Read Tunisian Arabic New Testament تِيمُوثَاوُسْ الأَوِلْ 6 Bible Online

تِيمُوثَاوُسْ الأَوِلْ 6 - Tunisian Arabic New Testament bible

تِيمُوثَاوُسْ الأَوِلْ 6

¹الِّي هُومَا عَبِيدْ الكُلْهُمْ يِلْزِمْهُمْ يَعْرْفُوا الِّي الأَسْيَادْ مْتَاعْهُمْ يِسْتْحَقُّوا بَاشْ يِحْتَرْمُوهُمْ، بَاشْ حَتَّى حَدْ مَا يَكْفِرْ بْإِسْمْ اللهْ وْبِالتَّعْلِيمْ مْتَاعْنَا.

²وْإِذَا كَانْ الأَسْيَادْ مْتَاعْهُمْ مُؤْمْنِينْ، مَا يَحْقْرُوهُمْشْ عْلَى خَاطِرْهُمْ إِخْوَة، آمَا يِلْزِمْهُمْ يِخْدْمُوهُمْ أَكْثِرْ عْلَى خَاطِرْ الِّي قَاعْدِينْ يِسْتْفَادُوا مِالخِدْمَة مْتَاعْهُمْ هُومَا مُؤْمْنِينْ وْأَحْبَابْ. الشَّيْء هَاذَا عَلّْمُو وْوَصِّي بِيهْ

³وْإِذَا كَانْ وَاحِدْ عَلِّمْ حَاجَة أُخْرَى غِيرْ الحَاجَة هَاذِي وْخَالِفْ الكْلاَمْ الصْحِيحْ، كْلاَمْ رَبّْنَا يَسُوعْ المَسِيحْ، وِالتَّعْلِيمْ الِّي يُصْلُحْ لِلتَّقْوَى،

⁴رَاهُو رَاجِلْ عْمَاهْ التَّكَبُّرْ وْمُوشْ فَاهِمْ حَتَّى شَيْء، يْمُوتْ عْلَى النِّقَاشْ وِالعْنَادْ الِّي يْجِي مِنُّو الحُسْدْ وِالفُرْقَة وِالسَّبَّانْ وْسُوءْ الظَّنْ

⁵وِالعَرْكْ بِينْ نَاسْ عْقُولْهُمْ فِسْدِتْ وْضَيّْعُوا الحَقْ وْرَدُّوا التَّقْوَى بَابْ مْتَاعْ رِبْحْ.

⁶إِي نْعَمْ، التَّقْوَى فِيهَا بَرْشَة رِبْحْ اذَا كَانْ مْعَاهَا القَنَاعَة،

⁷مَا جِينَاشْ لِلدِّنْيَا هَازِّينْ حَاجَة، وْمَا انَّجّْمُوشْ نُخْرْجُوا مِنْهَا وِمْعَانَا حَاجَة.

⁸يِكْفِينَا إِنَّا عِنْدْنَا مَا نَاكْلُوا وْمَا نِلْبْسُوا.

⁹آمَا الِّي يْلَوّْجُوا عْلَى الغْنَى رَاهُمْ يِتْجَرّْبُوا وْيُحْصْلُوا فِي المِنْدَافْ وْفِي بَرْشَة شْهَاوِي عَمْيَة تْضُرْ وِلِّي هِيَ تْخَلِّي النَّاسْ يِدَّمّْرُوا وْيِتْهِلْكُوا مَرَّة وَحْدَة.

¹⁰رَاهِي مْحَبِّةْ الفْلُوسْ أَصْلْ الشْرُورْ الكُلْهَا، وْثَمَّة نَاسْ سْتَسْلْمُولْهَا وْبِعْدُوا عْلَى الإِيمَانْ وْسَبَبُوا بَرْشَة وْجَايِعْ لِرْوَاحْهُمْ.

¹¹آمَا إِنْتِ يَا الرَّاجِلْ الِّي يْحِبُّو اللهْ، تْجَنِّبْ الشَّيْء هَاذَا الكُلُّو. وْأَسْعَى وْرَاء البِرْ وِالتَّقْوَى وِالإِيمَانْ وِالمْحَبَّة وِالصَّبْرْ وِالطِّيبَة.

¹²وْجَاهِدْ فِي الإِيمَانْ جِهَادْ بَاهِي وْإِرْبِحْ الحَيَاةْ الأَبَدِيَّة الِّي اللهْ دْعَاكْ لِيهَا وِشْهِدْتِلْهَا شْهَادَة بَاهْيَة فِي حْضُورْ بَرْشَة شْهُودْ.

¹³وِنْوَصِّيكْ قُدَّامْ اللهْ الِّي يِحْيِي كُلْ شَيْء وْقُدَّامْ المَسِيحْ يَسُوعْ الِّي شْهِدْ أَحْسِنْ شْهَادَة قُدَّامْ بِيلاَطُسْ البُنْطِي،

¹⁴إِنِّكْ تْحَافِظْ عْلَى الوْصِيَّة طَاهِرْ مِالعِيبْ وْمَا عْلِيكْشْ لُومْ حَتَّى لِينْ يْجِي اليُومْ الِّي يُظْهُرْ فِيهْ رَبّْنَا يَسُوعْ المَسِيحْ.

¹⁵وْهُوَ بَاشْ يُظْهُرْ فِي وَقْتُو. المُبَارَكْ، مَلِكْ المُلُوكْ وْرَبْ الأَرْبَابْ،

¹⁶هُوَ وَحْدُو الِّي خَالِدْ، يُسْكُنْ فِي النُّورْ الِّي مَا يِتْقْرَبْشْ، حَتَّى بَشَرْ مَا شَافُو وْمُوشْ بَاشْ يْشُوفُو، لِيهْ الكَرَامَة وِالقُوَّة لِلأَبَدْ. آمِينْ.

¹⁷وْيِلْزْمِكْ تْوَصِّي النَّاسْ الغُنْيَا فِي الدِّنْيَا هَاذِي بَاشْ مَا يِتْكَبّْرُوشْ وْمَا يْعَمّْلُوشْ عْلَى الغْنَى الِّي مَا يْدُومِشْ، آمَا يِتْوَكّْلُوا عْلَى اللهْ الِّي يِرْزِقْنَا بِالحَاجَاتْ الِّي نِتْنَعّْمُوا بِيهُمْ الكُلْهُمْ،

¹⁸وْبَاشْ يَعْمْلُوا الخِيرْ وِيْكُونُوا غُنْيَا بِالأَعْمَالْ الصَّالْحَة، وْيَعْمْلُوا الخِيرْ بَرْشَة وِيْخَلِّيوْ غِيرْهُمْ يْشَارْكُوهُمْ فِي الخِيرَاتْ مْتَاعْهُمْ.

¹⁹وْهَكَّا يِكْنْزُوا لِرْوَاحْهُمْ كَنْزْ كِيفْ سَاسْ لِلمُسْتَقْبَلْ، ويَاخْذُوا الحَيَاةْ الأَبَدِيَّة.

²⁰يَا تِيمُوثَاوُسْ، احْفِظْ الأَمَانَة وْإِبْعِدْ عْلَى الكْلاَمْ الفَارِغْ وِالنِّقَاشْ الزَّايِدْ الِّي النَّاسْ مَاشِي فِي بَالْهُمْ الِّي هُوَ عِلْمْ،

²¹وِالنَّاسْ الِّي تَبّْعُوهْ بَعْدُوا عْلَى الإِيمَانْ. نِعْمِةْ اللهْ مْعَاكْ.