Read Tunisian Arabic New Testament تِيمُوثَاوُسْ الأَوِلْ 2 Bible Online

تِيمُوثَاوُسْ الأَوِلْ 2 - Tunisian Arabic New Testament bible

تِيمُوثَاوُسْ الأَوِلْ 2

¹نُطْلُبْ قْبَلْ كُلْ شَيْء إِنّْكُمْ تِدْعيوْ وِتْصَلِّيوْ وْتِتْشَفّْعُوا وْتِحْمْدُوا اللهْ عْلَى خَاطِرْ النَّاسْ الكُلْهُمْ،

²وِعْلَى خَاطِرْ المُلُوكْ وِالنَّاسْ الِّي عِنْدْهُمْ سُلْطَة، بَاشْ نْعِيشُوا عِيشَة مُطْمَانَة وْهَادْيَة بْتَقْوَى وْكَرَامَة

³رَاهُو الشَّيْء هَاذَا بَاهِي وْمَقْبُولْ عِنْدْ اللهْ الِّي خَلِّصْنَا

⁴الِّي يْحِبْ النَّاسْ الكُلْهُمْ يُخْلْصُوا وْيُوصْلُوا بَاشْ يَعْرْفُوا الحَقْ،

⁵عْلَى خَاطِرْ اللهْ وَاحِدْ، وِالوْسِيطْ بِينْ اللهْ وِالنَّاسْ وَاحِدْ الِّي هُوَ المَسِيحْ يَسُوعْ الإِنْسَانْ

⁶الِّي ضَحَّى بْرُوحُو بَاشْ يِفْدِي النَّاسْ الكُلْهُمْ. وِالشَّيْء هَاذَاكَا تِشْهِدْ عْلِيهْ فِي وَقْتُو،

⁷هَاذَاكَا عْلاَشْ رَدّْنِي مَبَشِّرْ وْرَسُولْ وْمُعَلِّمْ مْتَاعْ الإِيمَانْ وِالحَقْ لِلنَّاسْ الِّي مَا هُمْشْ يْهُودْ وْرَانِي قَاعِدْ نْقُولْ فِي الحَقْ وْمَا نِيشْ نِكْذِبْ.

⁸نْحِبْ إِنُّو الرْجَالْ يْصَلِّيوْ فِي البْلاَيِصْ الكُلْهَا، رَافْعِينْ يْدِينْ طَاهْرَة مِنْ غِيرْ غُشْ وْلاَ عَرْكْ.

⁹وْنَفْسْ الشَّيْء المْرَا تِلْبِسْ لِبْسَة مْتَاعْ حِشْمَة وِتْزَيِّنْ رُوحْهَا بْزِينَة مْتَاعْ حْيَاءْ وْإِحْتِرَامْ، مُوشْ بِشْعَرْ مْسَيِّبْ وِذْهَبْ وِجُوهِرْ وْلِبْسَة غَالْيَة،

¹⁰آمَا بْأَعْمَالْ صَالْحَة تْلِيقْ بِنْسَاء يْعِيشُوا وْهُومَا خَايْفِينْ رَبِّي،

¹¹وِالمْرَا يِلْزِمْهَا تِتْعَلِّمْ وْهِيَ سَاكْتَة وِاطِّيعْ فِي كُلْ شَيْء،

¹²وْمَا عِنْدْهَاشْ الحَقْ بَاشْ تْعَلِّمْ وِلاَّ تْكُونْ عِنْدْهَا سُلْطَة عْلَى الرَّاجِلْ، آمَا يِلْزِمْهَا تَبْقَى سَاكْتَة،

¹³عْلَى خَاطِرْ آدَمْ تِخْلَقْ قْبَلْ حَوَّا.

¹⁴وْمُوشْ آدَمْ الِّي تْغَرْ، آمَا المْرَا هِيَ الِّي تْغَرِّتْ وْهَكَّا الذْنُوبْ تْعَمْلِتْ.

¹⁵آمَا هِيَ وَقْتِلِّي تْجِيبْ وْلاَدْ تُخْلُصْ كِتِثْبِتْ فِي الإِيمَانْ وِالمْحَبَّة وِالقَدَاسَة وِالرْزَانَة وْهِيَ مِتْوَاضْعَة.