Read Tunisian Arabic New Testament تْسَالُونِيكِي الثَّانِيْ 2 Bible Online

تْسَالُونِيكِي الثَّانِيْ 2 - Tunisian Arabic New Testament bible

تْسَالُونِيكِي الثَّانِيْ 2

¹آمَا فِي مَا يْخُصْ جَيَّانْ رَبّْنَا يَسُوعْ المَسِيحْ وِوْقُوفْنَا قُدَّامُو، رَانِي نُطْلُبْ مِنْكُمْ يَا الإِخْوَة

²إِنّْكُمْ مَا تُضْعْفُوشْ فِيسَعْ فِي أَفْكَارْكُمْ وْمَا تِتْرِعْبُوشْ مِنْ حَتَّى رُوحْ وِلاَّ كْلاَمْ وِلاَّ جْوَابْ كَإِنّْهَا مِنْ عِنْدْنَا تْقُولْ الِّي يُومْ الرَّبْ جَا.

³مَا تْخَلِّيوْشْ حَتَّى وَاحِدْ يْغُشّْكُمْ بْأَيْ حَاجَة، رَاهُو يُومْ الرَّبْ مَا يْجِي كَانْ بَعْدْ مَا بَرْشَة نَاسْ يِبْعْدُوا عْلَى رَبِّي وِالشَّرْ يْوَلِّي فِي شَكْلْ إِنْسَانْ، الِّي هُوَ وِلْدْ الهْلاَكْ،

⁴وِلِّي يْجِي ضِدْ كُلْ شَيْء وِلِّي يَرْفِعْ رُوحُو فُوقْ كُلْ شَيْء يِتْسَمَّى إِلاَهْ وِلاَّ يِتْعْبِدْ، لْدَرْجِةْ إِنُّو يُقْعُدْ فِي هَيْكِلْ اللهْ وِيْظَهِّرْ رُوحُو الِّي هُوَ إِلاَهْ.

⁵يَاخِي مَا تِذَّكْرُوشْ إِنِّي وَقْتِلِّي كُنْتْ مْعَاكُمْ قُلْتِلْكُمْ الشَّيْء هَاذَاكَا الكُلُّو؟

⁶وْإِنْتُومَا تَوَّا تَعْرْفُوا الشَّيْء الِّي يْحُوزُو وْمَا يْخَلِّيهِشْ يُظْهُرْ كَانْ وَقْتِلِّي يْجِي وَقْتُو.

⁷وْقُوِّةْ الشَّرْ قَاعْدَة تِخْدِمْ فِي السِّرْ، حَتَّى لِينْ يْجِي الوَقْتْ الِّي يِتْنَحَّى فِيهْ الشَّيْء الِّي حَايِزْهَا تَوَّا

⁸وِالوَقْتْ هَاذَاكَا الشِّرِّيرْ يِتْكْشِفْ وْيِقْضِي عْلِيهْ الرَّبْ يَسُوعْ بْنَفْخَة مِنْ فُمُّو وْيِمْحِيهْ بِالنُّورْ مْتَاعْ جَيَّانُو.

⁹وْجَيَّانْ الشِّرِّيرْ يْكُونْ بْقُدْرِةْ الشِّيطَانْ عْلَى إِنُّو يَعْمِلْ المُعْجْزَاتْ وِالعَلاَمَاتْ وِالعْجَايِبْ الغَالْطَة،

¹⁰وِعْلَى الحَاجَاتْ الشِّرِّيرَة الكُلْهَا الِّي تِخْدَعْ هَاكَا الِّي مْصِيرْهْمْ الهْلاَكْ، عْلَى خَاطِرْهُمْ رَفْضُوا مْحَبِّةْ الحَقْ الِّي يُخْلْصُوا بِيهْ.

¹¹هَاذَاكَا عْلاَشْ يَبْعْثِلْهُمْ اللهْ قُوِّةْ الضْلاَلْ حَتَّى لِينْ يْصَدّْقُوا الكِذْبْ،

¹²وْيُحْكُمْ عَلِّي رَفْضُوا بَاشْ يِمّْنُوا بِالحَقْ الكُلْهُمْ وْحَبُّوا البَاطِلْ الكُلْهُمْ.

¹³آمَا أَحْنَا رَانَا يِلْزِمْنَا نِحْمْدُوا اللهْ فِي كُلْ وَقْتْ عْلَى خَاطِرْكُمْ يَا الإِخْوَة، يَا حْبَابْ رَبِّي، رَاهُو اللهْ خْتَارْكُمْ كِيفْ أَوِّلْ الغَلَّة بَاشْ يْخَلِّصْكُمْ بِالقَدَاسَة الِّي يَعْطِيهَا الرُّوحْ وْبِالإِيمَانْ بِالحَقْ.

¹⁴لِلشَّيْء هَاذَا دْعَاكُمْ اللهْ بِالإِنْجِيلْ مْتَاعْنَا بَاشْ تَاخْذُوا المَجْدْ مْتَاعْ رَبّْنَا يَسُوعْ المَسِيحْ.

¹⁵هَاذَاكَا عْلاَشْ، يَا الإِخْوَة، إِثْبْتُوا وْحَافْظُوا عْلَى الوْصَايَا الِّي خْذِيتُوهاَ مِنْ عِنْدْنَا، كِكَلِّمْنَاكُمْ بِفَّامْنَا وِلاَّ بِالكْتِيبَة.

¹⁶وْرَبّْنَا يَسُوعْ المَسِيحْ بِيدُو وِالله بُونَا الِّي حَبّْنَا وْنْعِمْ عْلِينَا بْتَعْزْيَة لِلأَبَدْ وْرَجَاءْ بَاهِي بِالنِّعْمَة،

¹⁷يْعَزِّي قْلُوبْكُمْ وِيْثَبِّتْهَا فِي كُلْ خِيرْ تَعْمْلُوهْ وِلاَّ تْقُولُوهْ.