Read Tunisian Arabic New Testament تِيمُوثَاوُسْ الثَّانِيْ 1 Bible Online

تِيمُوثَاوُسْ الثَّانِيْ 1 - Tunisian Arabic New Testament bible

تِيمُوثَاوُسْ الثَّانِيْ 1

¹مِنْ بُولُسْ رَسُولْ المَسِيحْ يَسُوعْ بْمَشِيئِةْ اللهْ، كِيفْ مَا جَا فِي الوَعْدْ بِالحَيَاةْ الِّي هِيَ فِي المَسِيحْ يَسُوعْ،

²لْوِلْدِي تِيمُوثَاوُسْ الِّي نْحِبُّو: النِّعْمَة وِالرَّحْمَة وِالسَّلاَمْ عْلِيكْ مِنْ اللهْ الآبْ وْمِالمَسِيحْ يَسُوعْ رَبّْنَا.

³نِحْمِدْ اللهْ الِّي نِعْبِدْ فِيهْ بْضَمِيرْ طَاهِرْ كِيفْ مَا عِبْدُوهْ جْدُودِي، وْآنَا نِتْذَكِّرْ فِيكْ دِيمَا فِي صْلاَتِي لِيلْ وِنْهَارْ.

⁴كِي نِتْذَكِّرْ دْمُوعِكْ نِسْتَاحِجْ بَاشْ نْشُوفِكْ أَكْثِرْ بَاشْ نِتْمْلَى بِالفَرْحَة.

⁵وْنِتْذَكِّرْ إِيمَانِكْ الصَّادِقْ الِّي كَانْ يُسْكُنْ فِي قَلْبْ جِدَّاكْ لُوئِيسْ وْقَلْبْ أُمِّكْ أَفْنِيكِي، وْآنَا وَاثِقْ الِّي هُوَ يُسْكُنْ فِي قَلْبِكْ إِنْتِ زَادَا.

⁶هَاذَاكَا عْلاَشْ انَّبْهِكْ بَاشْ تْشَعِّلْ المَوْهْبَة الِّي عْطَاهَالِكْ اللهْ وَقْتِلِّي حَطِّيتْ عْلِيكْ يْدَيَّا.

⁷رَاهُو اللهْ مَا عْطَانَاشْ رُوحْ الخُوفْ، آمَا عْطَانَا رُوحْ القُوَّة وِالمْحَبَّة وِالتَّحَكُّمْ فِي النَّفْسْ.

⁸إِمَّالاَ مَا تَحْشِمْشْ بْإِنِّكْ تِشْهِدْ لْرَبّْنَا وْمَا تَحْشِمْشْ بِيَّا آنَا المَرْبُوطْ عْلَى خَاطْرُو، وْشَارِكْ فِي الوْجَايِعْ عْلَى خَاطِرْ الإِنْجِيلْ وِتْوَكِّلْ عْلَى قُدْرِةْ اللهْ

⁹الِّي خَلِّصْنَا وِدْعَانَا دَعْوَة مُقَدّْسَة، مُوشْ بْفَضْلْ أَعْمَالْنَا، آمَا كِيفْ مَا خَطِّطْ بْنِعْمْتُو الِّي عْطَاهَالْنَا فِي المَسِيحْ يَسُوعْ مِنْ أَوِّلْ الدِّنْيَا،

¹⁰وِكْشِفْهَالْنَا تَوَّا كِظْهُرْ المُخَلِّصْ مْتَاعْنَا المَسِيحْ يَسُوعْ الِّي قْضَى عْلَى المُوتْ وْنَوَّرْ الحَيَاةْ وِالخُلُودْ بِالإِنْجِيلْ

¹¹الِّي عْلَى خَاطْرُو آنَا تْحَطِّيتْ مُبَشِّرْ وْرَسُولْ وْمُعَلِّمْ،

¹²وْنِتْحَمِّلْ التْعَبْ وْمَا نِحْشِمْشْ، عْلَى خَاطِرْنِي نَعْرِفْ عْلَى شْكُونْ تْوَكِّلْتْ وْنَاثِقْ الِّي هُوَ قَادِرْ بَاشْ يَحْفِظْ الشَّيْء الِّي امِّنِّي عْلِيهْ حَتَّى يْجِي النْهَارْ هَاذَاكَا.

¹³إِمَّالاَ أَعْمِلْ بِالكْلاَمْ الصْحِيحْ الِّي سْمَعْتُو مِنِّي، وْإِثْبِتْ فِي الإِيمَانْ وِالمْحَبَّة الِّي فِي المَسِيحْ يَسُوعْ.

¹⁴احْفِظْ الأَمَانَة الصَّالْحَة بْعُونْ الرُّوحْ القُدُسْ الِّي يُسْكُنْ فِينَا.

¹⁵إِنْتِ تَعْرِفْ إِنُّو الِّي فِي أَسِيَّة الكُلْهُمْ بِعْدُوا عْلِيَّا، وْمِنْهُمْ فِيجَلُّسْ وْهَرْمُوجِينِيسْ.

¹⁶اللهْ يْبَارِكْ بِيتْ أُونِيسِفُورُسْ عْلَى خَاطْرُو شَجَّعْنِي بَرْشَة وْمَا حْشِمْشْ بِالسْلاَسِلْ مْتَاعِي،

¹⁷آمَا بْدَا يْلَوِّجْ عْلِيَّا بَعْدْ مَا وْصُلْ لْرُومَا حَتَّى لِينْ لْقَانِي.

¹⁸الرَّبْ يِنْعِمْ عْلِيهْ بَاشْ يَلْقَى الرَّحْمَة مِنْ عِنْدْ الرَّبْ نْهَارِتْ الِّي يَرْجَعْ! وْإِنْتِ تَعْرِفْ بِالقْدَا قَدَّاشْ خْدِمْنِي وَقْتِلِّي آنَا فِي أَفَسُسْ.