Read Tunisian Arabic New Testament تِيمُوثَاوُسْ الثَّانِيْ 4 Bible Online

تِيمُوثَاوُسْ الثَّانِيْ 4 - Tunisian Arabic New Testament bible

تِيمُوثَاوُسْ الثَّانِيْ 4

¹نِتْرَجَّاكْ قُدَّامْ اللهْ وِالمَسِيحْ يَسُوعْ الِّي بَاشْ يُحْكُمْ عْلَى الحَيِّينْ وِالمُوتَى وَقْتِلِّي يُظْهُرْ وِتْجِي مَمْلِكْتُو

²إِنِّكْ تْبَشِّرْ بِكْلاَمْ اللهْ وِتْشِدْ صْحِيحْ فِي إِنِّكْ تْخَبِّرْ بِيهْ فِي وَقْتُو وْفِي غِيرْ وَقْتُو، وْإِنِّكْ تْوَبِّخْ وْتَقْنِعْ وْتُوعِظْ وْإِنْتِ تْعَلِّمْ بْكُلْ مَا عِنْدِكْ مِنْ صَبْرْ.

³رَاهُو بَاشْ يْجِي وَقْتْ النَّاسْ مَا عَادِشْ يْحِبُّو التَّعْلِيمْ الصْحِيحْ، آمَا يْتَبّْعُوا الشْهَاوِي مْتَاعْهُمْ وِيْحُطُّوا مُعَلّْمِينْ يْسَمّْعُوهُمْ الشَّيْء الِّي يِعْجِبْهُمْ،

⁴وْيِبْعْدُوا عْلَى سَمْعَانْ الحَقْ وْيِسْمْعُوا الخْرَافَاتْ.

⁵إِمَّالاَ إِنْتِ كُونْ دِيمَا فَايِقْ، وِاتْحَمِّلْ الوْجَايِعْ وْأَعْمِلْ الخِدْمَة مْتَاعْ المُبَشِّرْ، وْ كَمِّلْ الخِدْمَة مْتَاعِكْ.

⁶آمَا آنَا رَانِي ذْبِيحَة قَاعِدْ دَمّْهَا يِجْرِي وْسَاعْتِي قُرْبِتْ.

⁷جَاهِدْتْ بِالبَاهِي وْتَمِّمْتْ السِّبَاقْ وْحَافِظْتْ عْلَى الإِيمَانْ،

⁸وْتَوَّا يِسْتَنَّى فِيَّ تَاجْ البِرْ الِّي بَاشْ يْجَازِينِي بِيهْ الرَّبْ الِّي هُوَ القَاضِي العَادِلْ، مُوشْ آنَا وَحْدِي، آمَا زَادَا الِّي مِشْتَاقِينْ للنْهَارْ الِّي بَاشْ يُظْهُرْ فِيهْ.

⁹إِيجَالِي فِيسَعْ،

¹⁰رَاهُو دِيمَاسْ خَلاَّنَا وْحَبْ الدِّنْيَا هَاذِي وْسَافِرْ لِتْسَالُونِيكِي، وِكْرِيسْكِيسْ سَافِرْ لْغَلاَطْيَة وْتِيطُسْ لْدَلْمَاطْيَة،

¹¹وْلُوقَا وَحْدُو بْقَى مْعَايَا. هِزْ مَرْقُسْ وْجِيبْهُولِي عْلَى خَاطْرُو يْفِيدْنِي بَرْشَة فِي خِدْمِةْ الرَّبْ.

¹²آمَا تِيخِيكُسْ رَانِي بْعَثْتُو لْأَفَسُسْ.

¹³وَقْتِلِّي تْجِي جِيبْ مْعَاكْ كَبُّوطِي الِّي خَلِّيتُو فِي تَرُوَاسْ عِنْدْ كَارْبِسْ، وْجِيبْ الكْتُبْ زَادَا، وْبِالأَخَصْ الوْرَاقْ الِّي مِالجِّلْدْ.

¹⁴اسْكَنْدَرْ النَّحَّاسْ عْمَلْ مْعَايَا الخَايِبْ بَرْشَة، وِالرَّبْ بَاشْ يْحَاسْبُو عْلَى عْمَايْلُو.

¹⁵إِنْتِ زَادَا رُدْ بَالِكْ مِنُّو عْلَى خَاطِرْ جَا ضِدْ كْلاَمْنَا بَرْشَة.

¹⁶حَتَّى حَدْ مَا وْقُفْ مْعَايَا وَقْتِلِّي دَافِعْتْ عْلَى رُوحِي فِي أَوِّلْ مَرَّة، آمَا الكُلْهُمْ خَلاَّوْنِي. إِنْ شَاءْ اللهْ رَبِّي مَا يْحَاسِبْهُمْشْ!

¹⁷آمَا الرَّبْ وْقُفْ مْعَايَا وْقَوَّانِي وْنَجِّمْتْ نْخَبِّرْ بِالدَّعْوَة بَاشْ الشْعُوبْ الكُلْهُمْ يِسْمْعُوا، وِمْنَعْتْ مِنْ فُمْ الصِّيدْ،

¹⁸وِالرَّبْ بَاشْ يْنَجِّينِي مِنْ كُلْ شَرْ وْيَحْفِظْنِي لْمَمْلِكْةْ السْمَاوَاتْ مْتَاعُو. المَجْدْ لِيهْ لِلأَبَدْ. آمِينْ.

¹⁹سَلِّمْ عْلَى بْرِسْكِلَّة وْأَكِيلاَ وِعْلَى عَايِلْةْ أُونِيسِفُورُسْ.

²⁰أَرَسْطُوسْ بْقَى فِي كُورِنْثُوسْ، آمَا تُرُوفِيمُسْ رَانِي خَلِّيتُو فِي مِيلِيتُسْ عْلَى خَاطْرُو مْرِيضْ.

²¹إِيجَانِي فِيسَعْ قْبَلْ الشْتَاء. يْسَلِّمْ عْلِيكْ أُوبُولُسْ وَبُودِيسْ وَلِينُسْ وَكْلُودْيَة وِالإِخْوَة الكُلْهُمْ.

²²الرَّبْ يْكُونْ مْعَ رُوحِكْ. النِّعْمَة مْعَاكُمْ.