Read Tunisian Arabic New Testament تِيمُوثَاوُسْ الثَّانِيْ 3 Bible Online

تِيمُوثَاوُسْ الثَّانِيْ 3 - Tunisian Arabic New Testament bible

تِيمُوثَاوُسْ الثَّانِيْ 3

¹وْأَعْرِفْ الِّي بَاشْ تْجِي أَوْقَاتْ صْعِيبَة فِي النْهَارَاتْ الإِخْرَانِينْ،

²يْكُونُوا فِيها النَّاسْ أَنَانِيِّينْ، يْحِبُّوا الفْلُوسْ، مِتْكَبّْرِينْ، يِتْفُوخْرُوا، يْسِبُّوا، مَا يْطِيعُوشْ وَالْدِيهُمْ، نَاكْرِينْ لِلجْمِيلْ، مُغْشَاشِينْ،

³لاَ عِنْدْهُمْ إِنْسَانِيَّة وْلاَ عَهْدْ، يْقَطّْعُوا عَرْضْ النَّاسْ، مِتْهَوّْرِينْ، مِتْوَحّْشِينْ، أَعْدَاءْ لِلخِيرْ،

⁴خَايْنِينْ، مْسَيّْبِينْ، عْمَاهُمْ التَّكَبُّرْ، يْحِبُّو االشْهَاوِي وْمَا يْحِبُّوشْ الله،

⁵شَادِّينْ صْحِيحْ فِي المَظَاهِرْ مْتَاعْ التَّقْوَى وْمَا يْحِبُّوشْ القُوَّة مْتَاعْهَا. إِمَّالاَ إِبْعِدْ عْلَى النَّاسْ هَاذُمْ.

⁶وْثَمَّة شْكُونْ مِنْهُمْ يُدْخْلُوا لِلدْيَارْ وِيْغُرُّوا نْسَاء ضْعَافْ وْمِلْيَانِينْ بِالذْنُوبْ وِيْتَبّْعُوا فِي الشْهَاوِي الكُلْهَا،

⁷دِيمَا يِتْعَلّْمُوا وِعْمُرْهُمْ مَا يْنَجّْمُوا يَعْرْفُوا الحَقْ.

⁸وْكِيفْ مَا يَنِّيسْ وْيَمْبْرِيسْ جَاوْ ضِدْ مُوسَى، النَّاسْ هَاذُومَا زَادَا بَاشْ يْجِيوْ ضِدْ الحَقْ. رَاهُمْ نَاسْ عْقُولْهُمْ فَاسْدَة وْمَا يُصْلْحُوشْ لِلإِيمَانْ،

⁹آمَا مَا هُمْشْ بَاشْ يُوصْلُوا لْحَتَّى شَيْء عْلَى خَاطِرْ الجَهْلْ مْتَاعْهُمْ بَاشْ يِتْكْشِفْ قُدَّامْ النَّاسْ الكُلْهُمْ كِيفْ مَا تِكْشِفْ الجَهْلْ مْتَاعْ يِنِّيسْ وْيِمْبْرِيسْ.

¹⁰آمَا إِنْتِ رَاكْ تَبَّعْتْنِي فِي الشَّيْء الِّي نْعَلِّمْ فِيهْ وْسِيرْتِي وْقَصْدِي وْإِيمَانِي وْصَبْرِي وِمْحَبّْتِي وْشَدَّانِي صْحِيحْ

¹¹وْكِيفَاشْ تْحَمِّلْتْ الإِضْطِهَادْ وِالعْذَابْ وِلِّي صَارْلِي فِي أَنْطَاكْيَة وْإِيقُونْيَة وْلِسْتْرَة. وْقَدَّاشْ عَانِيتْ مِالعْذَابْ. آمَا الرَّبْ مَنَّعْنِي مِنْهَا الكُلْهَا.

¹²رَاهُو كُلْ مِنْ يْحِبْ يْعِيشْ فِي المَسِيحْ يَسُوعْ عِيشِةْ التَّقْوَى لاَزْمُو يِتْعَذِّبْ.

¹³آمَا الأَشْرَارْ وِالدَّجَّالِينْ رَاهُمْ شَرّْهُمْ يْزِيدْ وْهُومَا يِخْدْعُوا وْيِتْخِدْعُوا.

¹⁴إِمَّالاَ إِنْتِ إِثْبِتْ فِي الشَّيْء الِّي تْعَلِّمْتُو وْمِتْأَكِّدْ مِنُّو وْإِنْتِ عَارِفْ مِنْ عِنْدْ شْكُونْ خْذِيتُو.

¹⁵رَاكْ مِلِّي كُنْتْ صْغِيرْ تَعْرِفْ الكْتُبْ المُقَدّْسَة القَادْرَة بَاشْ تَعْطِيكْ الحِكْمَة الِّي تِهْدِي لِلخَلاَصْ فِي الإِيمَانْ بِالمَسِيحْ يَسُوعْ.

¹⁶رَاهُو الكْتَابْ الكُلُّو وْحَى بِيهْ اللهْ، صَالِحْ بَاشْ يْعَلِّمْ وِيْوَبِّخْ وِيْصَلِّحْ وِيْأَدِّبْ فِي البِرْ،

¹⁷بَاشْ الرَّاجِلْ مْتَاعْ اللهْ يْكُونْ كَامِلْ وْمُسْتْعَدْ بَاشْ يَعْمِلْ الأَعْمَالْ الصَّالْحَة الكُلْهَا.