Read Tunisian Arabic New Testament تِيطُسْ 1 Bible Online

تِيطُسْ 1 - Tunisian Arabic New Testament bible

تِيطُسْ 1

¹مِنْ بُولُسْ عَبْدْ اللهْ وْرَسُولْ يَسُوعْ المَسِيحْ بَاشْ يِهْدِي الِّي خْتَارْهُمْ اللهْ لِلإِيمَانْ وِلْمَعْرِفْةْ الحَقْ الِّي تْوَافِقْ التَّقْوَى

²وْهُومَا عِنْدْهُمْ رَجَاءْ فِي الحَيَاةْ الأَبَدِيَّة الِّي وْعِدْ بِيهَا اللهْ الصَّادِقْ مِنْ أَوِّلْ الدِّنْيَا،

³وْظَهِّرْ كِلْمْتُو فِي وَقْتْهَا بِالبْشَارَة الِّي آنَا تِمِّنْتْ عْلِيهَا كِيفْ مَا أْمَرْ اللهْ مُخَلِّصْنَا،

⁴لْتِيطُسْ وِلْدِي الحَقَّانِي فِي الإِيمَانْ الِّي أَحْنَا مِتْشَارْكِينْ فِيهْ. النِّعْمَة وِالسَّلاَمْ عْلِيكْ مِنْ اللهْ الآبْ وِالمَسِيحْ يَسُوعْ مُخَلِّصْنَا.

⁵خَلِّيتِكْ فِي كْرِيتْ بَاشْ تْكَمِّلْ تْنَظِّمْ الحَاجَاتْ النَّاقْصَة وِتْحُطْ شْيُوخْ فِي كُلْ مْدِينَة كِيفْ مَا وَصِّيتِكْ،

⁶تْحُطْ الِّي مَا عْلِيهِشْ لُومْ، ورَاجِلْ مْرَا وَحْدَة، وِوْلاَدُو مُؤْمْنِينْ وْمَا هُمْشْ مَتْهُومِينْ بِالخْلاَعَة وِالعِصْيَانْ.

⁷الأُسْقُفْ يِلْزْمُو يْكُونْ وْكِيلْ عْلَى خِدْمِةْ اللهْ وْيِلْزْمُو يْكُونْ مَا عْلِيهِشْ لُومْ، كِيفْ إِنْسَانْ مْكَلّْفُو اللهْ وْمَا يِلْزْمُوشْ يْكُونْ مِتْكَبِّرْ وْلاَ مُغْشَاشْ وْلاَ سُكَّارْجِي وِلاَّ يِتْصَرِّفْ بْقُوَّة وِلاَّ طَامِعْ فِي الرِّبْحْ الحْرَامْ،

⁸آمَا يِلْزْمُو يْكُونْ يْضَيِّفْ البْرَايْنِيَّة وِيْحِبْ الخِيرْ وِرْزِينْ وْعَادِلْ وْتَقِي وْيِتْحَكِّمْ فِي رُوحُو

⁹وِيْشِدْ صْحِيحْ فِي الكْلاَمْ الصَّادِقْ الِّي يْوَافِقْ الوْصَايَا مْتَاعْنَا، بَاشْ يْكُونْ قَادِرْ بَاشْ يُوعِظْ عْلَى التَّعْلِيمْ الصْحِيحْ وِيْرُدْ عْلَى المْعَارْضِينْ.

¹⁰رَاهُو ثَمَّة بَرْشَة نَاسْ مَا يِسْمْعُوشْ الكْلاَمْ، وْهُومَا يِخْدْعُوا فِي النَّاسْ بِالكْلاَمْ الفَارِغْ، وْبِالأَخَصْ مِنْ بِينْ اليْهُودْ،

¹¹يِلْزْمِكْ تْسَكّْرِلْهُمْ افَّامْهُمْ، رَاهُمْ يْدَمّْرُوا فِي بْيُوتْ بْكُلْهَا وَقْتِلِّي يْعَلّْمُوا حَاجَاتْ مَا عِنْدْهُمْشْ الحَقْ بَاشْ يْعَلّْمُوهَا عْلَى خَاطِرْ الرِّبْحْ الحْرَامْ.

¹²وْوَاحِدْ مِنْهُمْ وْهُوَ نَبِي مْتَاعْهُمْ قَالْ عْلِيهُمْ: «الكَرِيتِيِّينْ كَذَّابِينْ وْهُومَا وُحُوشْ خَايْبَة يَاكْلُوا بَرْشَة وْيُرْقْدُوا بَرْشَة.»

¹³وِالشّْهَادَة هَاذِي صَادْقَة، إِمَّالاَ يِلْزْمِكْ تْوَبِّخْهُمْ بْقُوَّة بَاشْ إِيمَانْهُمْ يِتْصَلِّحْ،

¹⁴وْمَا يِتْلْهَاوْشْ بِخْرَافَاتْ مْتَاعْ اليْهُودْ ووْصَايَا مْتَاعْ نَاسْ بِعْدُوا عْلَى الحَقْ.

¹⁵كُلْ شَيْء طَاهِرْ لِلنَّاسْ الطَّاهْرِينْ، وْحَتَّى شَيْء مَا هُو طَاهِرْ لِلمَنْزُوسِينْ وِلِّي مَا هُمْشْ مُؤْمْنِينْ، حَتَّى مِنْ عْقُولْهُمْ وْضَمَايِرْهُمْ مَنْزُوسَة.

¹⁶يَدَّعِيوْ الِّي هُومَا يَعْرْفُوا اللهْ، آمَا يُنْكْرُوهْ فِي أَعْمَالْهُمْ. هُومَا مَنْزُوسِينْ عَاصِينْ مَا هُمْشْ قَادْرِينْ بَاشْ يَعْمْلُوا أَيْ حَاجَة صَالْحَة.