Read Tunisian Arabic New Testament تِيمُوثَاوُسْ الأَوِلْ 4 Bible Online

تِيمُوثَاوُسْ الأَوِلْ 4 - Tunisian Arabic New Testament bible

تِيمُوثَاوُسْ الأَوِلْ 4

¹وِالرُّوحْ تْكَلِّمْ بْصَرَاحَة وَقْتِلِّي قَالْ الِّي ثَمَّة نَاسْ بَاشْ يَرْجْعُوا عْلَى الإِيمَانْ فِي آخِرْ الزْمَانْ، وِيْتَبّْعُوا أَرْوَاحْ تْضَلِلْ فِي العْبَادْ وْتَعَالِيمْ مِنْ عِنْدْ الشِّيطَانْ

²مْتَاعْ نَاسْ مُنَافْقِينْ كَذَّابِينْ ضَمَايِرْهُمْ فِسْدِتْ وْمَاتِتْ،

³يِنْهِيوْ عْلَى الزْوَاجْ وِعْلَى أَنْوَاعْ مْتَاعْ مَاكْلَة خْلَقْها اللهْ بَاشْ يَاكْلُوهَا الِّي امّْنُوا وْعَرْفُوا الحَقْ وْيِحْمْدُوهْ عْلِيهَا.

⁴كُلْ شَيْء خَلْقُو اللهْ بَاهِي، مَا ثَمَّاشْ حَتَّى حَاجَة يِلْزِمْ تِتْرْفَضْ، آمَا يِلْزِمْ كُلْ شَيْء يِتْقْبِلْ بِالشُّكْرْ،

⁵عْلَى خَاطِرْ كْلاَمْ اللهْ وِالصَّلاَةْ يْقَدّْسُوهْ.

⁶وْإِنْتِ إِذَا وَرِّيتْ الوْصَايَا هَاذِي لِلإِخْوَة تْكُونْ خَادِمْ بَاهِي لِلمَسِيحْ يَسُوعْ، مِتْغَذِّي بِكْلاَمْ الإِيمَانْ وْبِالتَّعْلِيمْ الصْحِيحْ الِّي اتَّبَّعْ فِيهْ.

⁷إِبْعِدْ عْلَى الخْرَافَاتْ الزَّايْدَة وِحْكَايَاتْ العْزَايِزْ وْدَرِّبْ رُوحِكْ عْلَى التَّقْوَى.

⁸«إِذَا كَانْ تَدْرِيبْ البْدَنْ فِيهْ شْوَيَّة فَايْدَة، رَاهِي التَّقْوَى فِيهَا كُلْ خِيرْ عْلَى خَاطِرْهَا فِيهَا الوَعْدْ بِالحَيَاةْ مْتَاعْ تَوَّا وِمْتَاعْ المُسْتَقْبِلْ.»

⁹وِالكْلاَمْ هَاذَا صَادِقْ وْيِسْتْحَقْ بَاشْ يِتْقْبِلْ الكُلُّو.

¹⁰إِذَا كُنَّا نْجَاهْدُوا وْنِتْعْبُوا، رَاهُو عْلَى خَاطِرْنَا عِنْدْنَا رَجَاءْ فِي اللهْ الحَيْ الِّي هُوَ المُخَلِّصْ مْتَاعْ النَّاسْ الكُلْهُمْ، وْبِالأَخَصْ الِّي يِمّْنُوا.

¹¹يِلْزْمِكْ تْوَصِّي بِالشَّيْء هَاذَا وِتْعَلّْمُو.

¹²مَا تْخَلِّيشْ حَتَّى حَدْ يَحْقْرِكْ عْلَى خَاطْرِكْ صْغِيرْ، آمَا كُونْ مِثَالْ لِلمُؤْمْنِينْ فِي الكْلاَمْ وِالتَّصَرُّفْ وِالمْحَبَّة وِالإِيمَانْ وِالطْهَارَة.

¹³دَاوِمْ عْلَى القْرَايَة مِالكْتَابْ وِالوَعْظْ وِالتَّعْلِيمْ حَتَّى لِينْ نْجِي.

¹⁴مَا تْهَمِّلْشْ المَوْهْبَة الِّي عِنْدِكْ، رَاهِي مَوْهْبَة خْذِيتْهَا بِالنُّبُوَّة وَقْتِلِّي حَطُّوا عْلِيكْ الشْيُوخْ يْدِيهُمْ.

¹⁵فَكِّرْ فِي الأُمُورْ هَاذِي وْفَضِّي رُوحِكْ لِيهَا بَاشْ يْبَانْ لِلنَّاسْ الكُلْ الِّي إِنْتِ قَاعِدْ تِتْحَسِّنْ.

¹⁶رُدْ بَالِكْ عْلَى رُوحِكْ وِعْلَى التَّعْلِيمْ مْتَاعِكْ وْدَاوِمْ عْلَى الشَّيْء هَاذَاكَا، إِذَا كَانْ تَعْمِلْ الشَّيْء هَاذَاكَا رَاكْ تْخَلِّصْ رُوحِكْ وِتْخَلِّصْ الِّي يِسْمْعُوا فِيكْ.