Read Tunisian Arabic New Testament تِيمُوثَاوُسْ الأَوِلْ 5 Bible Online

تِيمُوثَاوُسْ الأَوِلْ 5 - Tunisian Arabic New Testament bible

تِيمُوثَاوُسْ الأَوِلْ 5

¹مَا تْوَبِّخْشْ وَاحِدْ مِالشْيُوخْ، آمَا أَنْصْحُو بِسْيَاسَة كَإِنُّو بُوكْ، وِاتْصَرِّفْ مْعَ الشَّبَابْ كَإِنّْهُمْ إِخْوْتِكْ،

²وِالعْزَايِزْ كَإِنّْهُمْ أُمَّاتْ مْتَاعِكْ، آمَا البْنَاتْ اتْصَرِّفْ مْعَاهُمْ بْكُلْ طْهَارَة كَإِنّْهُمْ خْوَاتِكْ.

³إِكْرِمْ النْسَاء الِّي هُومَا بِالرَّسْمِي رْجَالْهُمْ مُوتَى.

⁴وْإِذَا كَانْ مْرَا رَاجِلْهَا مِيتْ عِنْدْهَا وْلاَدْ وِلاَّ وْلاَدْ وْلاَدْهَا، خَلِّيهُمْ يِتْعَلّْمُوا فِي الأُوِّلْ كِيفَاشْ يِتْصَرّْفُوا مْعَ امَّالِيهُمْ بِالتَّقْوَى وِيْقُومُوا بْوَاجِبْهُمْ عْلَى وَالْدِيهُمْ، رَاهُو الشَّيْء هَاذَا يْرَضِّي اللهْ.

⁵آمَا المْرَا الِّي رَاجِلْهَا مِيتْ بِالحَقْ، وِلِّي هِيَ مَا عِنْدْهَاشْ شْكُونْ يْقُومْ بِيهَا، رَاهِي عِنْدْهَا رَجَاءْ فِي رَبِّي، تْصَلِّيلُو وْتُطْلْبُو لِيلْ وِنْهَارْ.

⁶وْآمَا المْرَا الِّي رَاجِلْهَا مِيتْ الِّي جْرَاتْ وْرَاء الشْهَاوِي رَاهِي مِيتَة حَتَّى إِذَا كَانْهَا حَيَّة.

⁷نْوَصِّيهُمْ عْلَى الشَّيْء هَاذَاكَا بَاشْ يْكُونُوا مَا عْلِيهُمْشْ لُومْ.

⁸وِلِّي مَا يِتْلْهَاشْ بْأَقَارْبُو، وْبِالأَخَصْ عَايِلْةْ دَارُو، رَاهُو نْكَرْ فِي الإِيمَانْ وْهُوَ أَخْيِبْ مِلِّي مُوشْ مُؤْمِنْ.

⁹المْرَا مَا تِتْقَيِّدْشْ فِي الدُّوسِي مْتَاعْ النْسَاء الِّي رْجَالْهُمْ مُوتَى إِلاَّ إِذَا وَلَّى عْمُرْهَا سِتِّينْ سْنَة عْلَى الأَقَلْ وْكَانِتْ مَرْةْ رَاجِلْ وَاحِدْ،

¹⁰وْيِشْهْدُولْهَا الِّي هِيَ تَعْمِلْ فِي الخِيرْ، كِرَبَّاتْ وْلاَدْهَا تُرْبْيَة بَاهْيَة، وْضَيّْفِتْ البْرَايْنِيَّة، وِتِلْهَاتْ بالإِخْوَة القِدِّيسِينْ، وْعَاوْنِتْ المَنْكُوبِينْ، وْعَمْلِتْ الحَاجَاتْ البَاهْيَة الكُلْهَا.

¹¹النْسَاء الِّي رْجَالْهُمْ مُوتَى وِلِّي هُومَا مَازَالُوا صْغَارْ مَا يِتْقَيّْدُوشْ فِي الدُّوسِي مْتَاعْ النْسَاء الِّي رْجَالْهُمْ مُوتَى، رَاهُمْ كِيِشْتْهَاوْ بَاشْ يْعَرّْسُوا يِسْتَغْنَاوْ عْلَى المَسِيحْ.

¹²وْهَكَّا يَنْسَاوْ العَهْدْ مْتَاعْهُمْ الأُوِّلْ مْعَاهْ، وِيْوَلِّيوْ مُدَانِينْ كِمَا وْفَاوْشْ بِالوَعْدْ مْتَاعْهُمْ.

¹³وْهُومَا زِيدْ عْلَى هَاذَاكَا يِتْعَلّْمُوا البْطَالَة وِالمَشْيَانْ مِنْ دَارْ لْدَارْ، كِيفْ مَا يِتْعَلّْمُوا زَادَا الحْدِيثْ الفَارِغْ وِاللَّهْوَة بِالحَاجَاتْ الِّي خَاطْيِتْهُمْ وِالكْلاَمْ فِي حَاجَاتْ مَا تْخُصّْهُمْشْ.

¹⁴هَاذَاكَا عْلاَشْ نْحِبْ الِّي النْسَاء الِّي رْجَالْهُمْ مُوتَى وِلِّي هُومَا مَازَالُوا صْغَارْ يْعَرّْسُوا وِيْجِيبُوا وْلاَدْ وْيِتْلْهَاوْ بِبْيُوتْهُمْ وِالعْدُو مَا يْشِدِّشْ عْلِينَا حَتَّى حَاجَة،

¹⁵وْبِالأَخَصْ الِّي ثَمَّة شْكُونْ مِنْهُمْ الِّي غُلْطُوا وْتَبّْعُوا الشِّيطَانْ.

¹⁶وْإِذَا كَانْ مْرَا مُؤْمْنَة عِنْدْهَا نْسَاء رْجَالْهُمْ مُوتَى فِي عَايْلِتْهَا، خَلِّيهَا تْعَاوِنْهُمْ وْمَا تْثَقِّلْشْ عْلَى الكَنِيسَة بَاشْ تْنَجِّمْ تْعَاوِنْ النْسَاء الِّي رْجَالْهُمْ مُوتَى الِّي هُومَا مِحْتَاجِينْ.

¹⁷وِشْيُوخْ الكَنِيسَة الِّي يِخْدْمُوا فِي خِدْمِتْهُمْ بِالقْدَا يِسْتْحَقُّوا بَاشْ تِكْرْمُوهُمْ قَدْ الأُخْرِينْ مَرّْتِينْ، وْبِالأَخَصْ الِّي يِتْعْبُوا فِي التَّبْشِيرْ وِالتَّعْلِيمْ.

¹⁸رَاهُو الكْتَابْ يْقُولْ: «مَا تْحُطُّشْ كْمَامَة عْلَى فُمْ الثُّورْ وَقْتِلِّي هُوَ يِدْرِسْ» وِ «الخَدَّامْ يِسْتْحَقْ أُجْرْتُو.»

¹⁹مَا تِقْبِلْشْ شْكَايَة عْلَى شِيخْ كَانْ بِشْهَادِةْ زُوزْ شْهُودْ وِلاَّ ثْلاَثَة.

²⁰آمَا الِّي يَبْقَاوْ يَعْمْلُوا الذْنُوبْ وَبِّخْهُمْ قُدَّامْ النَّاسْ المُوجُودِينْ الكُلْهُمْ بَاشْ الأُخْرِينْ يْخَافُوا.

²¹وْنِتْرَجَّاكْ قُدَّامْ اللهْ وِالمَسِيحْ يَسُوعْ وِالمْلاَيْكَة المُخْتَارِينْ بَاشْ تَحْفِظْ الوْصَايَا هَاذِي مِنْ غِيرْ مَا تْعَامِلْ حَتَّى حَدْ وِلاَّ تْبَجّْلُو عْلَى الآخَرْ فِي أَيْ حَاجَة تِتْعْمَلْ.

²²مَا تِزْرِبْشْ وِتْحُطْ يِدِّكْ عْلَى أَيْ وَاحِدْ وْمَا تْكُونِشْ شْرِيكْ فِي ذْنُوبْ غِيرِكْ، وْخَلّي رُوحِكْ طَاهِرْ.

²³مَا عَادِشْ مِاليُومْ تُشْرُبْ المَاء آكَاهُو، آمَا اشْرُبْ شْوَيَّة شْرَابْ عْلَى خَاطِرْ مَعْدْتِكْ وِالأَمْرَاضْ الِّي عِنْدِكْ.

²⁴ثَمَّة نَاسْ ذْنُوبْهُمْ وَاضْحَة قْبَلْ مَا يِتْحَاسْبُوا، وْثَمَّة شْكُونْ ذْنُوبْهُمْ مَا تُظْهُرْ الِّي بَعْدْ مَا يِتْحَاسْبُوا.

²⁵وِالأَعْمَالْ الصَّالْحَة زَادَا تْبَانْ الِّي هِيَ وَاضْحَة، وْحَتَّى الأَعْمَالْ الِّي مَا هِيشْ وَاضْحَة مُوشْ مُمْكِنْ تَبْقَى مْخُبّْيَة.