Read Tunisian Arabic New Testament تِيمُوثَاوُسْ الأَوِلْ 1 Bible Online

تِيمُوثَاوُسْ الأَوِلْ 1 - Tunisian Arabic New Testament bible

تِيمُوثَاوُسْ الأَوِلْ 1

¹مِنْ بُولُسْ رَسُولْ المَسِيحْ يَسُوعْ كِيفْ مَا أْمَرْ اللهْ الِّي خَلِّصْنَا وِالمَسِيحْ يَسُوعْ الِّي هُوَ الرَّجَاءْ مْتَاعْنَا،

²لْتِيمُوثَاوُسْ وِلْدِي الحَقَّانِي فِي الإِيمَانْ. النِّعْمَة وِالرَّحْمَة وِالسَّلاَمْ مِنْ اللهْ الآبْ وْمِنْ المَسِيحْ يَسُوعْ رَبّْنَا.

³طْلَبْتْ مِنِّكْ، وْآنَا مَاشِي لْمَقْدُونِيَّة، انِّكْ تَبْقَى فِي أَفَسُسْ بَاشْ تْوَصِّي جْمَاعَة مِالنَّاسْ إِنّْهُمْ مَا يَعَلّْمُوشْ تَعْلِيمْ يْخَالِفْ التَّعْلِيمْ مْتَاعْنَا،

⁴وْمَا يِسْمْعُوشْ الخْرَافَاتْ وِحْكَايَاتْ الأَنْسَابْ الِّي مَا تُوفَاشْ، رَاهِي الحَاجَاتْ هَاذِي تْجِيبْ النِّقَاشَاتْ الفَارْغَة وْمَا تَعْمِلْشْ الشَّيْء الِّي يْحِبْ عْلِيهْ اللهْ وِلِّي هُوَ مِبْنِي عْلَى الإِيمَانْ.

⁵وِالوْصِيَّة هَاذِي تْقَالِتْ عْلَى خَاطِرْ المْحَبَّة الِّي جَايَة مِنْ قَلْبْ طَاهِرْ وْضَمِيرْ صَالِحْ وْإِيمَانْ صَادِقْ،

⁶ثَمَّة شْكُونْ بَعْدُوا عْلِيهَا وْتَبّْعُوا الكْلاَمْ الفَارِغْ،

⁷حَاسْبِينْ رْوَاحْهُمْ الِّي هُومَا مِالمُعَلّْمِينْ مْتَاعْ الشَّرِيعَة وْهُومَا مَا هُمْشْ فَاهْمِينْ الشَّيْء الِّي قَاعْدِينْ يْقُولُوا فِيهْ وْشَادِّينْ فِيهْ صْحِيحْ.

⁸وْإِحْنَا نَعْرْفُوا الِّي الشَّرِيعَة صَالْحَة مَا دَامْنَا نِسْتَعْمْلُوا فِيهَا بِالقْدَا،

⁹وْنِفْهْمُوا الِّي الشَّرِيعَة مَا هِيشْ لِلنَّاسْ الأَبْرَارْ، آمَا هِيَ لِلعَاصِينْ وِالأَشْرَارْ، لِلِّي مَا يْخَافُوشْ رَبِّي وِالمِذْنْبِينْ، لِلْمَنْزُوسِينْ وِالفَاسْدِينْ، لِلِّي يُقْتْلُوا فِي أُبَّيَّاتْهُمْ وِامَّاتْهُمْ، لِلِّي يُقْتْلُوا فِي الأَرْوَاحْ،

¹⁰لِلِّي يَزْنَاوْا وِلِّي يُرْقْدُوا مْعَ الرْجَالْ، لِلِّي يْتَاجْرُوا فِي العَبِيدْ وِالكَذَّابِينْ وِلِّي يِحْلْفُوا بِالبَاطِلْ، وِلْكُلْ مِنْ يْخَالِفْ التَّعْلِيمْ الصْحِيحْ

¹¹الِّي مُوجُودْ فِي الإِنْجِيلْ الِّي تْحَطْ أَمَانَة فِي يْدَيَّا، الإِنْجِيلْ المَجِيدْ مْتَاعْ اللهْ المُبَارَكْ.

¹²نِحْمِدْ المَسِيحْ يَسُوعْ رَبّْنَا الِّي قَوَّانِي وِحْسِبْنِي نِسْتْحَقْ الثِّيقَة، وِدْعَانِي بَاشْ نِخْدْمُو،

¹³آنَا الِّي كْفَرْتْ بِيهْ وْعَذِّبْتُو وْسَبِّيتُو قْبَلْ، آمَا اللهْ رْحَمْنِي عْلَى خَاطِرْنِي مَا كُنْتِشْ مُؤْمِنْ وْمَا نَعْرِفْشْ شْنُوَّة الشَّيْء الِّي كُنْتْ نَعْمِلْ فِيهْ،

¹⁴يَاخِي فَاضِتْ عْلِيَّ النِّعْمَة مْتَاعْ رَبّْنَا وِالإِيمَانْ وِالمْحَبَّة الِّي هُومَا فِي المَسِيحْ يَسُوعْ.

¹⁵الكْلاَمْ هَاذَا صَادِقْ وْيِسْتْحَقْ بَاشْ يِتْقْبِلْ الكُلُّو، وْهُوَ إِنُّو المَسِيحْ يَسُوعْ جَا لِلعَالَمْ بَاشْ يْخَلِّصْ المِذْنْبِينْ، وْآنَا أَوِّلْ المِذْنْبِينْ.

¹⁶آمَا رَانِي مَا تِرْحَمْتْ كَانْ بَاشْ يْظَهِّرْ المَسِيحْ يَسُوعْ صَبْرُو فِيَّ آنَا فِي الأُوِّلْ وِيْرُدّْنِي مِثَالْ لِلنَّاسْ الِّي يِمّْنُوا بِيهْ بَاشْ يَاخْذُوا الحَيَاةْ الأَبَدِيَّة.

¹⁷الكَرَامَة وِالمَجْدْ لِلأَبَدْ لِلمَلِكْ مْتَاعْ الدْهُورْ، الإِلاَهْ الوَاحِدْ الدَّايِمْ وِلِّي مَا تْشُوفُوشْ العِينْ. آمِينْ.

¹⁸نْخَلِّيلِكْ، يَا وِلْدِي تِيمُوثَاوُسْ، الوْصِيَّة هَاذِي كِيفْ مَا قَالِتْ عْلِيكْ النُّبُوءَاتْ مِنْ قْبَلْ، وْتَحْفِظْهَا بَاشْ تْجَاهِدْ أَكْثِرْ مَا يُمْكِنْ

¹⁹بِالإِيمَانْ وِالضَّمِيرْ الصَّالِحْ الِّي ثَمَّة نَاسْ رَفْضُوهُمْ، يَاخِي تْكَسّْرِتْ بِيهُمْ سْفِينِةْ الإِيمَانْ.

²⁰وْمِنْ بِينْهُمْ هِيمِينَايُسْ وِاسْكَنْدَرْ الِّي سَلِّمْتْهُمْ لِلشِّيطَانْ بَاشْ يِتْعَلّْمُوا إِنّْهُمْ مَا يَكْفْرُوشْ.