Read Tunisian Arabic New Testament تْسَالُونِيكِي الأَوِلْ 5 Bible Online

تْسَالُونِيكِي الأَوِلْ 5 - Tunisian Arabic New Testament bible

تْسَالُونِيكِي الأَوِلْ 5

¹آمَا الأَوْقَاتْ وِالمْوَاعِيدْ، يَا الإِخْوَة، رَاكُمْ مَا كُمْشْ مِحْتَاجِينْ بَاشْ يِتْكْتِبِّلْكُمْ عْلِيهُمْ،

²رَاكُمْ تَعْرْفُوا بِالقْدَا إِنُّو يُومْ الرَّبْ يْجِي عْلَى غَفْلَة كِيفْ مَا يْجِي السَّارِقْ فِي اللِّيلْ.

³وْوَقْتِلِّي يْقُولُوا النَّاسْ: «عِنْدْنَا سَلاَمْ وْأَمَانْ»، يْجِيهُمْ الهْلاَكْ عْلَى غَفْلَة كِيفْ مَا تْجِي وْجَايِعْ الوْلاَدَة لِلمْرَا الحِبْلَى، وْمَا يْنَجّْمُوشْ يِمْنْعُوا.

⁴آمَا إِنْتُومَا، يَا الإِخْوَة، مَا كُمْشْ عَايْشِينْ فِي الظْلاَمْ حَتَّى لِينْ يْجِيكُمْ النْهَارْ هَاذَاكَا عْلَى غَفْلَة كِيفْ السَّارِقْ،

⁵إِنْتُومَا الكُلْكُمْ وْلاَدْ النُّورْ وِوْلاَدْ النْهَارْ. وْإِحْنَا رَانَا لاَنَا مِاللِّيلْ وْلاَنَا مِالظْلاَمْ.

⁶إِمَّالاَ مَا نُرْقْدُوشْ كِيفْ مَا يَعْمْلُوا النَّاسْ، آمَا يِلْزِمْنَا نَسْهْرُوا وِنْبَاتُوا فَايْقِينْ.

⁷رَاهُمْ الرَّاقْدِينْ يُرْقْدُوا فِي اللِّيلْ، وِالسْكَارَى يِسْكْرُوا فِي اللِّيلْ.

⁸آمَا أَحْنَا وْلاَدْ النْهَارْ خَلِّينَا نْكُونُوا فَايْقِينْ، لاَبْسِينْ دِرْعْ يِحْمِي سْدُورَاتْنَا هُوَ الإِيمَانْ وِالمْحَبَّة وْكَاسْكَا هِيَ الأَمَلْ مْتَاعْ الخَلاَصْ،

⁹رَاهُو اللهْ مَا خْتَارْنَاشْ بَاشْ يَغْضِبْ عْلِينَا، آمَا بَاشْ نَاخْذُوا خَلاَصُو بْرَبْنَا يَسُوعْ المَسِيحْ.

¹⁰الِّي مَاتْ عْلَى خَاطِرْنَا بَاشْ الكُلْنَا نَحْيَاوْ مْعَاهْ، إِذَا كُنَّا فَايْقِينْ فِي اليَقْظَة مْتَاعْ الحَيَاةْ وِلاَّ فِي غَفْوِةْ المُوتْ.

¹¹إِمَّالاَ شَجّْعُوا بْعَضْكُمْ وْعَاوْنُوا بْعَضْكُمْ كِيفْ مَا تَعْمْلُوا تَوَّا.

¹²وْنُطْلُبْ مِنْكُمْ، يَا الإِخْوَة، بَاشْ تِكْرْمُوا الِّي يِتْعْبُوا مَا بِينَاتْكُمْ وْيَرْعَاوْ فِيكُمْ فِي الرَّبْ وْيِرْشْدُوا فِيكُمْ،

¹³وْإِنّْكُمْ تْعَامْلُوهُمْ ابَّرْشَة إِحْتِرَامْ وِمْحَبَّة عْلَى خَاطِرْ الخِدْمَة مْتَاعْهُمْ. عِيشُوا مْعَ بْعَضْكُمْ فِي سَلاَمْ.

¹⁴وِنْأَكِّدْ عْلِيكُمْ، يَا الإِخْوَة، إِنّْكُمْ تْنَبّْهُوا عْلَى البُخْلِينْ وِتْشَجّْعُوا الِّي فَاشْلِينْ وِتْعَاوْنُوا الضْعَافْ وْتُصْبْرُوا عْلَى النَّاسْ الكُلْ.

¹⁵رُدُّوا بَالْكُمْ لاَ تْكَافُوا وَاحِدْ عْلَى الشَّرْ بِالشَّرْ، آمَا دِيمَا أَعْمْلُوا الخِيرْ، مْعَ بْعَضْكُمْ وِمْعَ النَّاسْ الكُلْ.

¹⁶أَفْرْحُوا دِيمَا

¹⁷دَاوْمُوا عْلَى الصَّلاَةْ،

¹⁸إِحْمْدُوا اللهْ عْلَى كُلْ شَيْء، رَاهِي هَاذِي هِيَ إِرَادِةْ اللهْ لِيكُمْ فِي المَسِيحْ يَسُوعْ.

¹⁹وْمَا تِطْفُوشْ الرُّوحْ،

²⁰مَا تَحْقْرُوشْ النُّبُوءَاتْ،

²¹آمَا جَرّْبُوا كُلْ شَيْء وْشِدُّوا صْحِيحْ فِي البَاهِي،

²²وْإِبْعْدُوا عْلَى الشَّرْ الكُلُّو.

²³وْإِلاَهْ السَّلاَمْ بِيدُو يْقَدِّسْكُمْ فِي كُلْ شَيْء. وْنِتْمَنَّاوْ انُّو رُوحْكُمْ وْنَفْسْكُمْ وِبْدَنْكُمْ يْكُونُوا مَحْفُوظِينْ بِالكَامِلْ وْمَا عْلِيكُمْشْ لُومْ، وَقْتِلِّي يْجِي رَبّْنَا يَسُوعْ المَسِيحْ.

²⁴رَاهُو الِّي دْعَاكُمْ صَادِقْ وْيُوفِي بْوَعْدُو.

²⁵يَا الإِخْوَة، صَلِّيوْ مِنْ أَجْلْنَا.

²⁶سَلّْمُوا عْلَى الإِخْوَة الكُلْهُمْ ابُّوسَة مُقَدّْسَة.

²⁷نِتْرَجَّاكُمْ بِالرَّبْ إِنّْكُمْ تَقْرَاوْ الجْوَابْ هَاذَا عْلَى الإِخْوَة الكُلْهُمْ.

²⁸إِنْ شَاءْ اللهْ نِعْمِةْ رَبّْنَا يَسُوعْ المَسِيحْ تْكُونْ مْعَاكُمْ.