Read Tunisian Arabic New Testament تْسَالُونِيكِي الأَوِلْ 4 Bible Online

تْسَالُونِيكِي الأَوِلْ 4 - Tunisian Arabic New Testament bible

تْسَالُونِيكِي الأَوِلْ 4

¹وْفِي الإِخِّرْ، نْأَكّْدُوا عْلِيكُمْ، يَا الإِخْوَة، وْنُطْلُبْ مِنْكُمْ فِي الرَّبْ يَسُوعْ إِنّْكُمْ تِتْقَدّْمُوا أَكْثِرْ فِي سِيرِتْكُمْ البَاهْيَة الِّي عَايْشِينْ بِيهَا اليُومْ كِيفْ مَا تْعْلِّمْتُوهَا مِنْ عِنْدْنَا بَاشْ تْرَضِّيوْ اللهْ.

²إِنْتُومَا تَعْرْفُوا الوْصَايَا الِّي وَصِّينَاكُمْ بِيهَا مِنْ عِنْدْ الرَّبْ يَسُوعْ.

³رَاهِي إِرَادِةْ اللهْ هِيَ إِنّْكُمْ تْكُونُوا قِدِّيسِينْ، وْمَا عَادِشْ تَزْنُوا،

⁴وْكُلْ وَاحِدْ فِيكُمْ يَعْرِفْ كِيفَاشْ يْحَافِظْ عْلَى بَدْنُو فِي القَدَاسَة وِالكَرَامَة،

⁵مُوشْ فِي الشْهَاوِي كِيفْ مَا يَعْمْلُوا الشْعُوبْ الأُخْرِينْ الِّي مَا يَعْرْفُوشْ اللهْ،

⁶وْحَتَّى حَدْ مَا يِلْزْمُو يِتْعَدَّى في الحَاجَة هَاذِي عْلَى حْقُوقْ خُوهْ فِيهَا وْيِسْتْغَلُّو. رَاهُو الرَّبْ هُوَ الِّي يِنْتَقِمْ عْلَى الحَاجَاتْ هَاذِي الكُلْهَا، كِيفْ مَا قُلْنَالْكُمْ وِشْهِدْنَالْكُمْ مِنْ قْبَلْ،

⁷رَاهُو اللهْ مَا دْعَانَاشْ لِلنْجَاسَة، آمَا دْعَانَا لِلقَدَاسَة.

⁸الِّي يُرْفُضْ الشَّيْء هَاذَا مُوشْ يُرْفُضْ فِي الإِنْسَانْ، آمَا رْفَضْ اللهْ الِّي يَعْطِيكُمْ رُوحُو القُدُّوسْ.

⁹وْمَا كُمْشْ فِي حَاجَة بَاشْ نِكْتْبُولْكُمْ عْلَى المْحَبَّة الِّي بِينْ الإِخْوَة، رَاكُمْ تْعَلِّمْتُوا مِنْ عِنْدْ اللهْ إِنّْكُمْ تْحِبُّوا بْعَضْكُمْ.

¹⁰وْإِنْتُومَا هَكَّا تِتْعَامْلُوا مْعَ الإِخْوَة الكُلْهُمْ الِّي فِي مَقْدُونِيَّة الكُلْهَا. آمَا رَانَا نْأَكّْدُوا عْلِيكُمْ، يَا الإِخْوَة، إِنّْكُمْ تْزِيدُوا مِالشَّيْء هَاذَا،

¹¹وْإِنّْكُمْ تَحْرْصُوا بَاشْ تْعِيشُوا عِيشَة رَايْضَة وْتِتْلْهَاوْ بِرْوَاحْكُمْ وْتِخْدْمُوا بِعْرَقْ جْبِينْكُمْ كِيفْ مَا وَصِّينَاكُمْ.

¹²وِتْكُونْ سِيرِتْكُمْ بَاهْيَة قُدَّامْ النَّاسْ الِّي مَا هُمْشْ مُؤْمْنِينْ وْمَا تْكُونُوشْ مِحْتَاجِينْ لْحَتَّى حَدْ.

¹³وْمَا نْحِبْكُمْشْ، يَا الإِخْوَة، إِنّْكُمْ تِجْهْلُوا المَصِيرْ مْتَاعْ الِّي يْمُوتُوا بَاشْ مَا تِحْزْنُوشْ كِيفْ النَّاسْ الِّي مَا عِنْدْهُمْشْ رَجَاءْ.

¹⁴إِذَا كَانَّا نِمّْنُوا الِّي يَسُوعْ مَاتْ وِمْبَاعِدْ قَامْ، رَانَا زَادَا نِمّْنُوا إِنُّو الِّي مَاتُوا فِي يَسُوعْ، اللهْ بَاشْ يْرَجَّعْهُمْ مْعَ يَسُوعْ.

¹⁵وِنْقُولِلْكُمْ الشَّيْء هَاذَا الِّي قَالُو الرَّبْ بِيدُو، وِلِّي هُوَ إِنَّا أَحْنَا الحَيِّينْ الِّي بَاشْ نَبْقَاوْ حَتَّى لِينْ يْجِي الرَّبْ مَا نَاشْ بَاشْ نِسْبْقُوا الِّي مَاتُوا،

¹⁶رَاهُو الرَّبْ بِيدُو بَاشْ يِنْزِلْ مِالسْمَاءْ بْصُوتْ يْنَادِي وْصُوتْ رَئِيسْ المْلاَيْكَة وْصُوتْ بُوقْ اللهْ، وِيْقُومُوا الِّي مَاتُوا فِي المَسِيحْ هُومَا اللْوَالَى،

¹⁷وِمْبَاعِدْ أَحْنَا الِّي بْقِينَا حَيِّينْ، نِتْهَزُّوا مْعَاهُمْ فِي السْحَابْ، بَاشْ نْقَابْلُوا الرَّبْ فِي الهْوَاء، وِنْكُونُوا مْعَ الرَّبْ الوَقْتْ الكُلُّو.

¹⁸إِمَّالاَ شَجّْعُوا بْعَضْكُمْ بِالكْلاَمْ هَاذَا.