِّعْكُمْ وِيْقَوِّيلْكُمْ إِيمَانْكُمْ،

³بَاشْ حَتَّى وَاحِدْ فِيكُمْ مَا يُضُعُفْ فِي الأَوْقَاتْ الصْعِيبَة هَاذِي. وْإِنْتُومَا تَعْرْفُوا الِّي نِحْنَا مْعَيّنِينْ للأَوْقَاتْ الصْعِيبَة.

⁴وْوَقْتِلِّي كُنَّا بِحْذَاكُمْ، قُلْنَالْكُمْ الِّي أَحْنَا بَاشْ نْعَانُوا مِالأَوْقَاتْ الصْعِيبَة، وْهَاذَاكَا هُوَ الِّي وْقَعْ كِيفْ مَا تَعْرْفُوا.

⁵وْهَاذَاكَا عْلاَشْ كِمَا بْقَاشْ عِنْدِي صَبْرْ بْعَثْتْ شْكُونْ بَاشْ يِسْإِلْ عْلَى إِيمَانْكُمْ وْخُفْتْ مِلِّي يْجَرَّبْ فِي النَّاسْ لَيْكُونْ جَرِّبْكُمْ وِتْعَبْنَا يِمْشِي خْسَارَة.

⁶وْتَوَّا رْجَعِّلْنَا تِيمُوثَاوُسْ مِنْ عِنْدْكُمْ وْبَشِّرْنَا بْإِيمَانْكُمْ وِالمْحَبَّة مْتَاعْكُمْ وْقَالِلْنَا الِّي إِنْتُومَا دِيمَا تُذْكْرُوا فِينَا بِالخِيرْ وْمِسْتَاحْجِينْ بَاشْ تْشُوفُونَا كِيفْ مَا أَحْنَا مِسْتَاحْجِينْ بَاشْ نْشُوفُوكُمْ،

⁷وْإِيمَانْكُمْ هَاذَا، يَا إِخْوَة، شَجَّعْنَا فِي الحَاجَاتْ الِّي نْعَانِيوْ فِيهَا الكُلْهَا مِالضِّيقْ وِالشِّدَّة،

⁸وْرَانَا أَحْنَا تَوَّا مِتْهَنِّينْ مَادَامْكُمْ إِنْتُومَا ثَابْتِينْ فِي الرَّبْ.

⁹وْقَدَّاشْ لاَزِمْنَا نُشْكْرُوا اللهْ عْلَى خَاطِرْكُمْ. نُشْكْرُوهْ عْلَى الفَرْحَة الِّي نْحِسُّوا بِيهَا قُدَّامْ إِلاَهْنَا بْفَضْلْكُمْ؟

¹⁰وْإِحْنَا نُطْلْبُوا وِنْعَاوْدُوا لِيلْ وِنْهَارْ بَاشْ نْشُوفُوكُمْ وِنْكَمّْلُوا الشَّيْء الِّي نَاقِصْ فِي إِيمَانْكُمْ.

¹¹نِتْمَنَّاوْ إِنُّو اللهْ بُونَا وْرَبْنَا يَسُوعْ المَسِيحْ يْسَهّْلِلْنَا الطْرِيقْ بَاشْ نْجِيوْكُمْ،

¹²وْإِنُّو الرَّبْ يْزِيدْ فِي مْحَبِّتْكُمْ لِبْعَضْكُمْ وْلِلنَّاسْ الكُلْ عْلَى قَدْرْ مْحَبِّتْنَا لِيكُمْ،

¹³وْإِنُّو يْقَوِّيلْكُمْ قْلُوبْكُمْ وِتْكُونُوا مُقَدّْسِينْ وْمَا عْلِيكُمْشْ لُومْ، قُدَّامْ إِلاَهْنَا وْبُونَا، فِي النْهَارْ الِّي يْجِي فِيهْ رَبّْنَا يَسُوعْ مْعَ المُؤْمْنِينْ بِيهْ الكُلْهُمْ. آمِينْ.