Read Tunisian Arabic New Testament تِيمُوثَاوُسْ الثَّانِيْ 2 Bible Online

تِيمُوثَاوُسْ الثَّانِيْ 2 - Tunisian Arabic New Testament bible

تِيمُوثَاوُسْ الثَّانِيْ 2

¹وْإِنْتِ يَا وِلْدِي، كُونْ قْوِي بِالنِّعْمَة الِّي فِي المَسِيحْ يَسُوعْ،

²وْأَعْطِي الِّي سْمَعْتُو مِنِّي بِحْضُورْ بَرْشَة شْهُودْ أَمَانَة لْنَاسْ أُمَنَاءْ يْكُونُوا قَادْرِينْ بَاشْ يْعَلّْمُوا غِيرْهُمْ.

³شَارِكْ فِي الصَّبْرْ عْلَى الوْجَايِعْ كِيفْ جُنْدِي صَالِحْ لِلمَسِيحْ يَسُوعْ.

⁴رَاهُو الجُنْدِي مَا يِشْغِلْشْ رُوحُو بْأُمُورْ النَّاسْ إِذَا كَانْ يْحِبْ يْرَضِّي القَايِدْ مْتَاعُو.

⁵وِلِّي يَلْعِبْ فِي الرِّيَاضَة مَا يِرْبِحْ الجَايْزَة كَانْ كِيَلْعِبْ بِالقَانُونْ.

⁶والفَلاَّحْ الِّي يِتْعِبْ يِلْزْمُو يْكُونْ أَوِّلْ وَاحِدْ يَاخُذْ بَايُو مِالغَلَّة.

⁷إِفْهِمْ الشَّيْء الِّي نْقُولْ فِيهْ لِيكْ، وِالرَّبْ يْرُدُّكْ قَادِرْ بَاشْ تِفْهِمْ كُلْ شَيْء.

⁸وِاتْذَكِّرْ يَسُوعْ المَسِيحْ الِّي قَامْ مِنْ بِينْ المُوتَى وْكَانْ مِنْ ذُرِّيِّةْ دَاوُدْ، وْرَاهِي هِيَ البْشَارَة الِّي نْخَبِّرْ بِيهَا

⁹وِنْقَاسِي فِي الوْجَايِعْ عْلَى خَاطِرْهَا حَتَّى لِينْ تِرْبَطّْ بِالسْلاَسِلْ كِيفْ المُجْرِمْ. آمَا كْلاَمْ اللهْ مَا يِتْرْبَطْشْ.

¹⁰هَاذَاكَا عْلاَشْ نِتْحَمِّلْ فِي كُلْ شَيْء عْلَى خَاطِرْ الِّي خْتَارْهُمْ اللهْ، بَاشْ هُومَا زَادَا يَاخْذُوا الخَلاَصْ الِّي فِي المَسِيحْ يَسُوعْ مْعَ المَجْدْ الِّي يْدُومْ لِلأَبَدْ.

¹¹صْدَقْ الِّي قَالْ الِّي: اذَا كَانْ مُتْنَا مْعَاهْ بَاشْ نَحْيَاوْ مْعَاهْ

¹²وْإِذَا كَانْ صْبَرْنَا بَاشْ نُحْكْمُوا مْعَاهْ وْإِذَا كَانْ نْكَرْنَاهْ بَاشْ يُنْكُرْنَا

¹³وْإِذَا كَانْ خُنَّاهْ بَاشْ يَحْفِظْ الأَمَانَة رَاهُو مَا يُنْكُرْشْ رُوحُو.

¹⁴ذَكِّرْهُمْ بِالشَّيْء هَاذَاكَا وْنَبِّهُّمْ قُدَّامْ اللهْ بَاشْ مَا يُدْخْلُوشْ فِي النِّقَاشَاتْ الِّي مَا فِيهَاشْ فَايْدَة، وْمَا تُصْلُحْ كَانْ بَاشْ ادَّمِّرْ الِّي يِسْمْعُوهَا.

¹⁵وْأَسْعَى بَاشْ تْكُونْ رَاجِلْ مَقْبُولْ عِنْدْ اللهْ وْخَادِمْ مَا يِحْشِمْشْ بِالخِدْمَة مْتَاعُو وِتْكُونْ مُسْتَقِيمْ وَقْتِلِّي تْعَلِّمْ كِلْمِةْ الحَقْ.

¹⁶وِتْجَنِّبْ النِّقَاشْ الفَارِغْ وِالفَاسِدْ، رَاهُو يْخَلِّي النَّاسْ يِبْعْدُوا عْلَى رَبِّي أَكْثِرْ،

¹⁷وِكْلاَمْهُمْ يِتْنَقِّلْ كِيفْ البْرَصْ، وْمِنْهُمْ هِيمِينَايُسْ وْفِيلِيتُسْ،

¹⁸الِّي بِعْدُوا عْلَى الحَقْ وَقْتِلِّي قَالُوا الِّي القْيَامَة جَاتْ، وْهَكَّا فَسّْدُوا إِيمَانْ جْمَاعَة مِالنَّاسْ.

¹⁹آمَا السَّاسْ الصْحِيحْ الِّي حَطُّو اللهْ رَاهُو مَازَالْ ثَابِتْ ومَحْطُوطَة عْلِيهْ الكِلْمَة «رَاهُو الرَّبْ يَعْرِفْ النَّاسْ الِّي تَابْعِينُو» وِ «الِّي يُذْكُرْ إِسْمْ الرَّبْ يِلْزْمُو يِتْجَنِّبْ الشَّرْ.»

²⁰وْفِي الدَّارْ الكْبِيرَة ثَمَّة مَاعُونْ مِنْ ذْهَبْ وْفِضَّة، كِيمَا ثَمَّة زَادَا مِاللُّوحْ وِالطِّينْ، ثَمَّة مِنُّو الِّي نِسْتَعْمْلُوهْ فِي حَاجَاتْ عِنْدْهَا قِيمَة وْمِنُّو الِّي نِسْتَعْمْلُوهْ فِي حَاجَاتْ فَارْغَة.

²¹الِّي يْطَهِّرْ رُوحُو مِالشْرُورْ هَاذِي الكُلْهَا، يْوَلِّي مَاعُونْ عَنْدُو قِيمَة وْمُقَدَّسْ وْنَافِعْ لْسِيدُو، مُسْتْعَدْ بَاشْ يَعْمِلْ الأَعْمَالْ الصَّالْحَة.

²²تْجَنِّبْ الشْهَاوِي مْتَاعْ الشَّبَابْ وْأَسْعَى لِلبِرْ وِالإِيمَانْ وِالمْحَبَّة وِالسَّلاَمْ مْعَ الِّي يِدْعِيوْ فِي الرَّبْ بْقَلْبْ طَاهِرْ.

²³وْإِبْعِدْ عْلَى الحْكَايَاتْ مْتَاعْ البْهَالِيلْ وِالجُهَّالْ، عْلَى خَاطِرْهَا تَعْمِلْ العَرْكْ كِيفْ مَا تَعْرِفْ.

²⁴وْخَادِمْ الرَّبْ مَا يِلْزْمُوشْ يَعْمِلْ العَرْكْ، آمَا يِلْزْمُو يْسَايِسْ النَّاسْ الكُلْهُمْ، وِيْكُونْ مِسْتْحَقْ بَاشْ يْعَلِّمْ بْصَبْرْ،

²⁵طَيِّبْ وَقْتِلِّي يْأَدِّبْ الِّي يْجِيوْ ضِدُّوا، بَالِكْشِي اللهْ يِهْدِيهُمْ لِلتَّوْبَة وْيَعْرْفُوا الحَقْ،

²⁶وْيَرْجْعُوا لِعْقُولاَتْهُمْ كِيِفْلْتُوا مِالمِنْدَافْ مْتَاعْ بْلِيسْ الِّي اطَّرْشِقْ عْلِيهُمْ وْخَلاَّهُمْ يِسْمْعُوا كْلاَمُو.